APÓSTOL Pablo causan punllacunapica mercaderiata apaj barcocunallami tiyarca. Gentecunaca chai barcocunapi viajangapajca paicunata apai tucushcatami tapujcuna carca (Hechos 21:2, 3). Paicuna risha nishcaman barcocuna mana rijpipish maicamami chayan, chaicamallami rina carca. Chaimantami shujtaj barcota japijcuna carca (Hechos 27:1-6).

Gentecunaca caru llajtaman ringapajca minishtishcalla cosascunata apashpami, barcocuna chayana pushtuman rina carcacuna. Chaipimi barco llujshingacama shuyajcuna carca. Chai punllacunapica barcocunaca huaquin quillacunallapimi viajajcuna carca. Ima hora, ima punlla llujshina fechataca mana charijchu carca. Barcopi trabajajcunaca shujtaj ladoman ringapajca huaira tiyajtami ricujcuna carca. Pero, barco jahuapi shuj cuervo silbacujta ricushpa, yacupi pambarishca barcopaj partecunata ricushpaca “chiquimi” nishpami ña mana viajajcuna carca.

Lionel Casson runaca: “Roma llajtapica barcocunaca Tíber nishca yacu cꞌuchumanmi chayajcuna carca. Chai yacu cꞌuchullapimi Ostia nishca pueblopica achca oficinacuna tiyarca. Chai oficinacunaman rishpami barcocuna ima horas llujshinata tapujcuna carca. Narbona barcocuna, Cartago barcocunapish Ostia pueblopimi oficinacunata charijcuna carca” nircami.

Barcopi viajashpaca maimanpish ratomi chayajcuna carca. Pero huaquinpica acapanacuna tiyashcamantami barcopi viajanaca peligroso carca. Apóstol Pablo Diosmanta yachachingapaj barcocunapi viajacujpimi barcocunaca achca cutin yacupi pambarirca (2 Corintios 11:25).