АПОСТОЛ Павел улон нуналъёсы адямиосты нуллӥсь корабльёс ӧй вал. Соин ик мынӥсь-ветлӥсь адями юалляське вал: уг мыны-а солы кулэ луись интые кыӵе ке вузкарись корабль но уг басьты-а со адямиосты (Ап. уж. 21:2, 3). Корабль мукет интые мынэ вал ке но, адями быгатэ вал васькыны мукет портэ, кудӥз мынон сюресазы пумиськиз, но пуксьыны мукет корабле, кудӥз сое кулэ интыез доры матэгес вайысал (Ап. уж. 27:1—6).

Ӵем дыръя зарезьтӥ мыныны-ветлыны луэ вал ар куспын куд-ог толэзьёсы гинэ. Со сяна, корабльёслэн мынон-ветлон радлыксы ӧй вал, соос пӧртэм дыре ветлӥзы. Корабльлэн уяны потон дырыз куазь сэрен гинэ ӧз воштӥськы, нош озьы ик тодметъёсты чаклась морякъёс сэрен но, кудъёсыз, умойтэм тодметэз адӟыса, зарезе ӧз поталлялэ. Кылсярысь, малпало вал, чорыган арбериос вылын кесяськись кырныж яке пазьгиськем корабльлэн ярдурысь люкетъёсыз шимучыр сярысь верало шуыса. Со сяна, корабльлэсь якорьзэ ӝуто вал соку гинэ, куке нялтас тӧл пельтылӥз. Куке мынӥсь-ветлӥсь адями шедьтэ вал кораблез, кудӥныз кулэ интые мыныны луысал, аслэсьтыз арбериоссэ кутыса, со мынӥз корабльёслэн сылон интыязы но возьмаз, куке корабльлэн зарезе потон дырыз сярысь ялэмын луоз.

«Римын юрттэт сётъяллязы, кудӥзлы луыса кораблез жадьыса утчано ӧй вал ини,— гожъя история удысысь тодосчи Лайонел Кассон.— Римысь порт Тибр шурлэн усёназ интыяськемын вал. Нош артысь Остия карын бадӟым инты вал, кудӥз котырын трос контораос интыяськизы. Со контораос пӧлысь троссэ возизы пӧртэм портъёсысь корабльёслэн кузёоссы, кылсярысь, таӵе портъёсысь: Нарбон [туала Францие пыре], Карфаген [туала Тунисэ пыре]... но мукет. Мынӥсь-ветлӥсь адямилы контораосы пырано но тодоно гинэ вал, кыӵе портъёсын корабль дугдылоз».

Зарезьтӥ ветлыса, дыр ӧжытгес кошке вал, но со кышкытлыкъёсын но герӟаськемын вал. Миссионер луыса ветлыкуз, апостол Павел кӧня ке пол корабль куашкан-выёнэ сюрылӥз (2 Кор. 11:25).