MELI ma ting’o mana jowuoth lilo ne ongega e ndalo Paulo. Ka ne ng’ato dwaro dhi kamoro gi meli, nopenjoga jowetene ka di po ni ging’eyo meli moro amora mar osigo mochomo yo kuma nodhiyeno, kendo ma noikore ting’o ji. (Tich 21:2, 3) Kata ka po ni meli moyie ting’e ne ok dhi chopo kuma nodhiye, pod nonyalo idho aidha kogeno ni kochopo e dho wedhe ma melino rawoe, nonyalo yudo meli machielo ma dhi kuma nodhiye kata ma ne nyalo gowo machiegni gi kuma nodhiye.​—Tich 27:1-6.

Wuodh nam nitimoga mana e kinde moko sie e higa, kendo meli ne ok bedga gi chenro moriere ma nyiso chieng’ ma gichakoe wuoth kod sa sie ma giwuokie. Jokwang’ meli seche moko ne nyaloga rito komondi ka pok gichako wuoth, samoro nikech yamo ger kata koth ng’eny, kata seche moko nikech gineno gimoro ma miyo giparo ni gidhi bedo gi hawi marach, kuom ranyisi, ka winj agak oywak e wi tonde motuego tanga, kata ka gineno meli mokethore e dho wath. Jokwang’ meli ne kiyoga sama yamo okue mondo gichak wuodhgi. Ka jawuoth noseyudo meli ma noyie ting’e, nodhi e dho wath gi osikene duto, kae to orito milome ma nyiso ni melino chiegni wuok.

Ja histori moro ma nyinge Lionel Casson wacho kama: “Sirkal ma Rumi ne konyoga jowuoth manyo meli ma terogi kuonde ma ne gidwaro dhiye mondo kik gibed gi tich matek. Ne en gi wath ma meli ne gowoe but kama Aora Tiber ne donjogo e nam. Taon mar Ostia ma ne ni but wadhno ne nigi kama lach ma ji ne nyalo betie, kendo ofise buora bende ne ni kanyo. Thoth ofisego ne gin mag jokwang’ meli mowuok e pinje mopogore opogore, kaka Narbonne [ma sani iluongo ni France], Carthage [ma sani iluongo ni Tunisia], . . . kod mamoko. Ng’ato ang’ata ma ne dwaro dhi wuoth ne dhi e ofis ma nigi meli ma ne luwo kuma nodhiye.”

Wuodh nam ne konyo ahinya e kungo seche mag wuoth, kata kamano, seche moko bende nonyalo kelo ne ji masira. Kuom ranyisi, e wuodhe ma Paulo ne dhiyega ka ne en jamisonari, meli seche moko ne jakethorenegi.​—2 Kor. 11:25.