1-2. (a) Aha do contoh na patuduhon na porlu do jolma diapuli jala boi mangapuli? (b) Aha do na mambahen dakdanak boi gabe mandele?

SUDE JOLMA, boi do mangapuli donganna na asing. Jala porlu do hita diapuli. Umpamana, tingki madabu sahalak dakdanak jala luka patna pintor dilului do natua-tuana huhut tangis. Somalna, pintor diapuli natua-tuana do dakdanak i, nang pe ndang pintor malum lukana i. Ra lambok do natua-tuana i manungkun, diapus iluna, dipatogu rohana, jala diubati. Lam leleng, ndang tangis be dakdanak i jala laho do muse marmeam. Di tingkina, malum do lukana i.

² Alai ndang sarupa luka na dihilala dakdanak i tu na dihilala dakdanak na gabe korban pelecehan seksual. Ra, boi do pelecehan seksual i masa sahali manang piga-piga hali saleleng martaon-taon. Alai, boi do gabe mandele dakdanak i alani i. Ra, dihukum do halak na mangulahon pelecehan seksual i. Alai dihukum manang na ndang, sai diingot dakdanak na gabe korban i do i sahat tu na magodang.

3. Songon na disurat di 2 Korint 1:3, 4, aha do na dihalomohon Jahowa, jala sungkun-sungkun aha do na laho taulas?

³ Molo adong halak Kristen na hea gabe korban pelecehan seksual tingki dakdanak jala sai hansit dope pangkilalaanna alani i sahat tu na magodang, aha do na boi mangurupi ibana? (Jaha 2 Korint 1:3, 4.) Taboto do, lomo do roha ni Jahowa asa dihaholongi jala diapuli angka naposona. Alani i, taalusi ma tolu sungkun-sungkun on: (1) Boasa ingkon diapuli  halak na hea gabe korban pelecehan seksual tingki dakdanak? (2) Ise do na boi mangapuli nasida? (3) Songon dia cara na denggan laho mangapuli nasida?

4-5. (a) Boasa ringkot taboto molo dakdanak ndang sarupa tu halak naung magodang? (b) Aha do na masa tu dakdanak na gabe korban pelecehan seksual di keluargana sandiri?

⁴ Halak na hea gabe korban pelecehan seksual tingki dakdanak, ingkon tongtong do diapuli nang pe naung martaon-taon i masa. Boasa? Pingkirhon ma, ndang sarupa dakdanak tu halak naung magodang. Tingki dibahen na so denggan ndang sarupa pangkilalaan ni nasida. Taulas ma piga-piga contoh.

⁵ Somalna, jonok do dakdanak tu keluarga na manarihon ibana. Pangkilalaan sisongon i mambahen dame rohana jala porsea tu sude halak na mangkaholongi ibana. (Ps. 22:10) Alai godangan halak na mangulahon pelecehan seksual i, i ma keluarga manang halak naung ditanda dakdanak i. On mambahen dakdanak i maol porsea tu manang ise pe, nang pe nunga leleng i masa.

6. Boasa jahat pelecehan seksual i?

⁶ Ndang boi dope dakdanak manjaga dirina sandiri. Jahat do pelecehan seksual i. Alana ndang diantusi dakdanak dope manang aha taringot hubungan seks. Alani i, molo dipaksa sahalak dakdanak mangulahon seks, boi do i mambahen ibana gabe trauma. Dakdanak na hea gabe korban pelecehan seksual, boi do gabe asing pingkiranna taringot seks. Olo do gabe ndang mararga dirina dihilala ibana jala gabe maol porsea tu na asing.

7. (a) Boasa mura dakdanak dioto-otoi, jala aha do gabus na didok tu dakdanak i? (b) Jala aha do pengaruhna tu dakdanak i?

⁷ Otik dope parbinotoan ni dakdanak. Ndang diboto nasida dope mambahen keputusan, mangida bahaya jala pasidingkon i. (1 Kor. 13:11) Alani i, mura do dakdanak dioto-otoi. Jotjot do angka na mangulahon pelecehan seksual margabus tu dakdanak i. Didok, dakdanak i do na sala. Jala didok do tu dakdanak i asa unang dipaboa tu manang ise pe. Alana molo dipaboa pe, ndang adong na olo porsea tu ibana. Manang didok ndang sala halak na magodang mangulahon seks dohot dakdanak, jala didok do muse alani holongna do i tu dakdanak i. Angka gabus i boi do manegai cara marpingkir ni dakdanak i saleleng martaon-taon. Dung magodang, olo do gabe ndang mararga be dirina dihilala. Jala didok rohana, ndang adong be na marholong ni roha tu ibana.

8. Boasa pos rohanta na boi do Jahowa mangapuli halak na mandele?

⁸ Taboto do, molo pelecehan seksual i sada hajahaton jala mambahen dakdanak i mandele saleleng martaon-taon. Godang ni pelecehan seksual patuduhon, molo hita nunga mangolu di ari parpudi. Godang halak saonari “ndang marroha holong” jala “lam tu jahatna ma angka parjahat dohot panipu”. (2 Tim. 3:1-5, 13) On ma sada cara ni Sibolis mambahen hita susa. Jala godang do halak gabe mangulahon angka na dihalomohon Sibolis. Alai ingot ma, umgogo do Jahowa sian Sibolis dohot angka na mangihuthon ibana. Diboto Jahowa do sude angkal ni Sibolis. Jala pos ma rohanta, diantusi Jahowa do pangkilalaanta ala mangadopi hasusaan. Lomo do rohana mangapuli hita. Las do rohanta ala manomba “Debata Sipangapul na sumurung. Diapuli Ibana do hita di saluhut sitaononta. Marhite apul-apul na tadapot sian Ibana, gabe boi ma hita mangapuli halak na asing na manaon sitaonon manang aha pe”. (2 Kor. 1:3, 4) Alai ise do na dipangke Jahowa laho mangapuli naposona?

9. Songon hata ni Raja Daud na disurat di Psalmen 27:10, aha do janji ni Jahowa tu halak na so dipardulihon keluargana?

⁹ Adong do dakdanak na gabe korban pelecehan seksual ala ndang dijaga natua-tuana manang na mangulahon pelecehan seksual i sian keluargana sandiri. Nasida do na tarlumobi ingkon diapuli. Si Daud na manurat psalmen, porsea do na tongtong do hita diapuli Jahowa. (Jaha Psalmen 27:10.) Porsea do si Daud, dijangkon Jahowa do halak na so dipardulihon keluargana. Songon dia Jahowa mangulahon i? Marhite angka naposona. Angka donganta di huria, dos do i songon keluarganta. Hea do didok Jesus, molo angka halak na manomba Jahowa, i do haha-anggina, ibotona, dohot omakna.​—Mat. 12:48-50.

10. Songon dia do apostel Paulus paboahon tugas ni sahalak sintua?

¹⁰ Di paragraf on dohot di paragraf na mangihut, taida ma songon dia huria Kristen i dipatudos songon keluarga. Sahalak sintua na ringgas jala na setia do apostel Paulus. Gabe sitiruon na denggan do ibana jala dijujui do na asing asa maniru ibana, dos songon ibana na maniru Kristus. (1 Kor. 11:1) Alai parrohahon ma aha na didok si Paulus taringot tugasna gabe sahalak sintua. Didok, “Lambok do hami tu hamu sude, songon sahalak ina na patarushon jala na burju manarihon poso-posona.” (1 Tes. 2:7) Saonari pe, ingkon lambok do angka sintua mangkatai tingki mangapuli angka dongan marhite angka ayat ni Bibel.

11. Asing ni sintua, ise do na boi mangapuli?

¹¹ Alai holan sintua do na boi mangapuli angka halak na hea gabe korban pelecehan seksual? Daong. Sude hita martanggung jawab do laho “masiapulan”. (1 Tes. 4:18) Angka borua di huria na togu parale-aleonna tu Jahowa, boi do mangapuli borua na hea gabe korban. Alana dipatudos Jahowa do dirina songon sahalak ina na mangapuli ianakhonna. (Jes. 66:13) Di Bibel pe, dipaboa do taringot angka borua na hea mangapuli halak na mandele. (Job 42:11) Tontu mansai las do roha ni Jahowa mangida angka borua na rade  mangapuli angka borua na mandele! Alai di situasi na asing, olo do dipangido angka sintua sahalak borua na togu parale-aleonna tu Debata asa mangapuli borua na hea gabe korban pelecehan seksual. *

12. Tingki laho mangapuli, aha do na ingkon taingot?

¹² Tontu, tingki mangurupi donganta na hea gabe korban pelecehan, unang ma tasungkuni molo ndang olo nasida paboahon sude na dihilala nasida. (1 Tes. 4:11) Aha do na boi taulahon laho mangurupi jala mangapuli nasida? Taulas ma lima cara na dipaboa di Bibel.

13. Songon na disurat di 1 Rajaraja 19:5-8, aha do na diulahon suru-suruan ni Jahowa laho patoguhon si Elia, jala aha do na boi tatiru?

¹³ Sarihon ma nasida. Sada tingki, hea do panurirang Elia lari martabuni ala adong na naeng mambunu ibana. Gabe metmet do rohana jala didok tu Debata tumagon ibana mate. Alai disuru Jahowa ma sada suru-suruan laho manjumpangi si Elia. Dipatogu suru-suruan i do roha ni si Elia. Dilehon do sipanganon tu si Elia jala disuru asa mangan. (Jaha 1 Rajaraja 19:5-8.) Sian cerita on, adong na boi taparsiajari. Nang pe ndang godang na boi tabahen, alai molo tasarihon angka dongan, on boi mangapuli rohana. Ra, boi do talehon sipanganon, hadiah, manang surat na marisi angka hata na patoguhon roha. Molo taulahon i, on mambahen pos roha ni nasida na tahaholongi nasida. Molo maol tahilala mangkatai taringot aha na dihilala nasida, taulahon ma aha na boi patuduhon na parduli do hita tu nasida.

14. Sian na masa tu si Elia, aha do na boi taparsiajari?

¹⁴ Tabahen ma dame pangkilalaan ni nasida. Ra, adong parsiajaran na asing na boi tadapot sian cerita taringot si Elia. Dipargogoi Jahowa do si Elia asa boi lari tu Dolok Horeb. Ra dung sahat disi, gabe dame do pangkilalaanna ala dao sian halak na naeng mambunu ibana. Jala disi do najolo Jahowa mambahen parjanjian tu halak Israel. Aha ma na boi taparsiajari? Molo naeng mangapuli halak na hea gabe korban pelecehan seksual, parjolo sahali ingkon tabahen do dame pangkilalaanna. Tingki laho mangapuli, ingkon dipingkirhon angka sintua do muse didia inganan na pas laho mangkatai tu nasida, di jabuna do manang di Bale Harajaon.

15-16. Aha do lapatan ni rade manangihon?

¹⁵ Rade ma manangihon. Didok di Bibel, “Ganup halak ingkon hatop manangihon, manat mangkatai.” (Jak. 1:19) Rade do hita manangihon angka dongan? Ra didok rohanta, rade manangihon lapatanna holan manangihon sambing, mangida halak na mangkatai jala ndang mandok manang aha. Alai ndang songon i. Umpamana, denggan do ditangihon Jahowa tingki dipaboa si Elia sude na di rohana. Diantusi Jahowa do boasa mabiar si Elia, lungun rohana jala hira na marisuang do sude na diulahon ibana. Diurupi Jahowa do si Elia asa boi pasidingkon pangkilalaan sisongon i. On patuduhon, na denggan do ditangihon Jahowa si Elia.​—1 Raj. 19:9-11, 15-18.

¹⁶ Tingki manangihon donganta mangkatai, songon dia do hita patuduhon holong? Sipata, boi do tadok hata na patoguhon rohana. Umpamana boi do tadok, “Dohot do ahu marlungun ni roha taringot na masa tu hamu. Ndang hurimpu masa i tu hamu!” Manang boi do dibahen hamu sungkun-sungkun laho patuduhon na diantusi hamu do aha na didokna i. Cara songon i, boi do mambahen nasida marpos ni roha na taantusi do aha na didokna i.​—1 Kor. 13:4, 7.

17. Boasa ingkon sabar hita jala manat mangkatai?

 ¹⁷ Ingkon manat do hita mangkatai. Carana, unang ma pintor mangkatai hita tingki mangkatai dope ibana. Alai sabar ma hita manangihon! Tingki dipaboa si Elia sude na di rohana tu Jahowa, lungun hian do rohana. Alai dipatogu Jahowa do si Elia. Hape hata naung hea didok do na didok muse tu Jahowa. (1 Raj. 19:9, 10, 13, 14) Aha ma parsiajaranna? Sipata, olo do mulak-ulak hata na didok halak na marmetmet ni roha. Alai songon Jahowa, ingkon sabar do hita manangihon nasida. Tumagon ma tapatudu holong dohot asi ni roha sian na pintor paboahon aha na ingkon diulahon nasida.​—1 Ptr. 3:8.

18. Boasa boi tarapul roha ni halak na marmetmet ni roha molo tatogihon ibana rap martangiang?

¹⁸ Rap martangiang ma dohot nasida. Halak na marmetmet ni roha olo do maol dihilala laho martangiang. Ra dirimpu ndang boi be nasida marale-ale tu Jahowa. Boi do taapuli nasida marhite manogihon nasida asa rap martangiang jala boi do tadok goar ni nasida di tangiang i. Tingki martangiang, tadok ma tu Jahowa na mansai holong do rohanta dohot angka dongan di huria tu donganta i. Tapangido ma tu Jahowa asa diurupi jala diapuli ibana. Tangiang sisongon i boi do mangapuli donganta na marmetmet ni roha.​—Jak. 5:16.

19. Aha do na boi mangurupi hita tingki naeng mangapuli donganta?

¹⁹ Pillit ma hata na denggan na boi mangapuli roha. Hata na asal didok boi mambahen hansit roha, alai hata na denggan boi mangapuli roha. Alani i, ingkon jolo tapingkiri do hata na laho tadok. (Poda 12:18) Pangido ma tu Jahowa asa hita boi marbisuk mamillit hata na denggan, na lambok, jala mangapuli roha. Alai ingot ma, hata ni Jahowa do na dumenggan laho mangapuli angka halak jala boi do i tadapot di Bibel.​—Heb. 4:12.

20. Aha do na olo didok roha ni angka halak na hea gabe korban pelecehan seksual, jala songon dia hita boi mangurupi nasida?

²⁰ Halak na hea gabe korban pelecehan seksual,  olo do didok rohana molo ibana nunga mardosa hian, ndang mararga be, jala ndang tama be ibana dihaholongi halak na asing. Gabus na mansai jahat do i! Alai boi do tapangke angka ayat di Bibel laho paboahon na mansai dihaholongi Jahowa do nasida. (Ida kotak “ Angka Ayat ni Bibel na Boi Mangapuli.”) Ingot ma pengalaman ni si Daniel. Tingki marmetmet ni roha ibana, adong sada suru-suruan na ro laho patoguhon rohana. Disuru Jahowa do suru-suruan i laho paboahon na dihaholongi Jahowa do si Daniel. (Dan. 10:2, 11, 19) Suang songon i ma, angka donganta na marmetmet ni roha i pe arga do di Jahowa!

21. Aha do na laho masa tu halak na mangulahon na jahat jala ndang olo marhamubaon, alai aha do na saonari ingkon tongtong taulahon?

²¹ Tingki taapuli dongan na asing, sarupa do i songon paboahon na holong do roha ni Jahowa tu nasida. Jala ingot ma, Jahowa i ma Debata hatigoran. Ndang adong na boi ditabunihon sian Ibana. Diboto Jahowa do sude halak na hea gabe korban pelecehan seksual. Jala laho uhumonna do angka halak na mangulahon na jahat jala ndang olo marhamubaon. (4 Mus. 14:18) Alai saonari, tongtong ma tapatudu holong tu angka dongan na hea gabe korban pelecehan seksual. Satongkin nai, salpuhonon ni Jahowa do angka hasusaan na dibahen Sibolis dohot portibi on! Tarapul do rohanta ala mamboto pangkirimon i. Tingki i, ndang ingoton be angka hasusaan na hea taadopi.​—Jes. 65:17.