პავლე ცხოვრენდუნ თი დროს სამგზავრო გემეფ ვა არსებენდჷ. გემით მგზავრობა ოკოდეს თინეფქ, ოკო ქიგიკითხუესკო, ნამთინე სავაჭრო გემ ხომ ვემიშ თი მხარეშა, სოდეთ მუნეფს აფდეს ოულარ. თეს გეძინელ, თინა ხოლო ოკო ქიგეგესკო, მიდეჸონანდჷ დო ვარ თე გემ მგზავრეფს (საქ. 21:2, 3). მუჟამსით გემ ზუსტას თი ადგილშა ვემიშ, სოდეთ მგზავრის აფუდ ოულარ, თის შეულებუდ თი პორტის გეგმორთუკო, სოვრეშეთ შეიალებედ შხვა გემს მიდაჸუნკო დანიშნულებაშ ადგილშა (საქ. 27:1—6).

მეზღვაურეფ კონკრეტულ სეზონს გიშეგორუნდეს, ნამდა ზღვაშა გემშართესკო. თინეფს მგზავრობაშო გიმოჭარილ გრაფიკ ვა უღუდეს. მეზღვაურეფ მოგზაურობას ხვალე ბორიაშ გურშენ ვარინ, ცრუ რწმენაშ გურშენ ხოლო გინოდვანდეს. მაგალთო, გემშე ყვარიაშ ხონარს ქიგეგონენდეს ვარდა ნაპირწკუმა გემიშ ნოტეხეფს ქოძირუნდეს-და, მოგზაურობას გეგნოდვანდეს. მეზღვაურეფ ზღვაშა თეიშახ ვემშიშეს, სოიშახ ბორია მუნეფს ოკოდესინ ფერ მიმართულებათ ვა დურქენდჷ. თიშ უკულ, მუთ მოგზაურ დოგორუნდჷ გემს, ნამუთ დანიშნულებაშ ადგილშა მიდეჸონანდჷ, თინა პორტიშ ხოლოშა ქიმიშ ოღალამო დო უჯინედ გემიშ ულას.

ისტორიკოს ლაიონელ კასონ იჩიებ: „რომს რდუ თიცალ მომსახურება, ნამუთ მოგზაურეფს უგორუნდჷ მუნეფშო მოხუჯურ გემს. თიშ პორტ მალწყარ ტიბრიშ წყარპიჯწკუმა რდუ. ქალაქ ოსტიას დიდ მოედანიშ გოხოლუას, რდუ ოფისეფ, ნამუთ თეგვარ მომსახურებას თავაზენდჷ მოგზაურეფს. თინეფიშ უმენტაშ შხვადოშხვა პორტიშ გემიშ კომპანიეფს ოკუთვნუდ. მაგალთო, ართ-ართ ოკუთვნუდ ნარბონიშ (ამდღანერ საფრანგეთი) გემიშ კომპანიას, შხვა სააგენტო კართაგენიშ (ამდღანერ ტუნისი) გემიშ კომპანიას დო თაშ. მგზავრიქ თე ოფისეფს უბრალოთ ოკო გეგნამოწმუკო, ნამ ქალაქეფშა მიშჷ თინეფიშ გემეფ“.

მართალ რე, გემით უმოს მალას ენიშეს დანიშნულებაშ ადგილშა, მარა თენა ოშქურანჯ ხოლო რდუ. მისიონერულ მოგზაურობაშ დროს, პავლე მოციქულქ მუსხირენშა გინასკიდ ღურას (2 კორ. 11:25).