ەلشى پاۋىلدىڭ زامانىندا جولاۋشىلار تاسىمالدايتىن ارنايى كەمەلەر بولماعان.‏ كەمەمەن جول ٴ‌جۇرۋ ٷشىن ساياحاتشى دىتتەگەن جەرىنە جۇرگەلى جاتقان جۇك تاسىمالدايتىن كەمەنى تاۋىپ،‏ جولاۋشى الاتىن-‏المايتىنىن سۇراستىراتىن (‏ەل.‏ ٸس.‏ 21:‏2،‏ 3‏)‏.‏ كەمە تۋرا سول جەرگە بارماسا دا،‏ جولاۋشى جول-‏جونەكەي باسقا كەمەگە وتىرىپ،‏ كوزدەگەن جەرىنە جەتە الاتىن (‏ەل.‏ ٸس.‏ 27:‏1—‏6‏)‏.‏

سول زاماندا ادامدار جىلدىڭ بەلگىلى ٴ‌بىر مەزگىلىندە عانا كەمەمەن ساياحاتقا شىعاتىن.‏ بۇعان قوسا،‏ كەمەلەردىڭ جول جۇرەتىن ناقتى كەستەسى بولمايتىن.‏ قولايسىز اۋا رايىنان بولەك،‏ تەڭىزشىلەر كەيبىر ىرىمدارعا بولا اشىق تەڭىزگە شىعۋدان تارتىناتىن.‏ مىسالى،‏ ولار جاعادان قيراپ جاتقان كەمەنى كورسە نەمەسە تاكەلاجعا قونعان قارعا قارقىلداسا،‏ مۇنى جامان ىرىمعا جوريتىن.‏ بۇعان قوسا،‏ قاجەتتى جەل سوققاندا عانا ولار جەلكەندەرىن كەرىپ،‏ جولعا شىعاتىن.‏ نە كەرەك،‏ وزىنە كەرەك كەمەنى تاپقان سوڭ،‏ جولاۋشى جۇگىن ارقالاپ كەمەجايعا كەلىپ،‏ كەمەنىڭ جىلجىعانىن كۇتەتىن.‏

تاريحشى لايونەل كاسسون بىلاي دەيدى:‏ «ەجەلگى ريمدە كەمەنى تەز تابۋ ٷشىن ادامدارعا جاقسى جاعداي جاسالعان ەدى.‏ سوندىقتان ساياحاتشىلار كەمە ىزدەپ،‏ تابانىنان تاۋسىلمايتىن.‏ ريمنىڭ كەمەجايى تيبر وزەنىنىڭ ساعاسىندا ورنالاسقان ەدى.‏ جاقىن ماڭداعى وستيا دەگەن قالادا بازار الاڭى بولعان.‏ سول جەردە ٴ‌تۇرلى ەلدەن كەلگەن تەڭىزشىلەردىڭ كەڭسەلەرى بار ەدى.‏ مىسالى،‏ ولار ناربوننان (‏قازىرگى فرانسيا)‏،‏ كارفاگەننەن (‏قازىرگى تۋنيس)‏،‏ تاعى دا باسقا جەرلەردەن كەلەتىن.‏ ساياحاتشى سول كەڭسەلەرگە بارىپ،‏ كەمەنىڭ قاي باعىتتا جۇزەتىنىن ٴ‌بىلىپ الاتىن».‏

كەمەمەن ساياحاتتاۋ ۋاقىتتى ۇنەمدەگەنىمەن،‏ قاۋىپتى دە ەدى.‏ مىسالى،‏ ەلشى پاۋىل ميسسيونەرلىك ساپارى كەزىندە بىرنەشە رەت كەمە اپاتىنا ۇشىراعان بولاتىن (‏قور.‏ 2-‏ح.‏ 11:‏25‏)‏.‏