HA PANAHON ni Pablo, kasagaran na nga waray barko nga para la ha mga pasahero. Basi makasakay an mga biyahero, kinahanglan nira mamakiana ha iba kon may maaram hira nga barko nga pankargamento nga mabiyahe ha lugar nga ira kakadtoan ngan naruruyag magpasakay hin mga pasahero. (Buh. 21:2, 3) Bisan kon an barko diri tikadto ha eksakto nga lugar nga kakadtoan han biyahero, ha mga pantalan nga duduongan hito, puydi hiya mamiling hin iba nga barko nga masasakyan tipakadto ha lugar nga hurohirani ha iya destinasyon.​—Buh. 27:1-6.

Panapanahon la an pagbiyahe ha dagat, ngan waray espisipiko nga eskedyol an pagbiyahe han mga barko. Labot la han maraot nga panahon, mahimo idelatar han mga marinero nga natoo ha mga patootoo an ira pagbiyahe kon may makita hira nga maraot nga sinyales, sugad kon may nahuni nga uwak tikang ha mga pisi han layag, o kon may makita hira ha baybayon nga nalunod nga barko. Ginsasalingabot han mga marinero an maopay nga panahon, salit kon an hangin aada ha husto nga direksyon, mabiyahe hira. Kon makabiling na an biyahero hin masasakyan nga barko, makadto hiya ha pantalan dara an iya bagahe ngan maghuhulat han anunsyo nga malakat na an barko.

“An Roma naghahatag hin kombinyente nga serbisyo ha mga biyahero basi diri na hira makurian pagpinamiling hin masasakyan nga barko,” siring han historyador nga hi Lionel Casson. “An pantalan hito nahimumutang ha bukana han Tiber. Ha bungto han Ostia may hirani nga haluag nga plasa nga may mga opisina. An kadam-an hini kanan kompanya han mga barko nga tikang ha iba-iba nga pantalan: usa han tipakadto ha Narbonne [France yana], usa han tipakadto ha Carthage [Tunisia yana], . . . ngan iba pa. An biyahero nga namimiling hin barko makadto la ha opisina basi kitaon kon ano nga mga syudad an maaagian han iya ruta.”

Para ha mga biyahero, madagmit an pagbiyahe ha dagat, pero may mga peligro liwat ito. Durante han pagbiyahe ni Pablo sugad nga misyonero, pipira ka beses nga nakaeksperyensya hiya nga nalunod an iya ginsasakyan nga barko.—2 Cor. 11:25.