KUTAALI mawato ya kusenda antu umu manda yakwe Paulo. Fwandi pa kuzana uwato, antu yuzyanga auze ndi cakuti yamanyile uwato uukusenda ivya uculuzi uwayanga kuno yayanga muno ya kapisya yaitemelwanga ukusenda antu. (Mili. 21:2, 3) Nanti icakuti uwato uno umwi wakwela utaayanga kuno umuntu aali pa lwendo wayanga, walondanga uwato uze umu nzila uukuya uku piipi na kuno wayanga.—Mili. 27:1-6.

Amawato yapitanga sile insita zimwi izisoololwe pa mwaka, nupya kutaayanga ukwimika manda ya kupita. Insita zimwi ya kapisya ya wato yataapitanga pa mulandu ni micele, yamwi yafilwanga ukupita pa mulandu nu kutaila imipasi, wakwe ndi yuvwa mwankole akulila wataikala pa tusimbi twa papela pa wato nanti ndi yalola uwato uwononeke apa cituntu. Ya kapisya ya wato yasyukilanga umuza usuma, fwandi ndi cakuti umuza uli ningo, yatandikanga ulwendo. Uwali pa lwendo ndi wazana uwato uungamusenda, wayanga apiipi ni cituntu ni vyola vyakwe nu kuloleela ukufikila lino aineco ya wato yalanda ukuti uwato lyene wasya utenuke.

Uwasambilila sana pa malyasi ya mpiti Lionel Casson walanzile ukuti: “Umusumba wa Loma wakweti ivifulo kuno antu yazananga zuwa amawato. Itauni lya Tiber ali kuno antu yakwelelanga. Umwi tauni lyuze lino yamanga ukuti Ostia ilyali lwa mu piipi, lyakweti umusolo ukulu sana apaali na maofesi. Maofesi aingi pali yaa yaali aakwe ya kapisya ya mawato aku ncende icipusanepusane: ya kapisya ya mawato aku Narbonne [ndakai yakati uku France] yakweti iofesi lyonga, ya kapisya ya mawato aku Carthage [ndakai yakati uku Tunisia] nayo yakwetiko iofesi lyonga, . . . na yauze vivyo kwene. Aliwensi aakulonda uwato wa kukwela wayanga sile umu maofesi mu kulonda uwato uwayanga uku musumba ulionsi uwali umu nzila ya kuya kuno wayanga.”

Ukupita nu wato kwalenganga ali pa lwendo ukukana sumba sana insita, nomba insita zimwi kwayanga na mazanzo. Pa nsita izipusanepusane, umutumwa paulo wayanga umu uzanzo lino mawato yononekanga ala ali pa njendo zya umisyonali.—2 Kol. 11:25.