ILO raan ko an Paul, ekar ejjel̦o̦k waan bajinjea. Innem bwe ren maroñ uwe ñan etal ñan jikin ko jet, rar aikuj kajjitõk ippãn ro jet im lale el̦aññe rejel̦ã ñe ewõr juon waan ektak m̦weiuk ej etal ñan ijo rej jibadekl̦o̦k im em̦õn̦õn̦õ in ebbõk bajinjea. (Jrb. 21:2, 3) Meñe waan ejjerakrõk eo ejjab jerak ñan ijo armej eo ej jibadekl̦o̦k, ak ñe enaaj bõjrak ilo jikin ko jet, armej eo emaroñ uwe ie im tokãlik bar kappukot juon wa me emaroñ bõkl̦o̦k e ñan juon jikin epaakel̦o̦k ijo ej etal ñane.​—Jrb. 27:1-6, UBS.

Ilo tõre ko etto, ewõr iien an waan ejjerakrõk ko jerak ñan jikin ko jet, im ear ejjel̦o̦k juon laajrakin iien jerak me rar aikuj lukkuun l̦oore. Ri-jerakrõk ro remaroñ karum̦wijl̦o̦k aer jerak ejjab kõn wõt an nana lañ ak kõn aer bar tõmak mel̦el̦e ko me rej ekkejell̦o̦k ippãn anijnij. Ñan waanjoñak, ñe juon bao etan raven ej jañ ilo kiju in wa eo, ak ñe rej lo juon wa erup im eo̦tõk, rej ba bwe ej juon kõkal̦l̦e bwe enaaj wõr jorrããn. Ñe ri-jerakrõk ro rej loe bwe em̦m̦an lañ im bareinwõt em̦m̦an kõto eo, renaaj jerak. Ñe em̦õj an armej eo loe waan ejjerakrõk eo me enaaj uwe ie, enaaj bũki men ko m̦weien im etal ñan turin wab eo im kõttar wõt aer kwal̦o̦k ñããt eo enaaj jerak wa eo.

Juon ri-jeje bwebwenato etan Lionel Casson ej ba: “Ilo kar Rom, ekar wõr juon wãween me ear kõm̦m̦an bwe en pidodo an armej kappok waan ejjerakrõk ñan aer uwe ie. Wab eo ilo ijin ear pãd ilo Reba Tiber. Im ilo bukwõn eo etan Ostia me ej pãd epaake wab in, ear wõr juon jikin ekilep im ejukweea me elõñ armej rej etal ñane im elõñ jikin bõk mel̦el̦e ko rej ekkar ipel̦aakin. Im elõñ iaan jikin bõk mel̦el̦e kein rej an waan ejjerakrõk ko me rej itok jãn aelõñ ko jet. Ñan waanjoñak, waan ejjerakrõk ko jãn jikin eo Narbonne [ilo ijo rej n̦aetan ilo raan kein France] ear wõr aer jikin bõk mel̦el̦e, im bareinwõt waan ejjerakrõk ko jãn jikin eo Carthage [ilo ijo rej n̦aetan ilo raan kein Tunisia] ear bar wõr juon aer jikin bõk mel̦el̦e, im bar waan ejjerakrõk ko jet. Juon armej me ej kappok waan ejjerakrõk ñan an uwe ie, ear aikuj etal ñan jikin bõk mel̦el̦e ko an waan ejjerakrõk ko me rej etal ñan ijo ej jibadekl̦o̦k.”

An kar armej ro uwe ilo waan ejjerakrõk ko ear kõm̦m̦an bwe en m̦õkajl̦o̦k aer itoitak ñan jikin ko jet. Ak men in ear bareinwõt kauwõtata. Elõñ iien ear rup wa ko Paul ear uwe ie ke ear itoitak im kõm̦m̦ane jerbal eo an ãinwõt juon mijinede.​—2 Ko. 11:25.