SIPANDRENI nya singi, gu diri mwalo dzinavhiyu nyo rwale vathu matshiguni ya Pawulo. Gasi gu endra khu navhiyu, muthu a di yede gu wudzisa vambe gu khuye gu na ni navhiyu nyo khaguri nyo rwale sombo va yi tigo na yi gu hongola omu uye a hongolago, nigu yi ngu dzumeya gu rwala vathu gani. (Mith. 21:2, 3) Ambari ya gu ba navhiyu yoyo yi si hongoli omu uye a hongolago umo, a di gu beya navhiyu yoyo, a ya tshiga a vbweta yimbe yi na mu yisago vbafuvbi ni omu a gu vbwetago. — Mith. 27:1-6.

Gutala nya dzitepo, dzinavhiyu dzi di gu gimbiya khu dzinango, nigu dzi diri mwalo matshigu nyo vegiswe nyo endre khayo. Vamarinyeru va di gu dzina va thindra lipfhumba nasiri khu kotani nya magelo nya litshigu lolo basi, ganiolu khu kotani sihenahena si nga ba si yeyedza gu khiso lipfhumba lawe kha li na nga gimbiya gwadi. Khu giyeyedzo, go kala gu mbaka vamahigu-nganyi avba nya litanga va embeleya, mwendro vo wona sipalavati nya navhiyu fungoni nya yiphwa. Vamarinyeru va di gu londrola tepo phuvbo yi veteyago umo va hongolago umo. Khu kharato, yo veta khu ndziya nya gu yi si vangi mhango, va di gu hongola. Muthu a gu mana navhiyu yi dzumeya gu mu dzega, a di gu rwala sombo saye a hongola naso avba gu khiledwago avbo dzinavhiyu, a ya vireya gu khuye va tivisa gu khuga nya navhiyu yoyo.

Mulovi nyo khaguri nya matimo nyo pwani khu Lionel Casson wari khuye: “Dhoropani ga Roma gu diri ni ndziya nyo vbevbuge nya gu vathu va vbweta khiyo navhiyu nyo endre khiyo, gasi va si dzi vbweteyi vabune. Poti yawe yi diri avba wu nga wu tshangana avbo tsongo wa Tibre ni yiphwa. Dhoropani ga Óstia gu diri ni wulanga nya wukhongolo wu nga ba wu randredwe khu dzixikritori. Nya dzingi dzakona dzi di gu lumba vamarinyeru nya mayigo nyo hambanehambane: vamarinyeru va Narbona [muhuno a gu França], va diri ni xikritori yawe, vamarinyeru va Cartago [muhuno a gu Tunísia], va diri ni yawe navo, . . . ni dzimbe nidzo. Ni wevbini a nga ba a vbweta gu endra khu navhiyu, a di yede gu wudzisa xikritori nya litigo a vbwetego gu li endreya.”

Gu endra khu navhiyu si di gu vbiredza, ganiolu gu diri ni dzimhango. Maendroni yaye nya wumisiyonariyo, Pawulo dzamide ni navhiyu gunganigungani. — 2 Kor. 11:25.