Pawˇluꞈ ve awˬ co˗e htaˇ, chaw gʼawˬ caˇ ve heuˇ shan hpawˇ maˇ cawˬ. Chaw teˇ gʼaˇ heuˇ shan hpawˇ ciˇ gaˇ ve kʼo, heuˇ shan hpawˇ mawˇ gʼawˬ ve hkʼaˬ kaˬ lo kʼai ve le, leh chaw mui kʼai gʼa˗aw laˇ tehꞈ, heuˇ shan hpawˇ gʼaꞈ paˍ htaꞈ gʼa ca na nyi ve yoˬ. (Tcuh yaˇ 21:2, 3) Yawˇ kʼai gaˇ kuiˬ lo heuˇ shan hpawˇ maˇ gaˬ sheˍ ve htawˇ, awˬ paˇ neˇ kuiˬ lo yaꞈ˗aˉ leh awˬ nu ve heuˇ shan hpawˇ htaꞈ kʼawꞈ ca ve yoˬ.—Tcuh yaˇ 27:1-6.

Heuˇ shan hpawˇ kʼai gʼa tuˬ, awˬ tcuhˉ awˬ yanˇ gʼa nyi ve yoˬ. Heuˇ shan hpawˇ awˬ yanˇ cawˇ cawˇ maˇ kʼai. Mvuhˇ yeˬ mvuhˇ haw laˬ ve kʼo kʼai maˇ gʼa. Heuˇ shan hpawˇ gʼaꞈ paˍ laiˉ gʼaˇ lehˬ awˬ heˆ maˇ daꞈ ve htaꞈ yonˍ ve yoˬ. Hkʼe te leh, aˉ naˆ kʼaˍ heuˇ shan hpawˇ htaꞈ ca poˬ naˇ la ve, maˇ heˆ leh awˬ nu ve heuˇ shan hpawˇ paˆ˗aˍ ve htaꞈ mawˬ ve kʼo, yawˇ hui maˇ kʼai. Heuˇ shan hpawˇ gʼaꞈ paˍ mvuhˇ haw kʼai hpawˇ cawˇ ve kʼo, yawˇ hui kʼai gʼa ve yoˬ. Heuˇ shan hpawˇ gʼaꞈ paˍ kʼoˆ laˇ ve htaꞈ gʼa kaˇ tuˬ, kʼai gaˇ ve chaw heuˇ shan hpawˇ paˇ lo gʼa chehˇ taˍ ve yoˬ.

Chaˬ nyi tehˆ nyi paˍ Lai˗o˗nen Hkehˇsawnˬ meh ve yawˇ kʼoˆ ve, “Roˉmaꞈ venˇ lo heuˇ shan hpawˇ htaꞈ ciˇ leh kʼai sha tuˬ awˬ hkʼaˇ cawˬ ve yoˬ. Oˇ teˇ venˇ lo heuˇ shan hpawˇ jehˇ kuiˬ lehˬ Tai˗beh iˉ kaˆ lawˬ lo cawˬ ve yoˬ. Heuˇ shan hpawˇ jehˇ kuiˬ awˬ paˇ lo Awˇsaꞈti˗a hkʼaˆ cawˬ leh laiˉ kaˬ lo kʼai gʼa tuˬ caˉ daꞈ leh liꞈ maꞈ kaꞈ vuiˬ gʼa ve yoˬ. Na˗bawn [chi teˇ hkui Hpaˉlanˍ mvuhˇ miˬ] lo kʼai tuˬ heuˇ shan hpawˇ cawˬ ve, Hka˗htehˬ [chi teˇ hkui Tuˬniˇsiˇaˇ mvuhˇ miˬ] lo kʼai tuˬ kaꞈ cawˬ ve yoˬ. Chaw teˇ gʼaˇ hkʼaˬ kaˬ lo kʼai gaˇ ve kʼo ca na˗e gʼa ve yoˬ.”

Laˇ tcuhˇ gʼuiˬ hkʼaw heuˇ shan hpawˇ kʼai tuˬ awˬ yanˇ maˇ yehˇ maˇ ve htawˇ, teˇ pawˆ pawˆ kʼo kawˆ tuˬ cawˬ ve yoˬ. Pawˇluꞈ heuˇ shan hpawˇ ciˇ htaˇ, 3 pawˆ luˬ˗e ve htaꞈ gʼa hpuˇ ve yoˬ.—2 Kawˇrenˍhtuˆ 11:25.