MU IZUWA ya Phawulu, ki kwexile mawulungu phala kwambata ngó o athu. Phala kwendela mu ulungu, o muthu wa bhingile kwibhwidisa akwá, phala kwijiya se ejidile ulungu wa wenji wa muya ku kididi kwa mesenene, ni kwijiya we se a tena ku mwambata. (Ika. 21:2, 3) Né mwene se o ulungu ki wexile muya ku kididi kya kane, o athu akexile mu sota kubhixila ngó mu ditabhu mba kididi kya kukwatela o ulungu, phala kukwata ulungu wengi wa-nda mwambata ku kididi bhwa zukama kwa mesena kuya.—Ika. 27:1-6.

O athu ka kexile mu kwendela mu ulungu mu ithangana yoso ya muvu, o mawulungu kexile mu kwendela ngó mu njila imoxi. Ene exile mu lenga o kalemba. Kumbandu yengi, akwa kwendesa o mawulungu, ka kexile mu kwendesa se a lotele nzoji ya ibha, a mona kilombelombe kya kokola kuthandu a mvela ya ulungu, mba a mona ulungu wa boba bhu mbandu a kalunga. O Atabhwidi mba akwa Kwendesa o mawulungu, a kexile mu kayela o kitembwe kya mu ila kwoso kwa mesenene éne. Kyenyiki, se kitembwe kya wabhele, ene akexile mu mateka o njila. Phala kusanga ulungu wa-nda mwambata mu kididi kya kane, o muthu wa mu kwenda o njila, wa bhingile kuya mu ditabhu dya zukamene dingi, anga u kingila katé kyévwa o ngolokela kwila, sayi ulungu wa-nda tunda mu kithangana ni mbandu.

O mukwa musoso Lionel Casson wambe kwila: “Mu mbanza ya Loma o athu ka bhingile kusota kyavulu ulungu phala kwenda njila. Mukonda o ditabhu dyâ dyexile kwa zawuka o ngiji ya Tibre. Mu mbanza ya Ostia mwexile kitanda kya dikota, mu kitanda kiki mwexile jixikitodyu javulu. Sayi jixikitodyu javulu ja tokalele ku matabhu a jixi jengi: Mu kifika o mawulungu a Narbonne [mu izuwa ya lelu, França] exile ni xikitodyu imoxi, o mawulungu a Carthage [mu izuwa ya lelu, Tunisia] exile we ni xikitodyu yamukwá. Kwexile we jixi jengi jexile ni jixikitodyu mu mbanza ya Ostia. O muthu wa mu sota ulungu phala kwenda njila wa bhingile ngó kubokona mu jixikitodyu ja mbanza ya mesenene kuya.”

Kwenda njila mu mawulungu ki kwexile mu laleka kyavulu, maji kwexile we ilwezu. Mu jinjila ja bhangele kala mukunji wa jixi jengi, mu veji javulu Phawulu wa bobele ni ulungu.—2 Kol. 11:25.