MUNA lumbu ya Paulu wa ntumwa, ke vakala ye nzaza ko zakubikwa kaka muna nata o wantu. Muna vanga nkangalu muna nzaza, diavavanga vo muntu kayuvula kw’akaka kana vo bazeye e nzaza ya natina e lekwa yayendanga kuna fulu kina kazolele kwenda ye kana vo ilenda nata o wantu. (Mav. 21:2, 3) Kana nkutu vo e nzaza ke ikwenda kuna o muntu kakanamene ko, o muntu olenda manta muna nzaza, wakulumukinanga va konso fulu kianingamenanga e nzaza yo baka nzaza yankaka yayendanga kuna kakanamene.—Mav. 27:1-6.

Vakalanga ye nsungi zasikididi muna mvu ina o wantu bakangalelanga muna kalunga. E nzaza ke yakalanga ye lumbu kiasididi ko kina iyantika o nkangalu. Katula e nsungi yambi, ansau bayambulanga vanga nkangalu avo bamwene sinsu kiambi, nze ngono iyimbilanga vana ntandu a nzaza yovo vanzangala ya nzaza yadimuka vana kumu dia kalunga. Kuna diak’e sambu, avo ansau bamwene vo e tembwa kialembama kina, babakulanga vo yayi i ntangwa yambote ya yantika o nkangalu. Avo muntu osolwele e nzaza ina kalenda kangalela, wayendanga ye lekwa yandi vana fulu kianangamenanga e nzaza yo vingila yavana ansau bevana luzayisu vo e nzaza se ilondoka.

Nsoneki mosi a lusansu una ye nkumbu a Lionel Casson wavova vo: “Kuna mbanz’a Roma yankulu, diasazu diakalanga kwa wantu mu solola e nzaza balenda kangalela. Ke diavavanga ko vo wantu bavava e nzaza yau kibeni. E fulu kianingamenanga e nzaza vana kuma dia Nzadi a Tibre kiakala. Lukufi ye mbanz’a Óstia, vakala ye ntanda wanene wazungwa ye nzo za salu. Zayingi muna nzo zazi za akiti zakalanga muna fulu yaningamenanga e nzaza: Kimosi muna fulu yayi kia akiti a Narbonne [o unu iyikilwanga vo França], kiankaka kia akiti a Cartago [o unu iyikilwanga vo Tunísia] . . . . Kansi, vakala ye fulu yankaka. Konso muntu wavavanga e nzaza ya kangalela, diavavanga vo kenda mokena yo wantu basadilanga muna nzo zazi zakala kuna fulu ina kazola kwenda.”

O vanga nkangalu muna nzaza diasazu diakalanga, kansi vakalanga mpe ye vonza yayingi. Vava Paulu kavanganga nkangalu muna salu kia kimisionario, nkumbu miayingi e nzaza zina kakangalelanga zadimukanga muna mbu.—2 Kor. 11:25.