UVUẸN ọke i Paul, o vwo ọkuna ra ha kpare ihworho ọrẹ eyẹsuọ-ọ. Nẹ ohworho ọ sabu mẹrẹn ọkuna rọ nọ ruọ, nọ nọ awọrọ sẹ aye i rhẹ ọleyi rọ guọlọ ha ọkuna riẹ ekete rọ nya, ro no ji kwe kpare ihworho. (Acts 21:2, 3) Orhianẹ ọkuna na o vwo riẹ ekete ohworho na ọ nya-a, orho te ekete ọkuna na ọnọ dobọji, nọ ruẹ ọkuna ọrọrọ ro riẹ ekete rọ nya na.—Acts 27:1-6.

Orhiẹ ọke ephian ya ha ọkuna riẹ onya-a, ọkuna na i vwa ji nyalele ẹkwaphiẹrhotọre owu-u. Haba aruọke obiobiomu, ihworho ra ghwa ọkuna a sabu kpọke onya aye orhianẹ aye i menemena ro mwofẹn, jerẹ afen ro kperẹ uvuẹn oberun ọkuna na, yanghene aye ni mẹrẹn ọkuna na ro rhueri uvuẹn urhie na. Era ghwa ọkuna a dabu ni aruọke na sua, ọrhọ dabu serhọ aye na tuẹn onya rhọ. Ọke ohworho ọrhọ mẹrẹn ọkuna rọ nọ kpariẹ te ekete rọ nya, ọye nọ kpare ehwan ye riẹ ekete ọkuna na o gbo rhọ, jeghwai hẹrhẹ ọke aye ina tuẹn onya na rhọ.

Ọgba irherhe owu re se Lionel Casson nọ tare, “Ẹkwotọre i Rome i vwo ẹkwaphiẹrhotọre neneyo era guọlọ nya ugbo onya i kiki mẹrẹn ọkuna rọ nọ kpare aye. Ekete ọnana ọ ha okokọ Urhie i Tiber. Uvuẹn amwa re se Ostia, o vwo ekete ro rhie firhọ ro vwo ọfisi buebun. Ihworho ra ghwa ọkuna na yi vwo ọfisi enana: ọfisi owu ọ ha Narbonne [nọyẹ France ọke ọnana], ọfisi ọrọrọ ọ ha Carthage [nọyẹ Tunisia ọke ọnana], . . . ọrhẹ erọrọ. Ohworho rọ guọlọ ọkuna rọ wian, no riẹ ọfisi enana ya guọlọ ọkuna ro riẹ ekete rọ nya.”

Ugbo onya nyoma urhiẹ ọ phẹrẹ omamọ, ọrẹn imwofẹn buebun i havwiẹ. Ọgbọ buebun, ọkuna ri Paul ọ tobọ ro uvuẹn owian imishọnari ọnẹyen i rhueri.—2 Cor. 11:25.