KO VREME e Pavleskoro ki globala na postojnena sine brodija kola so prenesinena sine samo patnikija. Te šaj te patujnen brodea, o patnikija mora sine te pučen dali isi tovarno brodi kova so džala dži ko than kote so mangena te džan hem dali priminela patnikija (Dela 21:2, 3). O patnikija ponekogaš uklena sine ko brodija kola so na ingarena len sine direktno dži ko than kote so mangena te džan. O brodija ačhovena sine ko različna pristaništa, hem agjaar o patnikija šaj sine te roden javer brodi kova so ka ingarel len popaše uzo than kote so mangena te džan (Dela 27:1-6).

Ko adava vreme o brodija patujnena sine samo odredeno periodi taro berš, hem na sine len točno raspored bašo patujbe. O mornarija kola so sine sueverna na otkažinena sine o patujbe samo bašo lošno vreme, nego isto agjaar bašo nesavo lošno znako, sar na primer, ako šunena sine gavraneskoro glaso kova so tergjola sine ko šele e brodeskere ili ako dikhena sine ko brego kotora taro uništimo brodi. E mornarenge but pomožinela sine i bavlal koja so phudela sine ko pravco kote so mangena te džan. Adaleske, keda ka phudel sine asavki bavlal, ola odma cidena sine taro pristanište. Otkeda ka arakhel brodi kote so šaj te uklel, o patniko adžikerela sine ple bagažea ko pristanište sa džikote na šunela te vakeren kaj o brodi cidela.

O istoričari Lajonel Kason vakerela: Ko Rim sine lokho način o manuša te arakhen brodi patujbaske. Adaleske, na valjani sine ola korkori te roden peske brodi. Leskoro pristanište sine ko than kote so i reka Tibar ikljovela sine ko more. Paše uzi leste sine i diz Ostija. Ki late sine baro ploštad kote so sine pretstavništva taro firme so ingarena roba brodencar. Ola sine taro razna dizja: taro Narbon [ki avdisutni Francija], tari Kartagina [ko avdisutno Tunis]... hem javera. Ako mangela sine nekoj te patujnel negde brodea, valjani sine samo te džal ko pretstavništva hem te arakhel brodi kova so džala dži ko than kote so mangela te džal“.

O patujbe preku more štedinela sine vreme e patnikonge, ama sine nesave rizikija da. Na primer, nekobor puti o Pavle doživingja brodolom ko ple misionerska patujba (2. Kor. 11:25).