Mu masugu a mupostolo Phaula, guakhalelego nu masuwa akhalele phamba mukunda nu athu akhalele mutshita vuayaje. Ha guheta masuwa agutshitshila vuayaje, athu akhalele muhula athu ako gula adi mujiya masuwa ana gubata ima, nu adi muya fundo diakhalele naye muene guya nu gula akhalele nu funu ya guzula athu adi mutshita vuayaje. (Makal. 21:2, 3) Gula muthu udi mutshita vuayaje wazula masuwa akhalele muya fundo diko, tangua masuwa ene adi muya nu gumagana mu mbungu jia gudisha, muthu wakhalele mukamba masuwa anyi ajiya gumubata hehi nu fundo diakhalele muya muene.—Makal. 27:1-6.

Masuwa akhalelego mutshita vuayaje masugu agasue, guakhalelego nji programe imoshi yajiyiwe mukunda nu vuayaje. Ba kapitene akhalele mushiphisa vuayaje jiawo mukunda nu sungi jiabola, nu akhalele nji muvua woma gula amona gikuanga mudila holu dia masuwa, nga amona masuwa a gufua ha mbungu. Ba kapitene akhalele mukatula masuwa ha mbungu gula ajiya gutuama egi funji ishigo mukhala yakola. Gula muthu udi mukamba masuwa ajiya gumubata fundo diakhalele muene muya, wakhalele muya ha mbungu nu ima yenji, nu wakhalele munenga gula gudi nu masuwa adi mutshigina gukatuga.

Muenya ndunge mumoshi mu jina dia Lionel Casson wazuelele egi: “Mu dimbo dia Roma athu akhalelego mumona lamba ha gudikambela masuwa a gukitshila vuayaje. Mbungu ya dimbo dia Roma yakhalele mu muta wa Tiber. Dimbo dia Ostia diakhalele dimbo diakoma diagujieta nu ba biro. Ba biro avula akhalele a enya masuwa a mbungu jia gudisha: enya masuwa a Narbonne [mu gifutshi gia France] akhalele nadio dimoshi, enya masuwa a Carthage [mu gifutshi gia Tunisie] akhalele nji nu biro dimoshi, nu ba biro ako atangewego haha. Muthu wakhalele nu funu ya gutshita vuayaje wakhalele naye guya gu ba biro agasue a membo ene ha gukamba gujiya masuwa ajiya gumubata.”

Guwenda mu masuwa guakhalele mukuatesa athu hagula abalegesa ndo masugu avula. Uvi guakhalele nu malamba avula. Matangua avula, mupostolo Phaula wabundugile nu masuwa mu vuayaje jienji jia gimisionere.—2 Kol. 11:25.