KEMA Pablo itstoya amo onkayaya barcos tlen ika maseualmej ueliskiaj yasej sejkanok. Tlaj se maseuali kinekiyaya yas sejkanok, monekiyaya tlajtlanis tlaj se barco tlen kiuikayaya tlamamali yaskia kampa ya kinekiyaya yas uan tlaj kinekiskiaj kiuikasej (Hech. 21:2, 3). Nopa maseuali ueliskia tlejkos ipan se barco maske amo yauiyaya kampa ya kinekiyaya yas, uan kampa onasiyaya nopa barco ueliskia kitemos seyok (Hech. 27:1-6).

Maseualmej amo nochipa ueliyayaj yauij ika barco pampa katli kiuikayayaj nopa barco amo kiijtouayayaj tlake tonali o tlake hora kisaskia. Maseualmej katli kiuikayayaj nopa barco amo nimantsi kisteuayayaj kema kiitayaya se tsana moseuiyaya ipan ininbarco uan tsajtsiyaya o kema kipantiyayaj se keski tlamantli tlen se barco katli misaui pampa moiljuiyayaj panoskia se tlamantli tlen amo kuali. San kisteuayayaj kema kiitayayaj kuali eltoya nopa tonali, kiampa ueliskia kuali asitij kampa moiljuijtoyaj. Yeka, kema se maseuali kipantiyaya se barco tlen yauiyaya kampa ya kinekiyaya yas, monekiyaya asiti kampa kisaskia nopa barco uan kichias.

Nopa historiador Lionel Casson kiijtoua: “Ipan Roma, maseualmej ueliyayaj nimantsi kipantiaj se barco tlen ueliskia kinuikas, nopa kichiuayaya amo kampa ueli ma kitemojtinemikaj. Barcos kisayayaj uan asiyayaj nechka ueyatl Tíber. Nechka altepetl Ostia eltoya se keski oficinas, nopa oficinas eliyaya ininaxka katli kiijtouayayaj kanke yaskiaj nopa barcos: kej barcos tlen Narbona [nama eli Francia], tlen Cartago [nama eli Túnez] uan sekinok. Katli kinekiyaya yas ipan se barco san monekiyaya tlatsintokas ipan nopa oficinas”.

Maske kema se akajya yauiyaya ipan barco nimantsi onasiyaya nojkia eliyaya mauilili. Kema apóstol Pablo yajki tlajtolmoyaua sejkanok, miakpa misauik kema yauiyaya ipan barco (2 Cor. 11:25).