PAUL bíyoołkááł yę́ędą́ą́ʼ éí tsinaaʼeeł diné bee naagéhígíí ádaadin ńtʼééʼ. Áko tsinaaʼeeł łaʼ bee chʼaa deeshááł jiniizįįhgo éí tsinaaʼeeł hééł neiyéhígíí bínadaʼízhdíłkidgo áádóó éí łaʼda iih doolwołgo bił daalą́go tʼéiyá biishdoolwoł. (Acts 21:​2, 3) Azhą́ tsinaaʼeeł biih joolwodígíí éí jideeyáhíjígo doo deezʼéel da ndi, éí łahgóó nináltłiʼgo éí jideeyáágóó áháníjįʼ deezʼélígíí łaʼ hanáázhdínóotaał.—Acts 27:​1-6.

Tsinaaʼeeł bee chʼaa naʼadáagi éí łáháda tʼéiyá bá náhooʼaah, áádóó doo ayóó schedule yikʼehgo nidaʼałʼeeł da ńtʼééʼ. Níłchʼi ałʼąą ánááʼníłígíí doo tʼéiyá biniinaa doo nídaʼdiłʼoł da, ndi éí iiníziin łahda biniinaa doo nidaʼałʼeeł da yileeh. Éí tsinaaʼeeł bąąh tłʼóół nídaaztʼiʼígíí bikááʼdóó gáagii łaʼ ániihgo, doodaiiʼ táłkáaʼgi tsinaaʼeeł ńtʼééʼ łaʼ ałtso diitaaʼgo dajiiłtséehgo biniinaa doo hoł dah daʼdiiʼeeł da ńtʼééʼ. Áádóó naʼałʼeełígíí éí yáʼátʼéehgo níyolgo bił yáʼádaatʼééh, háálá éí níyolígíí nizhónígo bił dah adiiʼoł. Chʼaa deeshááł nízinii éí naʼałʼeełígíí tʼáá áko iih díílwoł biłníigo éí kʼad dah adiiʼeeł hodooʼniidgo taah bąąhgi hayéél bił abaʼ jizdáa doo.

Ałkʼidą́ą́ʼ dahaneʼ yaa halneʼii, Lionel Casson joolyéego ájíní: “Tsinaaʼeeł bee chʼaa deeshááł danízinii éí Rome doo nantłʼagóó bá áyiilaa. Éí Tiber tooh nilínígíí bąąhgi tsinaaʼeeł ninádaaltłiʼgo bá hazʼą́. Áhánígóó kin dah shijaaʼgo Ostia hoolyéego éí kéyah daʼníłtsʼą́ą́ʼdę́ę́ʼ ndaʼałʼeełígíí ląʼí díí naalyéhé bá dahooghanígíí deíłyeed. Éí łaʼ Narbonne [díí kʼad France hoolyéédóó], áádóó Carthage [díí kʼad Tunisia hoolyéédóó] ákwii łaʼ yiyoołwoł, áádóó łahdę́ę́ʼ ałdóʼ łaʼ dayéełyeed. Áko łaʼda tsinaaʼeeł biih deeshwoł niizįįhgo éí ákwii yah azhdoogáałgo éí jideeyáhígóó daatsʼí łaʼ adeezʼéelgo bínaʼízhdídóołkił.”

Íídą́ą́ʼ diné éí tsinaaʼeeł bee tʼáá tsı̨́łígo yee chʼaa nidaakai ńtʼééʼ, ndi tʼáá báhádzid. Paul éí nahaneʼ binaanish ííłʼı̨́įgo díkwíidi shı̨́ı̨́ tsinaaʼeeł bił nídiitaaʼ.—2 Cor. 11:25.