1-2. (1) Ano cimato hano misaaliay to sahinom, ngaˈayayho mihinom to tao? Patinakoen hena. (2) Roma kaemangay micadaay to samaanay a pikariˈang?

ANO o cimato misaaliay to sahinom no tao, ngaˈayayho mihinom to tao. Tinakoen, o cecay mihalamaay a wawa, mapolinay madokaˈay ko toros ningra, alatek tangsolsa cingra mikilim to wama ina misaali to sasayaren. Soˈlin caka tangsolsa maadah ko dokaˈ ningra, kawra ngaˈay sayaren no wama wina ko wawa. Alatek licayen kora wawa mamaanay aki, anca patado misisit to losaˈ, madaˈmaˈ a midadimaw cingranan a misayar, anca mitafo tora dokaˈ. Ikor cowato ka tomangic, miliyaw aca mihalama. Palidlid sato maadah koya dokaˈ.

² Nolatekay, macadaay no wawa ko pakidemay a sakasomad, mangalefay ko mikaˈodangan a wawa. Cowa kina cecay aca, ao halafinay cangra a makariˈang. Ano hakowato ko mataˈlifay a toki, o dokaˈ nangra pasangaray a maadah. Soˈlin malepelto ko mariˈangay tamdaw, kawra cowa ka sayfang ko roma tamdaw. O dokaˈ i falocoˈ no mikaˈodangan a wawa, matoˈasto kamayanay a adada ko falocoˈ nangra.

3. Sowal i saka 2 Korinto 1:3, 4, wa samaan ko demak ni Yihofa? Oniya lalakaw wa milengo to maanan a salicay?

³ O cecay Krisciyang kaemangho mikaˈodangan, matoˈasto kamayan adada ko falocoˈ, wa milifok cingra to masamanay sapadama hani? (ˈOsien ko 2 Korinto 1:3, 4.) Malecaday ci Yihofa o pakaenay to siri mikaolah ato mihinom to finawlan Ningra. Oniya lalakaw wa milengo to tolo salicay: (1) O mikaˈodangan a wawa matoˈasto hano misaaliho to sahinom hani?  (2) O cima ko mamihinom cangranan hani? (3) Sasamaan kita soˈliˈlin a mihinom cangranan?

4. Cipinang to kasasiroma no wawa ato matoˈasay a tamdaw, hano o kalimlaan hani?

⁴ O roma tamdaw kaemangho mikaˈodangan, soˈlin halafinto ko toki, misaaliayho to sahinom no tao, misamanay hani? Samanen cowa ka lecad ko wawa to matoˈasay tamdaw, ano masamsam i, taˈangayay ko kasasiroma no pifiyor to wawa ato matoˈasay. Nengnengen ita ko pina lalangian.

5. Mikaˈodangan no tao a wawa, wa macada ko maanan a pifiyor hani?

⁵ Patirengen no wawa ko piingid ato pakasoˈlin a kalalaˈed i midipotay cangranan a tamdaw. O hatiniay ngaˈayay a kalalaˈed parihadayay to falocoˈ no wawa, halo padama cangranan pakasoˈlin to ciharatengay cangranan a tamdaw. (ˈOlic 22:9) Ka adayayan i, o miˈodangay a demak sahto mafekaday i lomaˈ, oya miˈodangay a tamdaw oyaan a paro no lomaˈ anca o widang ato salawina no kaemangay. Hatini ko pipalak to pakasoˈlinay falocoˈ no wawa, cowato ko mamiliyaw pakasoˈlin ko wawa to tao, soˈlin pinapina mihecaan wa pasangar pakasoˈlin to tao.

6. Miˈodang to kaemangay hano o mangilosay a mariˈang hani?

⁶ Awaay ko ˈicel no wawa a midipot to niyah, o miˈodangay to kaemangay o mangilosay a mariˈangay a raraw. O wawa cowaho matenes ko tireng ato harateng, cowaho ka cipinang to tatodong no mararamoday ato madadiˈiyay, ano pacieci han cangra a miˈalip tada pakidemay a midokaˈ cangranan. Mikaˈodang to wawa mamiraraw to pinengneng nangra to madadiˈiyay, ato awaayto ko kapo no niyah sanay a miharateng, pasangaray a pakasoˈlin to tao.

7. (1) Hano madolo a malipalaw no miˈodangay a tamdaw ko wawa hani? (2) O maanan a mangahan ko sapilipalaw nangra to wawa hani? (3) O hatiniay a mangah samanay mifiyor to wawa hani?

⁷ O wawa cowaho ka tenes ko pisimsim ato pafafidaˈ to ngaˈayay ato tatiihay a inaneng, caka cipinang a miliyas to katalawan. (1 Korinto 13:11) Mihaenay i, cowa ka hapinang no wawa ko kaniw no miˈodangay a tamdaw. Mafanaˈay ko miˈodangay pasowal to misaˈfitay a mangah a milipalaw to wawa. Tinakoen, pasowal sa cangra: Ano kaˈodangen sahto o raraw no wawa, aka a pasowal to cimacima, ano pasowal kiso i, awaay ko pakasoˈlinay, sanay a mangah. Hanaca pasowalho to wawa: Maˈaˈalip ko kaemangay ato matoˈasay a tamdaw cowa ko mararaway, o paihkalay to olah a waywayan sanay. O hatiniay a mangah halafinay ko pidokaˈ to wawa. Oya mikaˈodangan no tao a wawa, soˈlin matoˈasto hato cikaditay ko tireng i hakelong no kaˈorip sanay a minengneng to niyah, awaayto ko cimacima mamaolah ato mamihinom takowanan sanay.

8. Hano pakasoˈlin kita to ngangaˈay ci Yihofa mihinom to madokaˈay a tamdaw?

⁸ Tangongolay ko pifiyor no pikaˈodang to wawa, o hatiniay a raraw tada o mangilosay a mariˈang! Adihayay ko miˈodangay to kaemangay a raraw mifekad, misawacayay to soˈlinay itini salikoray romiˈad a maˈorip kita, ˈalomanay ko “caay ka siniˈada” a tamdaw, hanaca ‘o tatiihay tamdaw ato misamangahay’ tatiitatiihay. (2 Timoti 3:1-5, 13) Tada mariˈanagay ko demak ni Satan. Ka adayayan i, pahecaday ci Akomaan ko waywayan no roma tamdaw. Kawra, ikakaay ko ˈicel ni Yihofa ci Satanan. Cowa ko tatalimaanen no Kawas ko nano demak ni Satan. Ngaˈayay rihaday ko falocoˈ ita, cipinangay ci Yihofa to macadaay ita a roray, wa hinomen Ningra kita. Ngaˈay midoko to ‘pafeliay to kihcod a sahinom a Kawas’ tada o  rahekeray, samanen ‘tahalifa kita to masamaamaanay a pades i, mihinomay ko Kawas kitaanan, ho ngaˈay kita tano sapafeli Ningra a sahinom, mihinom to tahalifaay to masamaamaanay pades a tamdaw’. (2 Korinto 1:3, 4) Mihaenay, wa pakaynien ni Yihofa cimaanan a mihadak ko sahinom hani?

9. Pakayni i ˈOlic 27:10 sinael, sasamanen ni Yihofa midimokos koya awaay ko sadipot no paro no lomaˈ a tamdaw hani?

⁹ O roma tamdaw o paro no lomaˈ anca salawina ko miˈodangay, hanaca cowa ka songilaˈen no wama wina midipot ko wawa mansa kaˈodangen no tao, mikiriwiˈay misaali to sahinom ko hatiniay a tamdaw. Mitiliday to ˈOlic ci Tafiti mafanaˈay to ngaˈayay tadiˈecen ci Yihofa, pafeliay to sahinom i tamdaw. (ˈOsien ko ˈOlic 27:10.) Pakasoˈlinay ci Tafiti to dadipoten ni Yihofa ko tahacadaay to pikariˈang a tamdaw. Sasamaan ko demak ni Yihofa hani? Pakaynien Ningra i madimadiay midoko Cingranan a tamdaw mihinom to mikaˈodangan a tamdaw. Malecaday o paro no lomaˈ ko salikaka i kasakopang. Na somowalay ci Yis, kalacafayay cingranan midofdof to araaw ni Yihofa a tamdaw o kaka, o safa, o wina ningra.—Matay 12:48-50.

10. Malengoay ni Pawlo samanay midemak cingra to ˈinorong no malitengay malohemay?

¹⁰ O kasakopang no Krisciyang malecaday o taˈangayay paro no lomaˈ. Tinakoen ci Pawlo, o malalokay madimadiay a malohemay malitengay, o ngaˈayay a taˈarawan no Krisciyang. Itini sakayat ni Yihofa, palimoˈotay ci Pawlo to roma Krisciyang mitodong cingranan, malecad o pitodong ningra ci Kristoan. (1 Korinto 11:1) Sinanoten samanay ci Pawlo midemak to ˈinorong no malohemay malitengay, sanay: “Yo itiraho kami i tamowanan i, samatiyaen niyam o pidipot no ina to wawa ko demak niyam a damsay a midipot tamowanan.” (1 Tisalonika 2:7) Anini, o madimadiay a malohemay malitengay mitodongay ci Pawloan, tano damsayay patadoay miharateng a waywayan  misaka dademak to sinael a mihinom to papadamaen a tamdaw.

11. Edeng o malohemay malitengay ko ngaˈay mihinom to mikaˈodangan a tamdaw han? Tadtaden hena.

¹¹ Edeng o malohemay malitengay ko ngangaˈay mihinom to mikaˈodangan a tamdaw han? Kahacecay ita o ‘papadotoc masasihinom’. (1 Tisalonika 4:18) O matenesay fafahiyan salikaka tataˈangay ko sadama to misaaliay to hahinomen. Itini Fangcalay Cudad, patinakoan ni Yihofa ko niyah to mihinomay to wawa a wina. (Isaya 66:13) Masowalay no Fangcalay Cudad ko pina fafahiyan mihinomay to tahapadesay a tamdaw. (Yopu 42:11) Latekay, mitahidang ko malohemay malitengay no kasakopang to matenesay fafahiyan salikaka padama to mikariˈangan a tamdaw. * Makahi ko fafahiyan Krisciyang mihinom to masomaday ko falocoˈ a tamdaw, maedeng mamahemek ci Yihofa pakaˈaraw!

12. Ano mihinom kita to tao i, sasinanoten ko manan hani?

¹² Ano mihinom kita to salikaka i, ano caka kahi cingra pasowal, hamaan lalicay han no mita. (1 Tisalonika 4:11) Hatiraay, sasamanen ita a mihinom ko misaaliay to sadama a tamdaw hani? Ngaˈay kita mikitini Fangcalay Cudad minanam samaan a mihinom to tamdaw, dotoc wa milengo kita to lima sapihinom a pakayraan.

13. Mikitini i saka 1 Hongti 19:5-8, samaanay padama ko coyoh ci Iliyaan? Samaan kita mitodong to taˈarawan no coyoh?

¹³ Ira ko ciepocay a sadama: Tiya milaliw ci Iliya i, tada matoleday ko falocoˈ, sakapatayaw sanay. Orato, miocoran ni Yihofa ko taˈangayay ko ˈicel a coyoh mihinom cingranan. O sadama noniya coyoh tada ciepocay, patadoan ningra ci Iliya mirahkad to kakaenen, pakalalok cingranan a komaen. (ˈOsien ko 1 Hongti 19:5-8.) Mitadtaday koniya maˈoningay to cecay kimad: Latekay, patado to tao midemak to kantangay a demak iraay ko sadama. Cecay ko kaen, mimingay sapatelong anca saparatoh a kato, ngaˈayay miadah to masomaday a salikaka. Ano pasangaren kita milengo tono tekedan a demak ato kasomadan a milifetan, wa ngaˈayho patado misadak to ciepocay sadama to tao.

14. Mikitini maˈoningay ni Iliya, mananamay ita ko maanan?

¹⁴ Parihadayen ko falocoˈ no masomaday a tamdaw: Wa ngaˈayho mikitini pipadama no coyoh ci Iliyaan, minanam kita to roma a kimad. Saka dademakan ni Yihofa ko ˈicel Ningra, padama ci Iliyaan romakat to mara:ayay a lalan, tahira i Horip a Lotok. Toniya maraayay pala, ˈayaw no pina soˈot miheca o katatelekan ni Yihofa to finawlan Ningra a pala, rihaday sanayto ko falocoˈ ni Iliya. Maliyasayto ko mamidokaˈ cingranan sanay ko harateng ningra. Mikitini mamananam ita, sapihinomaw to mikaˈodangan a tamdaw, salakat parihadayenho ko falocoˈ nangra. Tinakoen, mamisinanot ko malohemay malitengay, saparihadayaw to masomaday a salikaka, tayra i lomaˈ nangra malacafay minanom to ociya a masasowal, ikaka ko ngaˈay itini kasaˈopoan. Cowa ka lecad ko roma tamdaw, makalimay itini kasaˈopoan milengo to demak no niyah.

15-16. Samaan ko demak ita, o misinanotay a mitengil hani?

¹⁵ Misinanot a mitengil: Yakop 1:19 sanay: ‘Ka pisinanot mitengil, aka macaloh a pasowal.’ Wa samaan kiso a mitengil to sowal no tao hani? Harateng no roma tamdaw mitengil, tireng sa itihi no tao, minengneng cingranan, caka pasowal to maanan sanay. Kawra, misongilaˈ mitengil cowa ko pitengil aca. Tinakoen,  tiya pasowalen ni Iliya ci Yihofa to nano roray no niyah i, misongilaˈay ci Yihofa a mitengil. Cipinangay ci Yihofa to matalaway ci Iliya, matoˈolay, awaay ko kapo no kihcod a demak no niyah sanay. Orato, mihacecayan ni Yihofa ko saali ni Iliya a padama, misawacay to misongilaˈay Cingra a mitengil to sowal ni Iliya.—1 Hongti 19:9-11, 15-18.

¹⁶ Ano mitengil kita i, sasamaan paihkal to siniˈadaay a falocoˈ hani? Wa ngaˈay tano madaˈmaˈay a sowal paihkal to kaciharateng no mita. Ngaˈay mihaen ko sowal iso: “Matengil ko nalifetan iso masomaday kako, tada o mangilosay a waywayan konini.” Ngaˈayay hadaken ko pina salicay, misaˈosi to cipinangay ko niyah to sowal no tao, haenen ko sowal “Saka cipinangaw kako to harateng iso, ngaˈay padamaen iso kako han?” Anca “O sowal iso . . . mahaenay ko tatodong han?” O hatiniay a sowal ngaˈay mahapinang ningra, soˈlinay misongilaˈ kita a mitengil, saka cipinangaw to harateng ningra.​—1 Korinto 13:4, 7.

17. Ano mitengil kita i, hano pairaen ko mihadidiay falocoˈ, ‘aka macaloh a pasowal’?

¹⁷ Wa misinanot kita a mitengil, ‘aka macaloh a pasowal.’ Hamaan ketonen ko sowal no tao, haharateng sa a paini anca misalof to harateng nangra. Masakalimlaan ko pitafo to mihadidiyay! Tiya pasowalen ni Iliya ci Yihofa to harateng no niyah i, ora sowal ningra paihkalay to calemcemay cingra. Maharek ci Yihofa pakalalok ci Iliyaan, miliyaway tano malecaday a sowal ko paihkal ningra to harateng no niyah. (1 Hongti 19:9, 10, 13, 14) O maanan ko mananamay ita hani? Latekay, o masomaday a tamdaw cowa ko kinacecay aca pasowal to tao to harateng no niyah. Palecaden ita ci Yihofa mihadidi a mitengil, hamaan macaloh a paini to tao, paihkalen ko siniˈadaay a falocoˈ.—1 Pitiro 3:8.

18. Sasamaan kita a mitolon mihinom to masomaday ko falocoˈ a tamdaw?

¹⁸ Malacafay to masomaday tamdaw mingitangit mitolon: O pakidemay ko kasomad a tamdaw  pasangaray mitolon to Kawas, awaay ko tatodong ako miingid ci Yihofaan sanay. Ngaˈayay malacafay kita cangranan mitolon hanaca i satolon hadaken ko ngangan nangra. Ngaˈayho kita itini satolon somowal, tada misalimlaay kita cangranan, o kalimlaan a salikaka no kasakopang cangra. Ngaˈayay cangacangen ita ci Yihofa mihinom to kalimlaan a finawlan, parihaday to falocoˈ nangra. O mahaenay a satolon taˈangayay ko sahinom i tamdaw.​—Yakop 5:16.

19. Samaan ko demak ita, ngaˈ somowal to mihinomay a sowal hani?

¹⁹ Somowal to sapakalalok ato sahinom a sowal: ˈAyaw no somowal kita misaharateratengho, samanen o cowa ka simsimen a sowal midokaˈay to tao, kawra o sidaˈitay a sowal miadahay to falocoˈ no tao. (Taneng 12:18) Mihaenay, cacangacangen ita ko sadama ni Yihofa, ho ngaˈay kita tano sidaˈitay damsayay a sowal mihinom to tao. Hamaan matawal, tada ciˈicelay ko kimad ni Yihofa.​—Hipray 4:12.

20. Alatek samaanay ko harateng no mikaˈodangan a tamdaw? Sasamaan kita mihinom cangranan hani?

²⁰ Miharateng ko mikaˈodangan a tamdaw cikaditay ko niyah, awaay ko kapo, awaay ko mamaolah, anca awaay ko tatodong kaolahen no tao sanay. Cowa kahaen ko demak! Saka dademaken ita ko Fangcalay Cudad mihinom cangranan, ngaˈay maharateng nangra to maolahay ci Yihofa cangranan. (Nengnengen ko sapatongal lalakaw “ Mihinomay to Tamdaw a Sinael.”) Tiya malonay ci Taniil a masomad i, sidaˈitay ko coyoh a pakalalok cingranan. Makalimay ci Yihofa mafanaˈ ci Taniil, o kalimlaan a tamdaw cingra. (Taniil 10:2, 11, 19) Oya tada masomaday a salikaka kalimlaan sanay ko pinengneng ni Yihofa.

21. Noikor, oya cowa pasasiyor a tatiihay tamdaw wa samaan ko teloc hani? Anini mamisaˈicel kita midemak to maanan hani?

²¹ Ano hinomen ita ko tao o mamaharateng nangra to maolahay ci Yihofa cangranan. Hamaan mapawan kita, o masadafdafay a Kawas ci Yihofa, cowa ko papakomiraen Ningra ko miˈodangay to tao a raraw, oha sasayfangen Ningra ko cowa pasasiyor a tamdaw. (Saˈosi 14:18) Anini, mamisaˈicel kita a padama ato ciharateng toya mikaˈodangan a tamdaw. Noikor, sasongilaˈen ni Yihofa a miadah ko midokaˈan ni Satan ato hekal a tamdaw, mafanaˈ tonini tada misayaray kitaanan. Cato ka halafin, kihcod a roray cowato ko mamaharateng!​—Isaya 65:17.