Swikepe leswi endleriweke ku khandziyisa vanhu ntsena a swi nga ri kona enkarhini wa Pawulo. Leswaku munhu a teka riendzo hi xikepe, a fanele a vutisa van’wana loko va tiva xikepe lexi yaka laha a yaka kona, lexi nga ta n’wi khandziyisa. (Mint. 21:2, 3) Hambiloko munhu a khandziye xikepe lexi nga fikiki laha a yaka kona, munhu yoloye a ta lava xikepe lexi yaka ekusuhi ni laha a yaka kona loko xikepe xi ri karhi xi yima etindhawini to hambanahambana.—Mint. 27:1-6.

Swikepe a swi famba hi mikarhi yo karhi ya lembe naswona a swi nga ri na mikarhi leyi kongomeke. Vatlutisi va swikepe a va hlwerisa swikepe hikwalaho ka maxelo yo biha ni hikwalaho ka vukholwahava, byo tanihi loko wukuwuku ri rila ri ri ehenhla ka tintambu ta xikepe kumbe loko va vona xikepe lexi tshovekeke eribuweni ra lwandle. Loko moya wu bela laha va yaka kona, a va namba va tlutisa xikepe leswaku va ta pfuniwa hi rimoyana. Hikwalaho, loko munhu a kala a byeriwa leswaku ku ni xikepe lexi nga ta n’wi khandziyisa, a fanele a famba ni mindzhwalo yakwe a ya laha swikepe swi yimaka kona, a rindza kukondza ku endliwa xitiviso xa leswaku xikepe xi ta suka ku nga ri khale.

N’wamatimu Lionel Casson u ri: “Muti wa Rhoma a wu ri ni ndlela yo olova etlhelo ka lwandle yo pfuna vanhu ku kuma xikepe ematshan’weni yo famba va vutisela kunene. Ribuwa ra kona a ri ri eku sunguleni ka Nambu wa Tiber. Edorobeni ra Ostia a ku ri ni rivala lerikulu leri rhendzeriweke hi tihofisi. Tihofisi teto a ti ri ta vayimeri va swikepe swo hambanahambana: vayimeri va swikepe swa Narbonne [laha sweswi ku nga Furwa] a va ri na hofisi, vayimeri va swikepe swa Carthage [laha sweswi ku nga Tunisia] na vona a va ri na hofisi, . . . ni van’wana. Munhu un’wana ni un’wana loyi a lava ku teka riendzo hi xikepe a ta ya ehofisini ya doroba leri a lavaka ku ya eka rona.”

Loko munhu a famba hi xikepe a ta fika laha a yaka kona hi ku hatlisa, kambe a ku ri ni makhombo ya kona. Pawulo u tshovekeriwe hi xikepe mikarhi yo hlayanyana eka maendzo yakwe ya vurhumiwa.—2 Kor. 11:25.