ԜӘʹДЕ Паԝлос, хут бона рʹеԝитийе гәми тʹӧнә бун. Ле һәрге кәсәки бьхԝәста пе гәмийе һәрʹә щики, әԝ гәрәке пебьһʹәсийа һәла гәмикә баркʹеш дьчә ԝи щийи, кʹидәре ԝирʹа лазьм ә, у дькарә мәрьва жи бьвә (Кʹар. Шанд. 21:2, 3). Һәрге жи гәми нәдьчу ԝи щийи кʹидәре рʹеԝирʹа лазьм бу, йәкә әԝ пе ве гәмийе дьчу, у паше бәндәрада (порт) гәмикә дьн дьгәрʹийа, кʹижан кӧ дьчу незики ԝи щийи кӧ ԝирʹа лазьм бу (Кʹар. Шанд. 27:1-6).

Рʹеԝитийа пе гәмийе һʹәчʹи зәʹф бь сезона бу, у бона дәркʹәтьна гәмийа ԝәʹде конкрет тʹӧнә бу. Хенщи һәԝа хьраб, тьштед майин жи рʹе ԝана дьгьртьн, ԝәки пе гәмийа рʹе кʹәвьн. Әԝана жь бо баԝәрийед ԛәлп жи дькарьбун рʹе нәкʹәтана. Һьнә нишан бона ԝана нәбаш бун, мәсәлә чахе ԛьжьке сәр гәмийе дькьрә ԛьрʹә-ԛьрʹ, йан жи чахе бәр дәве бәре гәмийа һурдәхԝәши дьдитьн. Гәмивана чахе дьдитьн, кӧ ба бәрбь ԝи али дьчә кʹидәре кӧ әԝана гәрәке һәрʹьн, һьнге әԝана рʹе дькʹәтьн. Чахе рʹеԝи гәмикә ӧса дьдит кӧ жерʹа лазьм бу, әԝ пе баре хԝә дьчу сәр щийе сәкьнандьна гәмийе, у һивийе бу һʹәта әʹлам кьрана, кӧ кʹәнге гәми ԝе рʹе кʹәвә.

Тʹәрихзан Лионел Кесен дьбежә: «Рʹомеда мәрьварʹа һеса бу гәми бьдитана, чьмки ԝана хԝәха нәдьгәрʹийа. Бәндәра ԝи бәр дәлава чʹәме Тибер бу. Шәһәре Остиада мәйдана мәзьн һәбу, дәр доре кʹижанида гәләк офис һәбун. Гәләк жь ԝан офиса йед мәрьвед жь щурʹә-щурʹә бәндәра бун, кʹижана бар дәрбаз дькьрьн: офисәк йа гәмиванед Нарбон [рʹожа иройин Франса] бу, йәк йа гәмиванед Картаща [рʹожа иройин Тунис] бу, . . . у диса йед майин. Һәр кәсе кӧ гәми дьгәрʹийа, гәрәке бьчуйа ԝан офиса у пебьһʹәсийа, кӧ кʹижан гәми дьчә незики ԝи щийи, кʹидәре жерʹа лазьм ә».

Рʹаст ә пе гәмийе ԝәʹде рʹеԝийа һьндьк дьчу, ле рʹеԝити хоф бу. Чәнд щара, чахе Паԝлос рʹеԝитийа хԝәйә мисйонерти дькьр, гәмийа кӧ әԝ теда бу, һурдәхԝәши бу (2 Корн. 11:25).