I TE tau o Paulo, aita e pahi e faauta i te taata anaˈe. No te tere na nia i te pahi, e titauhia ia ani i te horo pahi. (Ohi. 21:2, 3) Noa ˈtu eita te pahi e haere tia i te fenua e hinaarohia, e nehenehe te horopatete e imi i te tahi atu pahi i te mau uahu ta ratou e tapae.—Ohi. 27:1-6.

E faatupuhia te mau tere pahi i te tahi noa taime o te matahiti e e ere hoê â faanahoraa i te mau taime atoa. E faanuuhia hoi te tere no te huru o te reva e no te tahi mau tapao mai ia taˈi te oreba i nia i te tira e tapea i te mau ie aore ra ia tomo te hoê pahi. Mai te peu mea maitai te mataˈi, e faareva iho â ïa te pahi. No te ite i te hoê tere, e titauhia i te taata ia haere ati aˈe i te uahu e ta ˈna mau tauihaa a tiai atu ai i te parau faaara no nia i te taime e faarue ai te pahi.

Te parau ra te taata tuatapapa Lionel Casson, “e ravea ohie ta to Roma i haamau no te imi i te hoê tere pahi. Ua hamanihia to ratou uahu i te muriavai o te anavai Tibre. I te oire tapiri mai o Ostie, te vai ra te hoê mahora rahi i reira te faatiaraahia e rave rahi fare fatuhia e te mau ona pahi: To Narbonne [Farani i teie tau], to Carthage [Tunisie i teie tau] . . . e te vai ra ˈtu â. E titau-noa-hia i te hoê taata ia haere i tera mau fare no te ite o vai te pahi e fano i tera e tera oire.”

Mea vitiviti ia tere na nia i te pahi, mea atâta atoa râ. Ua tomo te pahi e rave rahi taime i to Paulo mau tere mitionare.—Kor. 2, 11:25.