EN Paulus siene Tiet jeef et jeweenlich kjeene Schäp, waut bloos Menschen fieeden. Wan doa wäa met een Schepp met wull, dan must hee jeweenlich aundre froagen, aus dee von een Frachtschepp (een Schepp, waut Lod fieed) wisten, waut no de rajchte Rechtunk fua un reed wia, am mettonämen (Apj. 21:2-3). Wan daut Schepp nich krakjt doahan fua, wua de Reisenda han wull, dan kunn hee doawäajen metfoaren, un wan daut hinjawäajes bie eenen Howen stellhilt, dan kunn hee seenen, aus doa een aundret Schepp wia, waut am noda no de Städ brocht, wua hee han wull (Apj. 27:1-6).

Mieeschtens fuaren de Schäp bloos jewesse Tieden em Joa un dee hilden sikj nich aun eenen fausten Plon. Biejlikj fuaren dee doano loos, woo daut Wada wia. Un de Scheppmana hauden foaken uk Äwagloowes un fuaren nich loos, wan see biejlikj hieeden, daut doa eene Krauj von bowen opp daut Schepp breld, ooda wan see Bieta von een tweinjet Schepp aune Kaunt Wota sagen. Foaken luaden dee uk, bat de Wint von de rajchte Rechtunk kjeem, ea see loosfuaren. Wan de Reisenda ieescht een Schepp funk, wua hee metfoaren kunn, dan jinkj hee met siene Tauschen no de Omjäajent von dän Howen un luad doa, bat daut bekauntjemoakt wort, daut daut Schepp boolt aufgonen wudd.

De Jeschichtsforscha Lionel Casson sajcht: “En Room wia daut met de Schäp sea hendich enjerecht, soo daut de Menschen nich lang sieekjen musten. De Howen von Room wia doa, wua de Tiber-Riefa em Mäa nenjinkj. Doa dicht bie en de Staut Ostia wia een groota Plauz, wua een deel Offizen wieren. Väl von dee Offizen wieren von Schäp, waut no veschiedne Städen fuaren, biejlikj no Narbonne [eene Staut en Frankreich], no Karthago [eene Staut en Tuneesien], . . . un soo wieda. Wan doa wäa met een Schepp met wull, dan must hee bloos no de Offiz von dee Städa wanken, waut en de Rechtunk wieren, wua hee han wull.”

Daut spoad Tiet, wan eena met een Schepp metfua, oba daut kunn uk jefäadlich sennen. Paulus biejlikj veojjlekjt ieremol, aus hee opp siene Prädichtreisen met Schäp metfua (2. Kor. 11:25).