APÓSTOL Pabloj tiemponpeqa, barcosqa cargallata apaj kanku. Pasajerosta apaj barcosqa mana kajchu. Chayrayku viajayta munajqa, runasta tapurikunan karqa sichus chay lugarman rej barcosmanta uyarisqankuta. Chantá barcoyojkunata tapurikoj payta pusarinankupaj (Hech. 21:2, 3). Chay barco mana maymanchus riyta munasqanman chayajtinpis, viajaj runaqa pusarichikullaj. Chantá barco sayajtin, viajajqa waj barcotañataj maskʼakoj maymanchus rishasqanman qayllaykuchinanpaj (Hech. 27:1-6).

Chay tiemponpi barcosqa, mana watantintachu viajaj kanku, nitaj horarioyojchu kaj kanku. Chantapis imaynachus tiempo kasqanman jina llojsej kanku. Jinapis wakenqa mala suertepipis creellajtaj kanku. Chayrayku yana qharqañata barco patapi waqajta rikuspa, chayri phirisqa barcota qocha kantupi rikuspa, mana llojsejchu kanku. Chay tiempopi barcosqa wayrallawan purej kanku. Barcota purichejkunataj, sumajta wayramojtillan llojsej kanku. Chayrayku viajaj runaqa, uj barco pusarinanta nejtinpis, maypichus barcos sayaj kanku chayman qʼepisitusnintin rej. Chaypitaj barco llojsinankama suyakoj.

Ñaupa tiempomanta yachaj Lionel Casson nin: “Roma suyoqa, viajajkuna mana kayman jaqayman barcota maskʼaspa puriykachanankupaj, uj puertota churarqa. Chay puertotaj Tíber mayoj tukukuyninpi kasharqa, Ostia llajtapi. Chay llajtaj jatun plazanpi, ashkha oficinas karqa. Chay oficinasmanta ashkhastaj, waj suyusmanta jamoj barcoyojkunajta karqa. Uj karqa, Narbona llajtamanta barcoyojkunajta, kunanqa Francia suyupi kashan. Wajtaj karqa, Cartago llajtamanta barcoyojkunajta, kunanqa Túnez suyupi kashan. [...] Viajayta munajqa, maymanchá riyta munaj chay oficinaman chimpanan karqa”.

Barcopi purejkunaqa usqhayllata maymanpis chayaj kanku. Jinapis mana yachajchu kanku, allintachus manachus chayapunankuta. Apóstol Pablo misionero jina viajashajtinpis, barcon ashkha kutispi yakuman chinkaykorqa (2 Cor. 11:25).