KUA fa mahani, ko e tau toga, po ke tau foulua ke lata ma e tau tagata ō fenoga kua nakai fai he vahā ha Paulo. Ke fano fenoga he toga, lata he tau tagata ō fenoga ke ole ke he falu kaeke ke iloa e lautolu e toga lau koloa ne fano he puhala ia mo e fakaatā ke uta e tau tagata. (Gahua 21:2, 3) Pete ka nakai fano e toga ke he matakavi ne manako e tagata ki ai, ka tū e toga he tau matakavi kehekehe he fenoga, maeke he tagata ke kumi e taha toga foki ka uta fakatata a ia ke he matakavi haana.​—Gahua 27:1-6.

Ko e tau magaaho pauaki he tau ne maeke ke ō fenoga he tahi, ti fa hikihiki e fakaholoaga he tau toga. Lafi ke he tau matagi nakai mitaki, ko e tau kauvaka ne talitonu ke he tau mena fakataulatua kua fakatuai e fenoga ka kelea e fakamailoga ne kitia, tuga e manu lele uli ne tagi mai he akau fakalava he toga, po ke ka kitia e lautolu e toga kua pē i tahi. Fakaaoga he tau kauvaka e magaaho ne mitaki e matagi ke ō fenoga. Ka moua he tagata fano fenoga e toga ka heke a ia, kua fina atu a ia ke he uaafo mo e tau koloa haana ti fakatali ke he fakailoaaga ke he magaaho ka fano ai e toga.

“I Roma kua mukamuka e tau tagata ke moua e toga ti kua nakai lata ke kumi ni e lautolu e toga,” he talahau he tagata tohi tala tuai ko Lionel Casson. “Haia e uaafo ke he kamataaga he vailele Tiber. He taone ko Ostia ne tata ki ai e matakavi lahi ne viko takai he tau ofisa. Laulahi he tau ofisa nei ne pule ki ai e tau kamupanī toga he tau uaafo kehekehe: taha i Narbonne [Falani he vahā nei], taha i Carthage [Tunisia he vahā nei], . . . mo e falu foki. Ko e ha tagata ne kumi e toga ke heke ai kua fakakia ni ke he tau ofisa ma e tau matakavi he hala ne fenoga a lautolu.”

Lagomatai he tau fenoga hala tahi e tau tagata ō fenoga, ka kua hagahaga kelea foki. Lagaloga e pē e foulua ha Paulo he tau fenoga misionare haana.​—2 Kori. 11:25.