Xaphoomunni, Phaawuloosi waro manna calla hogobbe hadhanno markaawe dino. Duucha woyite doogaanchu isi hasiˈrinowa higge hadhannota hogowu markaawe afiˈrannohu manna xaˈmisiiseeti; hakkiinni manna hogobbannoro xaˈmiˈranno. (Soq. 21:2, 3) Mittu manchi giddino markaawe hasiˈrino bayicho iillisha hooggusiro nafa, markaawe babbaxxino bayicho uurritanno woyite dirre shiqqi assitannosita wole markaawe hasiˈra dandaanno.—Soq. 27:1-6.

Duucha woyite markaawe hadhannohu diru giddo boode yanna callaati; hattono markaawe mamoote kaˈe mamoote iillitannoro fushshinoonni pirogiraame dino. Kuni ikkinohu, mito woyite ayyarete gari injaannokki daafiraati; qoleno haafa ammaˈno harunsitannori markaawete laaqaano kaayyo layidheenna qinaannonsakkiha lawinsaro haˈra hooggara dandiitanno. Lawishshaho, markaawete heellichuwa usurroonni siibba giddo mittete aana haraqeessu ofolliro woy baaru qaccera hiiqqaqqantino markaawe laˈuro agurte hossanno. Markaawe laaqqannori ayyare dancha ikkituro haˈra hanaffanno. Mittu doogaanchi giddanno markaawe afiˈri gedensaanni baaru qacce mare markaawe kaˈanno yanna kulla geeshsha agadhanno.

Layineli Kaseni yinannihu xaggete borreessaanchi togo yiino: “Roomu gashshooti doogaanchu malka noowa hasiˈranni raataawannokki gede dancha qixxaawo qixxeessino. Roomu malka noohu Tayiberi Lagi laworaati. Konni lagi qooxeessira noohu Ostiya yinanni katamira, lowo biiro afiˈrinohu jawu gudumaali no. Kuri biiro giddo batinye babbaxxitino malkanni kaˈanno markaawe riqibbannote: Narbooni [xaa Faransaye], Karteeji [xaa Tuniiziya] . . . hattono wole katamma markaawera uminsa biiro noonsa. Konnira markaawe hasiˈrannohu aye manchino haˈranno katamma riqibbanno biiro xaˈme hasiˈrino mashalaqqe afiˈra dandaanno.”

Baaru hodhishshi doogaanchu hedinowa rahe iillanno gede kaaˈlannoha ikkirono, qarrano afiˈrino. Lawishshaho, Phaawuloosi misiyoone ikke haˈri yannara giddino markaawe haammata higge hiiqqaqqantino.—2 Qor. 11:25.