OKATHI wa murummwa Paulo, khisaakhanle ikalawa saakuxa atthu. Nto, wira mutthu eette mukwaha orumeelaka ekalawa aahaana waakohererya atthu akhala wira yaahiiwa aahiiso yaahisuwela ekalawa yaakuxa marotta. Nave yaahaana osuwela akhala wira ekalawa eyo yaarowa mpantta yaaphavela aya aahiiso axineene ekalawa eyo yaaniphavela waakuxa mapasaxero. (Mit. 21:2, 3) Akhala wira ekalawa eyo yaaneemela mphironi ehinatthi ophiya opuro mutthu owo aarowa awe, owo aahaana owela ekalawa ekina yaarowa waattamela opuro aarowa awe.​—Mit. 27:1-6.

Mphareya, ikalawa seetta okathi wooreerela, eyo enooniherya wira khiyaarina eprograma. Okathi ole, mukwaha waaninteeriwa ohiya paahi mwaha wa okathi ohikhala saana, masi-tho mwaha wa itthu soowoothereriwa. Mwa ntakiheryo, akhala wira anahota yaahimoona nakhuku iipaka vasulu va mikhoi sa ekalawa aahiiso yaweha ekalawa yoonyaanyeya, vaahimmwa wira eyo yooniherya wira mukwaha owo khiwaarowa weetta saana. Ohiya-vo, akhala wira yaanoopa epheyo yooreerela, anahota yaanittottela mureerelo epheyo eyo ni yaanikhuma moowaakuveya. Nuumala mutthu ophwanya ekalawa wira eette mukwaha, owo aakhala ni mirupa sawe opuro yaaweliwa ekalawa olipelelaka ohimmwa wira ekalawa yaamukhuma.

ORoma wa khalai saahikhala inamuna sookhweya sa weetta mukwaha ni ekalawa. Mulipa oolepa sowiiraneya oniihaniwa Lionel Casson ohimmye so: “Opuro waaweliwa ikalawa oRoma wa khalai naari nipuro naahelana muro Tibre. Waattamela epooma ya Óstia naahikhala nipuro nooreera naari iskritoorio. Nto axineene iskritoorio sinceene yaari anamarotta a iporto sikina, eskritoorio ekina yaari ya oNarbonne [olelo-va onisuweliwa okhala oFrança], ekina yaari ya oCartago [olelo-va onisuweliwa okhala oTunísia] . . .  ni mapuro makina. Khula mutthu aaphavela weetta mukwaha aahaana okohererya iskritoorio iyo siirela mpantta opuro aarowa awe”.

Nnaamwi weetta mukwaha ni ekalawa waari wookhweya, waahikhalana mixankiho saya. Mwa ntakiheryo, ikwaha sinceene, murummwa Paulo aahisama ni ekalawa okathi eetta awe mikwaha sawe sa omisionaario.​—2 aKor. 11:25.