U Fa Kpa?
Ngise la or a soo u zan zende shin tso nahan nan er nena?
JIGHILII yô, utso mba tôôn pasenja tseegh lu sha ayange a Paulu la ga. Yange or a soo u zan zende shin tso yô, i gba u nana pine ior mbagen aluer ve fa ma tso u tôôn ikyav u a lu yemen vegher u nan soo u zan zende la yô, shi aluer una lumun u tôôn ior yô. (Aer. 21:2, 3) Yange tso una zaan hen ijiir i or soo u zan la jighilii ga kpa, nan nyôr, nahan una za tilen hen ma ijiir igen sha gbenda yô, nan ker tso ugen u a lu yemen ape nan lu zan la yô.—Aer. 27:1-6.
Yange i ver a ver ashighe ken inyom a i zaan zende shin mnger yô, kpa i veren a ver iyange i utso vea va shin vea mough ga. Yange mlu u ahumbe una doo ga shin mbanahantso vea nenge a akaa a ve ne jighjigh ér nga tesen ve ikyôr i bo yô, ve timbir u moughon zende; akaa er shighe u ve nenge gugôô a tem sha ikyor i tsoo a lu eren imo shin ve nenge a avegher a tso ugen u a ur sha kpemnger nahan. Mbanahantso yange ve kegh zan zan ahumbe aa va doon yô, ve mough zende. Yange pasenja nana zua a tso u a lumun u tôôn nan yô, i gba u nana wa ikyav a va keghen ikyua a ihyongo shon sha er shighe u i va yôô ér tso ngu moughon cii yô, nana yem yô.
Ortimen sha akaa a mbayiase ugen iti na ér Lionel Casson, a kaa ér: “Yange i er kwagh ken gar u Roma u na i lu ior ican u zuan a tso u yemen zende ga yô, nahan i kera lu u ior vea yem keren tso ayol a ve ga. Ihyongo i hen gar ne lu ape ifi i Tiber kuan za haan shin zegemnger la. Yange ijiir igen lu zegenan ken geri u Ostia u a lu ikyua a ihyongo ne la; i maa afishi kase ijiir la tser. Afishi ne kpishi lu a ikyômpeni i utso mba sha ajiir kposo kposo, er kômpeni u utso mba ken geri u Narbonne [geri u hegen a lu ken tar u Frans la] man kômpeni u tsoo u ken geri u Carthage [hegen i lu geri u ken tar u Tunisia la] kua afishi a ikyômpeni i tsoo igen kpaa. Yange or a keren tso u nana za zende sha mi yô, nan za hen afishi la sha er nana za ker tso u a lu zan hen geri u nan lu zan la yô.”
Zende u shin mnger yange u pande mbazendev shighe u vihin, nahan kpa, ve tagher a akaabo kpaa. Shighe u Paulu lu zenden eren tom u mishen la, tso ur a na acin imôngo.—2 Kor. 11:25.
