Nalunngiliuk?
Itsaq imaatigut angalaniartut qanoq aqqutissarsiortarpat?
PAULUSIP nalaani umiarsuit ilaasartaatit naliginnaanngillat. Angalaniartut aqqutissarsiumallutik niuertumik niuffagiummik umiarsuaatilimmik nalunnginnittoqarnersoq apersuutigisarpaat, taava ornitassamik tungaanukartoqassanersoq ilaasoqarusunnersullu paasiniartarpaat. (ApS 21:2, 3) Ornitassaminnut umiarsuaq tulassanngikkaluarpalluunniit angalasussat ilaajumasarput, aqqutaanilu umiarsualivimmut pigaangamik umiarsuarmut allamut qanillattuussisinnaasumut ilaaffissarsiortarput. – ApS 27:1-6.
Ukiup ilaannaani umiartortoqartarpoq, angalanissamullu pilersaarusiat maleqqissaarneqarneq ajorput. Silarluttarnerata saniatigut umiartortut upperisapalaavi pissutaallutik kinguaattoortarput, naasaaqarsorigunikku soorlu tulukkamik umiarsuup napparutaani qarlortumik tusaasaqarunik sissamiluunniit umiarsuup umiiarnikup ilaanik takusaqarunik aallanngiinnartarput. Oqumigaarsinnaagaangamik aallartarput. Ilaalersup nassatani nassarlugit umiarsualivimmukarluni umiarsuup aallalerneranik nalunaartoqarnissaa utaqqisarpaa.
Oqaluttuarisaanermik ilisimatooq Lionel Casson ima allappoq: “Inuit umiarsualivinni paasiniaanertik sivisunaannginniassammassuk Romami kiffartuussiveqarpoq. Kuussuup Tiberip paavani umiarsualiveqarpoq. Tamatuma eqqaani illoqarfimmi Ostiami illoqannginnersarujussuaq ilullugu arlalinnik allaffeqarpoq. Taakkua ilarpassui tassaapput umiarsualivinnut allanut umiarsuakkut nassiussuisartut allaffii: Narbonnemut (ullumikkut Frankrigimiittoq) umiarsuakkut nassiussuisartut allaffeqarput, Karthagomut (ullumikkut Tunesiamiittoq) umiarsuakkut nassiussuisartut allaffeqarput ... ilaalu ilanngullugit. Ilaaffissarsiortoq kinaluunniit illoqarfiup ornitassami allaffianut apeqqutiginniinnartussaavoq.”
Imaatigut angalaneq piffissartornannginneruvoq, ulorianartortaqarporli aamma. Paulusi ajoqersuiartorluni angalanermini arlaleriarluni umiiaqataavoq. – 2 Kor 11:25.