POSIRUWO sina kapi pwa kere yikepa yokugendera vantu. Nsene muntu ana hara kuronda mosikepa, age nga pura wopeke nsene va diva ko murandesi ogu ga kara nosikepa, ogu ana kuvyuka oku vana kuza ntani nsene ana hara kupitura ko vantu. (Yirug. 21:2, 3) Nampili sikepa oso kapi sina kukasika oku ana tamba murondi, age nga rondo simpe mosikepa oso nokukapapara ko sikepa sapeke apa nasi ka sikama pezenga nalyopeke.—Yirug. 27:1-6.

Yikepa yomosiruwo sanare kapi ngayi gendi nkenye apa ntani ngayi katuka paapa yina harere. Mukarompepo gomudona kapisi yigo gwelike ngagu ninkisa yikepa yidire kukatuka nosiruwo nye hena mapuliro aga va kere nago vantu. Pasihonena, vasingi woyikepa kapi ngava zi morugendo nsene va zuvha ekorova kuna kudimba ndi nsene va mona sikepa sokuzonauka konontere defuta. Yikepa ngayi ndindire mukarompepo gomuwa ntani nayi katuka. Nsene muntu ogu ana hara kuza morugendo a gwana sikepa sokuza oku ana vyuka, age ngazi nonomurongero dendi pezenga nokukandindira apa nava divisa asi sikepa oso ngesi tasi katuka.

Mutjangi gehistoli gedina Lionel Casson kwa tanta asi: “Mositata saRoma, vantu ava ngava zi morugendo ngayi va rerupire kugwana yikepa. Ezenga lyoyikepa lyaRoma kwa kere konontere domukuro gwaTiber. Ano modoropa za Ostia kwa kere mo evango lyenene eli lya kere nonomberewa. Sinzi sonomberewa odo kwa kere doyikepa yokonodoropa dokulisiga-siga. Pasihonena, yikepa yokutunda koNarbonne [ezi vana kutumbura naina asi Fransa] ntani yikepa yokoCarthage [ezi vana kutumbura asi Tunisia] ntani nayimwe, nayinye kwa kere nonomberewa modoropa ozo. Muntu ogu ga here kuza morugendo, nga zi konomberewa odo yipo aka papare sikepa esi sina kuvyuka oku ana kuza.”

Nampili ngomu yikepa ngayi genderere kupitakana maugendero gamwe, nye nga pa horoka maudigu. Yikando yoyinzi, Paurusa ngayi mu tekere yikepa apa ngazi morugendo rwendi routumwa.—2 Kol. 11:25.