BIASANE kapal᷊u penumpang tawẹ apa su zaman i Paulus. Tadeạu botonge sumake kapal᷊ẹ̌, penumpang harusẹ̌ mẹ̌kiwal᷊o kapal᷊ẹ̌ barang sude sarung makoạ sarang tampạ tamaiang i sire, kụ apa kapal᷊ẹ̌ ene mapulu měnarimạ penumpang. (Kis. 21:2, 3) Maning kapal᷊ẹ̌ tawe makoa sarang tampạ tamaiang, bọu pelabuhan niotongangu kapal᷊ẹ̌ ene, i sie botonge mědeạ kapal᷊ẹ̌ bal᷊inẹ kụ sarung mẹ̌bawa si sie sarang tampạ tamaiange.​—Kis. 27:1-6.

Kapal᷊ẹ̌ měbuạ tawe su kanandụu taung, dingangu tawẹ apa jadwalẹ̌ natantu. Kapitengu kapal᷊ẹ̌ měmutusẹ̌ tawe měbuạ bal᷊inẹ kětạeng ual᷊ingu cuaca dal᷊akị, katewe lai ual᷊ingu tahayulẹ̌. Contone, mạeng makaringihẹ̌ tingihu burung gagak dimorọ su tal᷊ing sěnggọ u kapal᷊ẹ̌ arau mạeng piạ bageangu kapal᷊ẹ̌ seng nasilakạ nasampelẹ̌ su apeng, i sire nẹ̌pikirẹ̌ ene tatialang barang dal᷊akị. Kapiteng lai měmẹ̌manda anging, hakị u ene mạeng anging mapaelẹ̌, i sire sarung měbuạ. Mạeng seng nakaěbạ kapal᷊ẹ̌ botonge sakeng, taumata sarung makoạ sarang pelabuhan apidu mẹ̌bawa manga barange kụ měngampal᷊ẹ̌ bohang kange kapal᷊ẹ̌ sarung měbuạ.

Sejarawan Lionel Casson naul᷊ị, ”Roma něnadia pelayanan mapaelẹ̌ tadeạu taumata seng tawe harusẹ̌ dumal᷊eng tamai-ramahi gunang mědeạ kapal᷊ẹ̌ sude sarung měbuạ. Pelabuhan ene su mohongu Sal᷊ụ u Tiber. Maraning soa Ostia piạ lapangan gěguwạ kụ sene piạ manga kantorẹ̌. Kal᷊awọkange kantorẹ̌ ini kai kantor pengiriman bọu haghing pělabuhan. Contone, kantor pengiriman bọu Narbonne [orasẹ̌ ini Prancis] piạ sěmbaụ kantorẹ̌, kantor pengiriman bọu Carthage [orasẹ̌ ini Tunisia] lai piạ sěmbaụ kantorẹ̌, . . .  kerene lai kantor pengiriman wal᷊inẹ. I saing sumake kapal᷊ẹ̌ botonge mẹ̌kiwal᷊o su manga kantorẹ̌ ini tadeạu makasingkạ kapal᷊ẹ̌ sude měbuạ sarang tampạ tamaiange.”

Mẹ̌daral᷊eng měpakẹ kapal᷊ẹ̌ makahematẹ̌ tempo, katewe ene lai piạ resikone. I Paulus pirang sul᷊ẹ nakahombang silakạ su laudẹ̌ su perjalanan utusan injile.​—2 Kor. 11:25.