АПОСТОЛ ПАВЕЛИ рӕстӕги адӕни ка ластайдӕ, уӕхӕн наутӕ н’ адтӕй. Уомӕ гӕсгӕ бӕлццон ескети фӕрсгӕй базонидӕ, уӕйӕкӕнуйнӕгтӕ ка ласта, уӕхӕн науӕ, уой кумӕ гъӕуй, еци ’рдӕмӕ цӕуй ӕви нӕ, удта адӕни ӕ хӕццӕ есуй ӕви нӕ, уой (Гъуд. 21:2, 3). Ӕндӕр ескумӕ ку цудайдӕ, уӕддӕр бӕлццони бон адтӕй рабадун ӕма ци наулӕууӕни ӕрлӕудтайуонцӕ, уоми ба уой ка гъудӕй, еци науӕбӕл рабадун (Гъуд. 27:1–6).

Анзи медӕг денгизбӕл цӕун ӕрмӕстдӕр кӕцидӕр афони ӕнгъизтӕй. Удта наутӕ дӕр еци еу рӕстӕг нӕ рахуӕциуонцӕ. Е айдагъ бони гъӕдӕй кӕнгӕ н’ адтӕй, фал ма наутӕргутӕй беретӕ цӕхуӕндӕр нисӕнттӕбӕл ке ӕууӕндтӕнцӕ, уомӕй дӕр. Зӕгъӕн, кӕсалгахӕссӕн дзаумӕуттӕбӕл халон ку ӕрбадидӕ кенӕ денгиз, ка ниппурхӕ ’й, уӕхӕн науи сӕститӕ ку ’рбахӕссидӕ, уӕд син е фидбилизмӕ амудта, ӕма нӕуӕ денгизмӕ нӕ ратӕриуонцӕ. Уомӕй уӕлдай ма науӕнгурӕ исесиуонцӕ, ци ’рдӕмӕ цудӕнцӕ, еци ’рдӕмӕ дунгӕ ку исистидӕ, ӕрмӕстдӕр уӕд. Бӕлццон, ка ’й гъудӕй, еци науӕ ку иссеридӕ, уӕд ӕ дзаумӕутти хӕццӕ наулӕууӕнмӕ бацӕуидӕ ӕма ӕнгъӕлмӕ касидӕ, цалинмӕ, науӕ рахуӕцунмӕ ке гъавуй, уой нӕ фегъосун кӕниуонцӕ, уӕдмӕ.

Историк Лайонел Кассон финста: «Роми адтӕй, бӕлццонтӕн гъӕугӕ науӕ иссерунмӕ ка ӕнхус кодта, уӕхӕн конторитӕ, ӕма адтӕй Тибри донӕфтауӕни. Ӕ размӕ, еци горӕт Остий дӕр берӕ уӕхӕн конторитӕ адтӕй, горӕти фӕзи алливарс. Еци конторитӕй беретӕ адтӕнцӕ, сӕ наутӕ аллихузи науӕлӕууӕнти кӕмӕн лӕудтӕнцӕ, уони. Еци наулӕууӕнтӕ адтӕнцӕ Нарбони [абони Франций территори], Карфагени [абони Туниси территори]... ӕма ӕндӕр бунӕтти. Бӕлццонӕн гъудӕй ӕрмӕстдӕр еци конторитӕй еуемӕ бацӕун ӕма ’й базонун, науӕ кӕци наулӕууӕнти лӕудзӕй уой».

Денгизбӕл цӕун берӕ тагъддӕр адтӕй, фал си тӕссаг дӕр уотӕ адтӕй. Павел кӕбӕл цудӕй, еци наутӕй дӕр цалдӕр ниппурхӕ ’й (2 Кор. 11:25).