MANY times, they no get ship wey de carry only passengers travel for the time of Paul. If person want use ship travel, the person go need to ask other people if they know any business cargo ship wey de go the side wey e want go, and whether the ship go like to carry passengers. (Acts 21:2, 3) The ship fit no de go exactly the same place wey the person de go. But when the ship de stop for different-different place, the person fit come down. Another ship fit de go near the place wey e want go, so e go look for that one to follow.​—Acts 27:1-6.

No be everytime of the year ship de travel for water, they get particular season and time wey them de travel. When weather no good, drivers (or, sailors) for ship fit wait for some time before they travel. Apart from that one, some of them get some kind beliefs and this one fit make them see some things wey happen as bad sign. For example, if one bird wey the name na raven cry from top of the ship, or they see parts of ship wey scatter near boundary of water and land, they fit no start their journey. When the direction of the wind favor drivers for ship, they go begin their journey. Passenger wey want travel, go carry e load go near the place wey they park the ship and wait to hear announcement say small time the ship go comot.

One man wey study history wey e name na Lionel Casson talk say: “Rome make-am dey easy for people to see ship wey they go use travel, so that they no go need to look for ship by theirself around the area wey ship de park for the water.” E still talk say: “Their seaport dey for Tiber River. For one open place near one town wey them de call Ostia, different-different office dey there for people wey de go different-different place. Na different-different shipping company from other place get many of this office. For example, Narbonne [place wey France dey now] get one, Carthage [place wey Tunisia dey now] get another one, . . . and other ones dey. When anybody de look for ship to travel, e go only go check the office them to know which city dey the direction wey e want go.”

To travel for water dey fast, but e still get e own risk. Some times when Paul de travel for e missionary work, the ship wey e use sink inside water.​—2 Cor. 11:25.