TI RAGO Pauro, agu abakurungba du tipa kina tinda aboro sa anaadunga ho te. Tipa ka ndu nunguro na bakurungba, aboro anaasana akurayo singia i ini pa bakurungba nga ga ababagiahe nga gu kaa ndu ku rogo gu ba i aida ka ndu ku rogoho na airaha ki idi ka dia aboro ku rogoho. (Amo. 21:2, 3) Zavura ho si anidu ni nga bakurungba andunga ku rogo gu ba gu boro nandu nunguro andu ku rogoho te, ni anirengbe arengba ka zorã rogo gu ba bakurungba aru rogoho, ki gbata gu kura bakurungba nga gu rengbe ka ndu na ni mbembedi ku rogo gu ba ni andu ku rogoho.​—Amo. 27:1-6.

Aregbo anidu kinaho gbe vuru garãyo abakurungba anaandu ti ni, na aregboho anaariatihe aˈaria. Kupati gu nga zanga du rago wenengai mbiko mai, wege watadu kura apai, abanungusi bakurungba anaagbiso gayo regbo nduge agbiso kumbatayo ka i bi gupai du wa pakperẽ, wa gunga ka gu ziree du wa bakiki sungu ti agu agire duti gayo bakurungba kaa kpara, watadu ka i bi kpata bakurungba pangba baime. Ho abanungusi bakurungba anibi gupai ni nga rago wenengai, i anitona gayo nduge nibasa. Ho gu boro nandu nunguro anibi gu bakurungba ni ni nika ndu nunguro na ni, ni anaandu na gani atindiro ku baha yo na ki sungu kaa pido gu regbo i nika manga gu tingidapai nga bakurungba ima mbeda ka tona nduge.

Gu bakeke kuru apangbanga nangia Lionel Casson ape gupai nga, “Gene anidu kinaho aboro anaagbia bakurungba ngbaha taata rogo gu gbata nga Roma tipa ka ndu nunguro na ni, aboro anaandunga kaa gbata bakurungba nitiyo te. Gu ba abakurungba anaaru rogoho anidu pangba gu di nga Tiber. Bakere vurukporo rago anidu kinaho mbembedi nga gu naadu na abasunge pati ni kirikiri rogo gu gbata nga Ostia. Badungu agu abasunge re angia ga abaira abakurungba nga aguyo gayo abakurungba anaandu ku rogo aba ni bakiakia: agu aboro nanaandu na bakurungba ku Narbonne yo [du awere nga France] adu na basunge yo beyo sa, aguyo nanaandu ku Carthage yo [du awere nga Tunisia] kidu na gu kuraha beyo a sa, . . . gbiati gu kura dungu abasunge nga ga abanungusi bakurungba. Ai gu boro naaniidi ka ndu na bakurungba, si aniidi ni ndu kina ku rogo agu abasunge nga ga abakurungba nga gu nandu na aboro ku rogo agu agbata du ngbagene gu rago ni andu ku rogoho.”

Nduge bangiri ime na bakurungba anaabanda ga agu aboro regbo abanda nandu nunguro, ono akpakarapai anidu adu ti ni a. Ho Pauro anaandu anunguro ni ni mokedi, bakurungba aima gberã bara dunguhe na ko bangiri ime.​—2 Kor. 11:25.