1-2. (a) Rosai ḇefasnaiḇair snonkaku koine kofandun wos saneprei ma kona samambraḇ fa koḇuk sneprei? (b) Rosai ḇefrur fa romawa mkun ḇeḇeso sekandera?

SNONKAKU koine rofyor koḇeḇeaḇen ya kofandun wos saneprei ma kona samambraḇ fa koḇuk sneprei. Imnis raris, fafisu kobaḇa ya kofnak rawo kosapi ma wepur koḇedi ḇyepar. Na kokanes ḇo kosewar Awin ma Kamam su. Supok suḇuk pararei ḇeri ḇa, mboi suḇuk wos sneprei ḇe ko. Imbude sufuken rosai ḇeḇesya ya, supyos mkarui koḇena, suswar ma suyawos asuser ko, syadiwer na supyos mani ḇaido suparek wepur ḇepar koḇedi. Fyoroḇa mura, kokanes werḇa ḇo kofnak wer. Wepur ḇepar anya na iprei ro mankundi.

² Ḇape, fyorno ido romawa mkun sya sismai par ḇefrur siduf syadi wer. Ono sisya sifrur roi ḇeḇyeḇa yoḇ si. Sifrur roi ḇeradine yoḇ si ro rarwan oser ḇaido ro swaf taun ḇe taun. Nane nafrur fa sekandera kaku. Fyorno ido, ḇefrur roi ḇeḇyeḇa ansya sfor si ma sḇuk samamyai ḇe si. Mboi, onower sḇuk samamyai ḇe si ḇa. Sfor kwar snonkaku ansi kako ḇape romawa mkun ḇesmai roi ḇeḇyeḇa ansine sekandera kaker isof ro siba.

3. Imnis ḇekofen ro 2 Korintus 1:3, 4, rosai Yahwe imarisen na, ma fakfuken risai na kawos ya?

³ Naek ḇaido srar koḇesi oso sifrur roi ḇeḇyeḇa yoḇ i fafisu ibaḇa kaker ma ḇyekandera isof ro iba ido, moḇsa kofnoḇek i rai? (Wasya 2 Korintus 1:3, 4.) Kakuḇae, Yahwe imarisen insama manfamyan Ḇyesi sḇaḇir Iswar kaku si ma sismai sneprei sifandun na. Inja, mkorama kawos fakfuken rikyor skoine: (1) Rosai ḇefnai fa snonkaku sifrur roi  ḇeḇyeḇa yoḇ si fyor sibaḇa kaker sifandun wos sneprei? (2) Manseiso na ḇeḇuk sneprei ḇe si? (3) Moḇsa na koḇuk sneprei ḇe si rai?

4-5. (a) Rosai ḇefnai fandun fa koswarepen romawa mkun sya siḇesebur snonkaku ḇeba sya? (b) Romawa mkun sifrur roi ḇeḇyeḇa yoḇ si, moḇsa nane nawyae kayaryar sena faro snonkaku ḇesesya rai?

⁴ Snonkaku ḇeba kwar ono sisya sifrur roi ḇemnis ḇa yoḇ si fyor sibaḇa ya. Fyoro kwar ḇape sifandun kaker wos sneprei. Rosai ḇefnai ya? Insama kofawina, fandun fa koswarepen romawa mkun sya sima siḇese kaku ro ḇeba sya. Inja, nyan rariso roi ḇemnisḇa nane nawyae kankenem romawa mkun sya na neḇesebur snonkaku ḇeba sya. Kokarapan roi ḇeḇeso nane.

⁵ Romawa mkun sya sifandun fanamnam ma sikyar faro snonkaku ḇefarus ma ḇeswar si. Fanamnam ḇeradine nafrur fa simkak ḇa ma sikyar faro snonkaku ḇeswar si sya. (Mz. 22:9) Ḇape faḇye kaku, sifrur roi ḇeḇyeḇa yoḇ romawa mkun sya ro rum sena. Ma ḇefrur roi ḇeḇyeḇa nane iso kina sesi ma snonkaku ḇefanam kuker si. Roi ḇeradine isof ro taun taun ḇenande mura nafrur fa samswen ḇe si fa sikyar faro snonkaku ḇesesya.

6. Rosai ḇefnai fa roi ḇeḇyeḇa sifrur yoḇ romawa mkun sya nama naḇyeḇa kaku?

⁶ Romawa mkun sya sisambraḇ ḇa, ma roi ḇeḇyeḇa sifrur yoḇ si nama naḇyeḇa kaku. Sidif romawa mkun sya fa sifrur fararur farḇuk fyor umur sena namnis ḇaim ido, na nun samswen kaku ḇe si. Nane nafrur fa sna mamam ḇesasar ḇekur anenef fasfus ya. Smam kyof mankunsi, ma samswen fa sikyar snonkaku ḇesewar fa sfanam kuker si.

7. (a) Rosai ḇefnai fa napyan fa sifrowes ma sifrur roi ḇeḇyeḇa yoḇ romawa mkun sya, ma rosai na sifrur ya? (b) Rosai bon ro ankarkar sena?

⁷ Romawa mkun sya sna fawawi ḇemnis ḇaim fa skara, sun snemuk, ḇaido sifawi ma sḇinkwanbur roi ḇemun na. (1 Kor. 13:11) Inja, napyan fa sifrowes si ma sifrur roi ḇemnis ḇa yoḇ si. Snonkaku ḇefrur sasar romawa sya na sikofen ankarkar ḇeḇyeḇa kaku. Imnis raris, soḇe roi ḇeḇyeḇa sismai na snar sasar senairi. Oroḇaido sipok sikofen awer ḇe ḇesesya, ma fyor sikofen ido snonkaku osoḇaḇeri na ḇekyar faro si ḇaido ḇerower si. Oso wer ido, soḇo snonkaku ḇeba ono senef fus romawa mkun sya fa sfasnai siswaryae si. Ankarkar nane nawninyan kakara sena ma mamam sena faro rosai ḇenapes ro swaf kawan kaku. Siba muryas mboi sna swaruser ḇesasar kuker mankunsi, sḇaḇir sisren ḇa, ma sḇaḇir sisyus ḇa fa siswar si ḇaido sifnoḇek si.

8. Rosai ḇefnai fa kokyar kaku Yahwe na ḇyuk sneprei faro snonkaku ḇekandera sya?

⁸ Iso ḇefnai fa, roi ḇeḇyeḇa nane nun kandera kawan kaku. Nama roi ḇeḇarḇor kaku nairi! Snonkaku ḇefrur roi ḇeḇyeḇa ḇe romawa mkun sya sibor syadi wer. Nane nfasnai kokenem ro ras-ras ḇepupes na kwar, fafisu komam snonkaku ”sifawi saswar ḇa” ma fafisu ”ḇeḇarḇorsya ma ḇesararersya sikada nari sḇarḇor syadi”. (2 Tim. 3:1-5, 13) Setan nyan ḇyenane naḇyeḇa kaku, ma faḇye kaku snonkaku ḇebor sya sakfrur marisen ḇyena. Ḇape, Yahwe ima syambraḇ syadi ro Setan ma ḇeso i sya. Yahwe ifawi pyum Setan nyan-nyan ḇyena. Kokyar kaku Yahwe ifawi mnis kandera koḇena, ma ḇyuk  fafnoḇek kofandun na. Komarisen snar kofarmyan ḇe ”Allah ḇeḇuk samambraḇ sne faro snonkaku. Ḇyuk samambraḇ ro kosnesna, ro fafisu ḇaḇekandera kosma na, insa samambraḇ Allah ḇyuk maḇeko ani, ko kako koḇuk samambraḇ sne faro kawasa kam ḇesma marindisya”. (2 Kor. 1:3, 4) Ḇape, manseiso Yahwe ḇye si fa sḇuk wos saneprei ya?

9. Imnis Raja Daud wos ḇyena ḇero Mazmur 27:10, rosai nari Yahwe ifrur faro snonkaku kina sesi sifrur pyum si ḇa?

⁹ Ḇefandun syadi saneprei ya iso romawa sinan sesi sifandun si ḇa ḇaido romawa karyer sesi sifrur roi ḇeḇyeḇa yoḇ si. Manḇefas Mazmur, Daud ifawi Yahwe I monda na kokyar faro I fa ḇyuk sneprei ya. (Wasya Mazmur 27:10.) Daud ikyar Yahwe na ḇye Kma faro snonkaku kina sesi sifrur pyum si ḇa. Rariso Yahwe ifrur na rai? Roro manfamyan Ḇyesya ḇesoasuser. Naek srar ḇero sidang sya simnis ra kina koḇesi. Imnis raris, Yesus ikofen snonkaku ḇefrur Yahwe marisen Ḇyena siso manbesrar, imbesrar, ma sna ḇe i.​—Mat. 12:48-50.

10. Rariso Manwawan Paulus fyasnaiḇair fararur ro penatua si?

¹⁰ Na kawos rariso sidang imnis ra kina oso. Manwawan Paulus ima penatua ḇefararur marḇak ma ḇesoasuser. Fyasnai nyan ḇepyum, ma Allah fyarkin i fa danun ḇe snonkaku ḇesesya fa sakso nyan ḇyedi raris iso Kristus i kwar. (1 Kor. 11:1) Komam kada rariso Paulus fyasnaiḇair fararur ro penatua fyor ikofen, ”Nkoḇeaḇaḇen mko, imnis sna oso fyarus ma fyaduru romawa ḇyedi.” (1 Tes. 2:7) Baboine, penatua ḇesoasuser sya sawos aḇaḇen fyor sḇuk sneprei roro Refo ya faro ḇefandun fafnoḇek sya.

11. Rosai ḇefasnaiḇair penatua sya monda ḇa na ḇeḇuk sneprei faro snonkaku ḇekandera snar sifrur roi ḇeḇyeḇa yoḇ si?

¹¹ Penatua sya monda ke na ḇeḇuk sneprei faro snonkaku ḇekandera snar sifrur roi ḇeḇyeḇa yoḇ si? Oroḇa. Kokame  kona fakamamar fa ’koḇuk snepreiyae’. (1 Tes. 4:18) Imbesrar Kristen ḇemas kwar ro rur ya na sisambraḇser imbesrar ḇefandun fafnoḇek sya. Iso ḇefnai fa Allah Yahwe ḇyukimnis mankundi kuker sna ḇeḇuk sneprei ḇe romawa ḇyedi. (Yes. 66:13) Refo ya iser fawar ḇekur ḇar bin sya ḇeḇuk sneprei faro ḇekandera sya. (Ayb. 42:11) Yahwe na imarisen kaku fyor myam bin Kristen ḇero baboine sya sḇuk wos sneprei faro min sesi ḇeḇekandera sya! Fyorno ido, penatua sya na sor imbesrar ḇemas kwar oso fa ifnoḇek imbesrar ḇese ḇekandera ya. *

12. Rosai na kopok kofrur awer na?

¹² Kakuḇae, fyor koḇe kofnoḇek naek ḇaido srar koḇesi ido fandun fa kosasor ko insama kofuken awer roi simewer sfawar na. (1 Tes. 4:11) Inja, rosai na kofrur faro snonkaku ḇefandun fafnoḇek ma sneprei sya? Mkorama kawos nyan ḇepyum ririm fa koḇuk sneprei ḇe si.

13. (a) Imnis wos ḇero 1 Raja 19:5-8, Yahwe iwan malaikat oso fa ifrur rosai faro Elia i? (b) Rariso kakfrur raris malaikat ani rai?

¹³ Kofrur roi oso fa kofnoḇek ḇekandera sya. Fafisu Elia ifrarbur snonkaku ḇesewar fa ḇemun i sya, ḇyesanekar rawo imbe imar mura. Yahwe iwan malaikat ḇesambraḇ oso fa myamfar nabi ḇesanekar ine. Malaikat ani fyasos rosai Elia fyandun na. Isoine ḇyuk ḇe Elia roḇean ḇesam ma ikofen myaren ḇe i fa dan na. (Wasya 1 Raja 19:5-8.) Farfyar ine fyarkor ko farkarkor ḇefandun kaku ine: Fyorno ido roi kasun kofrur na nḇuk fafnoḇek ḇeba faro ḇefandun sya. Insama kofasnai koswar ma kofandun naek srar koḇesi na koḇuk roḇean, roi sfandun na, ḇaido kofas syapram ḇeser wos samaraḇraḇ ḇe si. Samswen ḇe ko fa kawos roi ḇekursi na ma sneḇaḇir sena ido, na kofasnai pdef koswar si kuker kofrur roi ḇeyun fainda faro si.

14. Farkarkor rosai wer kun ro fawar ḇekur Elia i?

¹⁴ Kofrur fa siknone ma sismai payamyum. Kaksmai farkarkor ḇese wer ro fawar ḇekur Elia i. Kuker mujisat Yahwe ḇyuk rosai nabi Elia fyandun na fa ifrur marandan ḇekwan ḇe Bon Horeb. Imbude Elia ismai payamyum ro moḇ ḇeḇinkwan ine, iso moḇ Yahwe ifrur asas kuker kawasa Ḇyesi ḇepon iwara. Ḇyaḇir rarirya snar ḇyinkwanbur snonkaku ḇesewar fa ḇemun i sya. Rosai farkarkor ya ḇe ko? Koḇe kofnoḇek snonkaku sifrur roi ḇeḇyeḇa yoḇ si ido, randak ya kofrur fa siknone. Imnis raris, fandun fa penatua siswarepen imbesrar ḇekandera oso na iknon ma ismai payamyum syadi fafisu skokain ro rum ḇyedi, skinem tei ḇo fyawar kuker si ḇardibur skofawar ro Balai Karajan. Ḇeseya wer ḇyaḇir rarirya ḇa.

15-16. Moḇsa na korower pyum si rai?

¹⁵ Korower pyum si. Refo ḇyuk ananun ine, ”Mkosamberen famkomnaf, ḇape mkowawos . . . fasaw awer.” (Yak. 1:19) Koisya korower pyum si ke? Imbude kokara korower pyum kwar fafisu komam yoḇ snonkaku ḇeyawos kuker ko ḇo kawos wos osoḇaḇeri. Ḇape kaku ya rarirya monda ḇa. Imnis raris, rofyor Elia ikofen roi ḇero sneri, Yahwe ryower pyum kaku i. Yahwe ifawi Elia isya imkake, ḇyabir ḇyero mankundi, ma kyara roi ifrur na nefrormo monda. Yahwe kuker saswar ifnoḇek Elia i fa nya kakara ḇepyum. Yahwe fyasnaiḇair kaku ḇe Elia i isya ryowerepen i.​—1 Raj. 19:9-11, 15-18.

 ¹⁶ Rofyor korower pyum snonkaku oso ido, moḇsa kofasnai sawarwar ma ḇaḇaḇir oser rai? Fyorno ido, wos kokara pyum na, nek ro kosnesna nefasnai moḇ koḇaḇir raya. Imbude na kokofen, ”Yaswar au ra fyor yafawi roi ḇekur Aunya! Roi sifrur nane naḇyeḇa kaku!” Oroḇaido koḇuk fakfuken oser ke suru infa kofawi mnis kaku min ḇekandera ine wos ikofen na. Wos kokofen kuker sawarwar ḇeradirya nafrur fa ikyar koisya korower pyum i, ma kosewar fa kofawi mnis roi ḇekur i na.​—1 Kor. 13:4, 7.

17. Rosai ḇefnai fandun fa koḇekaḇaḇaḇ ma ’kowawos fasaw awer’?

¹⁷ Ḇape, fandun fa kosasor ko insama ’kowawos fasaw awer’. Kosunuk awer wos ḇyena fa koḇuk ananun ḇaido kosonek nyan kakara ḇyedi. Fandun fa koḇekaḇaḇaḇ! Fafisu Elia ikofenḇair ḇe Yahwe rosai ḇyaḇir na, wos dawos na nfasnai ḇyekandera ma ḇyesaneso kaku. Mura, Yahwe syambraḇser Elia kakyar ḇyedi. Elia ikofenḇair wer sneḇaḇir ḇyedi kuker dap kaḇer wos ḇemnis. (1 Raj. 19:9, 10, 13, 14) Rosai farkarkor ya? Fyorno ido, snonkaku ḇekandera sya fandun fa sfawar rosai sḇaḇir na ro rarwan oser monda ḇa. Raris Yahwe I, komarisen korower kuker kaḇaḇaḇ. Kokofen awer rosai fandun fa sifrur ya, mboi ipyum syadi kofasnai sawarwar ma kona ḇaḇaḇir oser kuker si.​—1 Ptr. 3:8.

18. Rariso nadi koḇena nḇuk sneprei faro ḇekandera sya?

¹⁸ Koḇenadi kuker sne ḇesiper fnoḇek snonkaku ḇekandera sya. Snonkaku ḇekandera oso na samswen fa ḇyenadi. Na ḇyaḇir isyus ḇa fa ḇyenadi ḇe Yahwe I. Imbe kofnoḇek i ido, koḇenadi kayam kuker i ma kap snonsnon ḇyedi. Kokofenḇair ḇe Yahwe snar ko ma naek srar ḇero sidang koswar i kaku. Na kor ḇe Yahwe fa ifnoḇek manfamyan Iswar kaku ine insama  imkak ḇa ma ismai payamyum. Nadi ḇeradine nun sneprei kaku ḇe i.​—Yak. 5:16.

19. Rosai kofrur ya fyor imbe koḇuk sneprei ḇe snonkaku oso?

¹⁹ Kokinfir wos samaraḇraḇ ma ḇeyun sneprei. Kokara resari wos imbe kawos na. Wos kokara ḇaim na, nari nafrur duf ḇerower sya sisnesna. Imbape, wos ḇepyum nari nun pararei. (Ams. 12:18) Inja, koḇenadi kor ḇe Yahwe fa ifnoḇek ko fa kawos wos ḇepyum ma ḇeyun sneprei. Koswarepen wos ḇeyun sneprei kaku iso Yahwe wos Ḇyena ḇero Refo ya.​—Ibr. 4:12.

20. Snar naek srar ḇeḇeso sifrur roi ḇeḇyeḇa yoḇ si ro fafisu iwara, rosai sḇaḇir na, ma rosai komarisen insama siswarepen na?

²⁰ Naek srar ḇeḇeso sifrur roi ḇeḇyeḇa yoḇ si ro fafisu iwara na sḇaḇir sima sisren ḇa, sfandun si ḇa, ḇaido sipok siswar si ḇa. Nane nkaku ḇaḇeri! Inja, koḇuk mnuk-mnuk ḇero Refo fa koḇukiswarepen si snar sima seḇemaeja kaku ro Yahwe ḇarpon Ḇyedi. (Mam kotak ”Wos Sneprei ḇero Refo”.) Fafisu Daniel ḇyaḇir syambraḇ ḇa ma iryarḇa kwar, malaikat oso ryama fa syambraḇser i. Yahwe imarisen Daniel ifawi snar Yahwe ima iswar kaku i. (Dan. 10:2, 11, 19) Rarirya kako, naek srar koḇesi ḇekandera sya sima Yahwe iswar kaku si!

21. (a) Snonkaku ḇefrur sasar ḇemewer ḇembror ḇa sya rosai nari sismai ya?

²¹ Rofyor koḇuk sneprei ḇe ḇesesya, kofnoḇek si fa siswarepen Yahwe iswar si. Ma fandun fa koswarepen kako Yahwe ima Allah ro ḇaḇenanapes. Snonkaku sya na sifawi ḇa mboi Yahwe ifawi rofyor snonkaku sifrur roi ḇeḇyeḇa yoḇ ḇesesya. Yahwe myam nakam, ma nari ḇyuk samamyai faro snonkaku ḇefrur sasar ḇemewer ḇembror ḇa sya. (Bil. 14:18) Isof ro fafisu ya, mkorama kofasnai saswar faro snonkaku ḇekandera snar sifrur roi ḇeḇyeḇa yoḇ si. Osower ido, Yahwe nari ḇyuk pararei ḇekain fyoro ḇe snonkaku ḇesmai roi ḇeḇyeḇa ro Setan ma dunya ḇyedine. Saneraro ine ḇyuk sneprei kaku! Kero wer, kandera nanekam nari neḇepyos ḇeri ro swaruser ma sne koḇena.​—Yes. 65:17.