APOSTOL Pablopa tiemponpiqa manam kaqchu huk lawkunaman illay munaqkunapaq buquekunaqa. Illay munaqkunaqa buquepi carga apaqkunatam tapukunanku karqa mayman risqankuta. Chaynapi risqan lawman riptinqa chaywan illanankupaq (Hech. 21:2, 3). Buquekunapi illay sasa kaptinpas achka runakunam illaqku. Illaq runaqa buquekunapa mayman chayasqan lawpi uraykamuspan huk buquekunamanña lluqaq maymi risqanman chayananpaq (Hech. 27:1-6).

Buquekunawanqa manam illaqkuchu wayra utaq para tiempoqa. Chaymantapas buqueyuqkunaqa munasqanku horam lluqsiqku. Para utaq wayra kasqanraykullachuqaya manaqa illaqku. Pakpaka utaq chikichasqanku alton pawaq buquenkupi tiyaruptinpas manam illaqkuchu. Manataqmi illaqkuchu lamar quchapi chinkaruq buquepa imallantapas lamar quchapa patanpi tariruspankuqa. Buqueqa lluqsiq illananku lawman wayra kaptillanmi. Wayramriki chay lawman rinankupaq yanapaq. Pipas illayta munaspanqa buquekunapa maymi kasqan lawmanmi rinan karqa, hinaspam chaypi suyanan karqa lluqsinan horakama.

Chaykunamanta yachaq Lionel Casson sutiyuq runam nin: “Ñawpaq tiempopi Roma nacionta kamachiqkunam, buquewan illaqkuna mana kaypi-chaypi buqueta maskanankupaq yanaparqaku. Tiber sutiyuq mayupa patanpim achka buquekuna karqa. Hina chay mayu patanpitaqmi Ostia sutiyuq llaqtapas karqa. Chay llaqtapim tapukuqku illananku lawman mayqin buquekuna risqanta. Chay llaqtapa waqtanta Tiber mayu pasasqanraykum chaymanta buquekuna lluqsiqku Narbona lawman (Francia), Cartago lawman (Tunez) hinaspa huk lawkunamanpas”, nispa.

Buquewan illaspankuqa manam llumpaytachu unaqku, chayraykum achka runakuna buquewan illaqku. Ichaqa wakinpim wañuy patanpi tarikuqku. Chayna kasqanraykum apostol Pablopa illasqan buquekunapas yaku ukuman chinkaykurqa (2 Cor. 11:25).