KO PAVLESO vreme, na hine brodija kola bi prevozinena samo e manušen. Te šaj te arakhen sova te putujinen, o manuša morandilje te pučen averen da li nesavo trgovačko brodo džala ko odova pravco kuri oljendže valjani hem da li primini putnikonen (Čeribe 21:2, 3). Čak iako o brodo na dželo dži o than kaj o putniko manglja, ov šaj hine ki aver luka te rodel aver brodo kova bi igari lje popaše dži ko than kuri manglja te džal (Čeriba 27:1-6).

Brodoja šaj hine te putujini pe samo ko određeno vreme ko berš, hem o rasporedija na hine precizna. Nesavo puti o mornarija na manglje te putujinen sebepi so o vreme na hine šukar, ama na manglje hem sebepi o buča ko kola verujindže. Na primer, ked dikhlje e gavrane ko jarbol ja o ostatkija kotar nesavo brodo ki obala, on verujindže so na valjani te putujinen. O mornarija šukar džandže te razlikujinen o bavlala hem ked dikhlje so phudela šukar bavlal on bi podžinena ko drumo brodoja. Ked bi o putniko arakhela o brodo kova ka primini lje, ov bi adžičeri ki luka sa pe bučencar so hine lje, sa dži na phenena so ka podžinen.

Jekh istoričar kova vičini pe Lajonel Kason phenela: „Ko Rim e manušendže hine lokho te arakhen o brodo koljeja šaj te putujinen. Oljesi luka hine ki ljen Tibar. Ki diz Ostija koja hine paše, hine baro trg kuri hine hem o glavno than ando razna luke. Na primer, i Narbona [ki avdisutni Francuska], i Kartagina [ko avdisutno Tunis] hem ko avera thana. Svako ko rodindža o prevoz valjandža samo te pučel ko kola dizja o brodo terdžola.“

Okola so putujindže brodoja na našaldže but po vreme, ama asavko putovanje na hine but sigurno. Nekobor puča o Pavle ko peklje misionarska putovanja doživindža brodolom (2. Kor. 11:25).