KUTSIBU-TSIBU, omwa buthuku bwa Paulo amathu manene-manene awabyaho syabya w’eriheka abandu. Eribana obwathu bw’erighendamo, omundu iniakatsuka eribulya abandi nga hane obwathu bw’emisiko obukendi lhaba eyo akaghenda kandi obwanga ligha eriheka abandu. (Emib. 21:2, 3) Obwathu nomubwangabya isibulighenda aho nyine-nyine aho akaya, ibukabya bukimana omwa mwanya mulebe, iniakalhuamu n’erisondya obundi bwathu obwanga muhikya hakuhi naho akaya.​—Emib. 27:1-6.

Olhughendo lhw’omwa bwathu ilhukabya okwa buthuku bulebe bw’omwaka, amathu isyalithunga endegheka ey’erikwama. Eryongera okwa mibere y’obuthuku eyithuwene, abakaghendaya obwathu ibakanaghana erighenda lhuba obundi busana n’ebihaniriro by’obulhaghu, ng’eky’erileberyako bamowa ekikororo kikabirikira omwa mulenge owathuwene, kutse bamalhangira okwa musike obwathu obulyatsanda. Abakaghendaya obwathu ibakanasima hakabya omuyagha, neryo amabya inianuwene, ibakahongoka. Omundu iniakabya amabana obwathu obukendi muthwalha, iniakaghenda okwa mwalu n’ebindu biwe n’erilinda ekirango ngoku obwathu bukisiya ibwahongoka.

Oyusomire ebya kera ya Lionel Casson akabugha athi: “Etawuni ye Roma yabya yiwithe emibere eyuwene ey’erileka ikyolhobera abandu eribana obwathu bw’erighendamu neryo ibathayithagha eriyisonderya obwathu. Omwalu wayu abya okwa Lhusi Tiber. Hakuhi n’etawuni ye Ostia ihali emyanya y’erikalhamu eyithimbirweko esyofisi. Esinene sy’okwa syofisi esi, ini sy’abamathu ab’imanire emyalu muthina-muthina: abe Narbonne [owali omwa France ya munabwire] ibawitheko nguma, abe Carthage [owali omwa Tunisia ya munabwire] nabu eyindi, . . . n’esindi. Owosi-wosi oyukasondaya obwathu bw’erighendamu iniakaya okwa ofisi y’obwathu obukalhaba hakuhi n’etawuni yosi-yosi eyo akalholha.”

Olhughendo lhw’omwa bwathu isilhuli thwalha buthuku bunene, aliwe nalhu ilhunawithe bitsibu byalho. Ngendo nyingyi, omwa syongendo sya Paulo ng’omumisani, amathu awabya akaghendamu iniakabana ebitsibu.​—2 Kor. 11:25.