INSAY Pɔl in tɛm, dɛn nɔ bin gɛt ship dɛn we bin de fɔ pasenja dɛn nɔmɔ. Fɔ mek pɔsin travul, i nid fɔ aks ɔda pipul dɛn if dɛn no bɔt ɛni ship we de travul wit lod dɛn na di say we i want fɔ go ɛn if dɛn go gri fɔ tek pasenja na di ship. (Di Apɔsul Dɛn Wok [Akt] 21:​2, 3) Ilɛksɛf di ship nɔ de go na di rayt say usay di pɔsin want fɔ go, we di ship stɔp na di difrɛn say dɛn we dɛn kin stɔp, di pɔsin go luk fɔ ɔda ship we go go wit am nia di say we i want fɔ go.—Di Apɔsul Dɛn Wok [Akt] 27:​1-6.

Insay di ia, na bay sizin pipul dɛn bin de travul bay si, ɛn di ship dɛn nɔ bin gɛt patikyula tɛm fɔ dat. Nɔto bad wɛda nɔmɔ kin mek dɛn nɔ travul di tɛm we dɛn dɔn plan fɔ travul, i kin bi bak wetin dɛn biliv lɛk we bɔd tinap pantap di ship in rop de kray, ɔ if dɛn si pwɛl ship na bich. Di wan dɛn we de kɔntrol di ship kin wet we di briz nɔ ebi fɔ mek dɛn bigin travul. We pɔsin fɛn ship we dɔn rɛdi fɔ go, i de go nia di say we di ship de wit di lod dɛn we i gɛt ɛn wet te dɛn anawns se di ship dɔn rɛdi fɔ go.

Wan man we de stɔdi istri we nem Layɔnɛl Kasin bin tɔk se “Na Rom i bin izi fɔ pipul dɛn fɔ fɛn ship fɔ travul, so dɛn nɔ nid fɔ fɛn ship fɔ dɛnsɛf. Dɛn abɔ bin de na di say we di Tayba Riva de jɔyn wit di si. Wan big ples bin de nia di tɔŋ we nem Ostia we bin gɛt ɔfis dɛn. Di wan dɛn we de kɔntrol di ship dɛn na dɛn bin gɛt bɔku pan dɛn ɔfis dɛn de, di wan dɛn we bin de kɔmɔt na Naboni [we naw na Frans] bin gɛt wan, di wan dɛn we bin de kɔmɔt na Katej [we naw na Tunisha] bin gɛt ɔda wan, . . . ɛn ɔda wan dɛn. Ɛnibɔdi we de luk fɔ ship fɔ travul na di siti we i de go nid fɔ chɛk na wan pan dɛn ɔfis dɛn de.”

Na bin risk fɔ travul wit ship bɔt di wan dɛn we bin de yuz ship nɔ bin de yuz bɔku tɛm. Bɔku tɛm we Pɔl bin de travul go du in mishɔnari wok, di ship we i bin de lod pan bin de pwɛl.—2 Kɔr. 11:​25.