YEUEJKAUI, ijkuak nemiya Pablo, xonkatkaj barcos tlen san tlaltikpakchanejkej makinuika. Kuakon, tla yakaj kinekiya yas ipan barco, nonekiya tetlajtoltis tla onkatka se barco tlen mauiya kampa yejua kinekiya yas. Niman sakin nonekiya tetlajtoltis tla kikauiliskiaj ompa mauiya (Hech. 21:2, 3). Maski barco xajsiya hasta kampa se kinekiya yas, se ueliskia ompa nisiuj temos niman kajsis okse barco niman ijkon ajsis kampa tlamatstiuj (Hech. 27:1-6).

San kipiaya kemanon kisayaj barcos ipan se xiuitl, niman xkipiayaj se hora ijkuak kisayaj. Kemantika, xkisayaj barcos pampa kitayaj ika ueliskia ajakakiyauis. Kemantika, noijki xkisayaj san ipampa tlen kineltokayaj. Xkita yejuin: tla kitayaj ika se kakalotl peuaya chokaya ipan se barco noso tla kitayaj itlajkotsitsinuan se barco ipan mar, kuakon xkisayaj. Barcos kisayaj tla kualtsin ajakatoya pampa yejon kinpaleuiaya nimantsin maajsikan kampa yayaj. Kuakon, tla yakaj kinextiaya se barco tlen ueliskia kinuikas, nonekiya yas ne kampa ajsij barcos niman kichias makualijtokan ika ikisas barco.

Ixtlamatki Lionel Casson kijtoua ika Roma yokitaka kenon kichiuilis niman ijkon akin kinekiskiaj yaskej ipan barco maka san manotlatlalojtinemikan ijkuak kinextiskej se barco. Barcos tlen yayaj Roma ajsiyaj kampa ontlami atentli Tíber. Kijtoua ika ompa nisiuj nokauaya ueyikalpan Ostia kampa onkatkaj miyek oficinas. Yejon oficinas intlatki katka akin kipiayaj barcos. Ompa nemiyaj akin ualeuayaj Narbona [noso Francia], akin ualeuayaj Cartago [noso Túnez], niman noijki ompa nemiyaj akin ualeuayaj itech okseki uejueyimej kalpamej. Kuakon, akin kinekiyaj yaskej ipan barco san nonekiya yaskej ipan oficinas niman ontetlajtoltiskej.

Ijkuak se yaya ipan barco, nimantsin ajsiya kampa kinekiya yas, san ika, noijki panouaya tlen xkuajli. Apóstol Pablo miyekan yaya ipan barcos niman ijkon ontenojnotsas, niman miyekpa opolajkej barcos kampa yaya (2 Cor. 11:25).