1, 2. a) Ka hénpulu arufudubalin agüriahóua wamá lau iyarani lun weresibirun gurasu luma lun wíchugun? b) Ka wuribani hasufurirubei fiu irahü?

LAU megei wamá gurasu wagüriahóua luma lau iyarani lun wíchugun gurasu. Kéiburi, dan le láhureruña lan aban irahü, aba léiguadun, aba láhiachun ligachürügü, aba léibaagun ayahuaheina áluahei lúguchi o áluahoun lúguchu. Íbini siñá lan hareidaguagüdüni, gayaraati híchugun gurasu lun. Aba hálügüdaguni ka lan mégeibei, ani aba haragahani láguira, óubura haméi ani aba hayanuhan luma lau ínsiñehabuni, másiñati aba lan hagaranihan lun. Ábati mayahuahaali lan irahü ani gayaraati ábaya lan lidin áhurera. Lau lásügürün dan aban lareidagun hiyati ligía.

² Gama lumoun añahein irahüñü súfuritiña aban buleseiti le hanarimeti ligari. Añahein hádangiñe adügǘwati iwiyei hau, aban lan yebe wéiyaasu lidan habagari o saragu wéiyaasu. Furumiñeguarügü lídangiñe gayaraati aban lan buleseiti le abuleseirubarun hanigi. Anihein dan ragüwatiña ha adügübalin wuribani le ani aba hafayeirun luagu le hadügübei ani ha híbiri aba hanurahan luéi harügüdǘn. Íbini lafayeirun le gadurunbei luagu le ladügübei. Añaheingua ha únbaña ladügǘwa wuribani asufurira íbini wéinamugaaña lan.

3. a) Kei larufuduni 2 Korintuna 1:3, 4, ka labuserunbei Heowá? b) Ka álügüdahani lunbei wóunabuni?

³ Kaba íderaguei aban Kristiánu le unbei ladügǘwa iwiyei dan meha le irahügili ani aniheingua asufurira lárigiñe le asuseredubei lun? (Aliiha huméi 2 Korintuna 1:3, 4). Furanguti busén lan Heowá lun larufudún ínsiñeni houn lubúeingu luma lun lichugún gurasu le hemegeirubei houn. Ligíati, ariha waméi óunabagülei lun ǘrüwa álügüdahani le lunbei liabin: Ka uagu mégeiwa lubéi lun lichugún gurasu houn ha ouserúabaña wuriba dan meha le ñǘbürigiña? Kátaña lúnbaña híchugun gurasu houn?  Ani, ka lunbei wadügüni lun wíchugun gurasu houn?

4, 5. a) Ka uagu súdiniti lubéi lasubudirún amu hamá irahüñü hawéi wéinamugaaña? b) Ka lánibei houserún irahüñü wuriba luagu hafiñerun hawagun amu gürigia?

⁴ Añahein gürigia ouserúatiña wuriba dan le ñǘbürigiña ani mégeimemegiña lun lichugún gurasu houn íbini sügühali lan saragu irumu. Lun gunfurandawa lan ka lan uagu, furumiñe mosu waritaguni luagu amu hamá irahüñü hawéi gürigia wéinamugaaña ani lidan liibe-agei kesi ámuñegueinarügüti luriban hasandiragun houngua lárigiñe wuribani le adügǘbei houn. Ariha wamá fiu resun.

⁵ Mégeitiña irahüñü lun hasandiragun houngua chóuruñu harugabu ha agüriarubaliña luma hama ha óunigirubaliña. Adügati katei le, lun hasandiragun houngua chóuruñu ani furendeitiña afiñera hawagu gürigia ha hínsiñehabubaña houn (Sal. 22:9). Ma lirun, saragu lídangiñe wuribani le adügǘbei houn irahüñü múnadagiñeti, ani ha adügübalin, haduheñu ha yarafabaña houn o hamadagu haduheñu. Ka asuseredubei dan le leferidiruni irahü lafiñen luagu somu gürigia? Gayaraabei ladügün lun hénrengu lan lun irahü lafiñerun hawagu amu, íbini anhein sügühali lubéi saragu dan.

6. Ka uagu hanarime lubéi luriban iwiyei le adügǘbei hau irahüñü?

⁶ Irahüñü ménrengunbaña lun ladügǘn iwiyei le hau ani hanarimeti luriban. Lidan kesi le, maranserungiña irahüñü lun gufuranda hamani ka lan mini lubéi maríei luma agamariduni. Gadei lumuti iwiyei le adügǘbei hau irahüñü ligaburi harihini agamariduni, ligaburi hasaminan luma lun mafiñen hamá hawagu gürigia ha ayarafadubaña houn.

7. a) Ka uagu ménrengun lubéi lun le adügübei wuribani lun aban irahü lun leyeeduni, ani ida liña leyeeduni? b) Ka lanügübei iyeeni ligía?

⁷ Masaminarungiña irahüñü sunsuinagubei luagu lunti lan hadisedun luéi denchaü (1 Ko. 13:11). Ligía ménrengun lubéi lun le busenbei ladügün wuribani leyeedun aban irahü. Aba lariñagun iyeeni lun le gayaraabei ladügün saragu dañu lun, kei burí luagu ligía lan gadurunbei luagu le asuseredubei, lunti lan lámanichun, maganbun habéi lan ni aban, mafiñenbaña lan lun anhein lariñaga houn amu, o dan le lan hagamaridun gürigia wéinamugaaña aban irahü harufuduñein lan hínsiñehabu lun. Le ladügübei iyeeni le, sun irumu le lunbei lásügürün, úabei gunfuranda lani le asufurirubei iyeeni lan sun lira. Gayaraati laweiridun irahü asaminareina wiye lan, mouni lan lun ni kata ani madüna lan lun hasandirun gürigia gudemehabu luagu ni lun hínsiñewa lan.

8. Ka uagu gayara lubéi wachoururuni gayara lan líchugun Heowá gurasu houn ha asufurirubaña?

⁸ Lau sun lira, maweiriduntu wanigi luagu adüga lan iwiyei le adügǘbei hau irahüñü wuribani houn luagu saragu dan. Aban duru hanarimeti luriban. Lau anihein lan saragu kesi lau libe wuribani le, arufuda lumuti wawinwanduña lan lidan lagumuhóun dan, lidan aban dan le ídabei “mínsiñehabubaña” lan gürigia ani “ánhaña ha wuribabaña hama ha geyeehadibaña, haribadatimaba” (2 Tim. 3:1-5, 13). Hanarimeti turiban lisadaran Mafia ani híruti adüga hamani gürigia le hínsiñebei lun. Gama lumoun, héretimati Heowá sügǘ luéi Satanási ani sügǘ hawéi gürigia ha adügübalin le ladügübei wágani. Subudi lumuti Bungiu buidu ida luba lan ladüga. Ligíati, gayaraati wachoururuni luagu ariha lani sun igarigu le wasandirubei ani gayara lan líchuguni gurasu le wemegeirubei. Wéiriti wagundan lau weseriwidun lun Bungiu “ani aranseñu liña lun líchugun gurasu woun súnwandan. Ruti giñe dǘgüdaguaü woun lidan sun wasufurirun, lun giñe gayara lan wafurendeirun ida luba lan gayara lan wíchugun dǘgüdaguaü houn amu ha asufurirubaña, lídanmeme luwuyeri igaburi le líchugubei woun” (2 Ko. 1:3, 4). Ka layusurubaña Heowá lun líchugun gurasu woun?

9. Según le labürüdübei urúei Dawidi lidan Sálumu 27:10, kaba ladüga Heowá hawagun ha hágurubaña haduheñu?

⁹ Másiñati sandí hamá gürigia ha madügünbaña hagübürigu ni kata lun hóunigiruniña luéi wuribani o ha asufurirubaña wuribani hámagiñe ha yarafatimaabaña houn megei hamá gurasu espechaliti. Subudi lumuti meha urúei Dawidi Heowá lan buídutimabei lun líchugun gurasu woun (aliiha huméi Sálumu 27:10). Afiñeti meha luagu leteniruba lan Bungiu lau ínsiñehabuni houn ha hágurubaña haduheñu. Ida liña líchugun Bungiu gurasu houn? Lau layusuruniña lubúeingu ha úaraguabaña. Waduheñu lílana damuriguaü. Ariñagati Hesusu ha lan áhuduragubaña lun Bungiu úara luma líbirigu lan ani lúguchunu (Mat. 12:48-50).

10. Ida liña labahüdahani Pábulu le ladügübei keisi wéiyaali lidan afiñeni?

¹⁰ Ariha wamá aban sügǘ luagu katei le lidan damuriguaü. Aban meha wéiyaali lidan afiñeni Pábulu le íchugubei aban hénpulu buiti, nadagimein ligía lau ubebeni luma lau úaraguni. Darí lun ladügün Bungiu lun lariñagun houn kristiánugu: “Áyeiha humana keisi náyeihani Kristu” (1 Ko. 11:1). Lidan aban ókaasion, abahüdaguati Pábulu luagu le ladügübei kei wéiyaali lidan afiñeni: “Óuserarügütiwa keisi irahüñü haganagua, keisi aban úguchuru to agüriahabaliña tirahüñü, góunigitaña” (1 Tesa. 2:7). Ayanuhatiña giñe wéiyaaña ha úaraguabaña, ha lídanbaña wadaani, lau ínsiñehabuni dan le hayusurunu Bíbülia lun híchugun gurasu houn ha asufurirubaña.

11. Ka arufudubalin mámarügüñanu lan wéiyaaña lidan afiñeni gayara híchugun gurasu?

¹¹ Mámarügüñanu wéiyaaña lidan afiñeni gayara híchugun gurasu houn ha asufurirubaña. Sun wagía lunti wasigiruni adundehani le: “Ru humá lubeiti gurasu húniwagua” (1 Tesa. 4:18). Gayaraati híchugun íbirigu würiña ha derebugubei hafiñen gurasu houn amu íbirigu würiña ha emegeirubalin. Ani ariñagati Heowá luougua ítara liña lan kamá aban úguchuru to ámalihabalin tiráü (Isa. 66:13). Anihein abahüdaguni tidan Bíbülia hawagu würiña ha íderagubaliña ha nidiheribaña (Hob. 42:11, TNM). Gúndaati Heowá larihiniña kristiánugu würiña íderaguaña íbirigu würiña ha asandirubaña aban lanarime igarigu tidan hanigi. Lidan fiu kesi, gayaraati  hálügüdünün wéiyaaña lidan afiñeni aban íbiri würi, tábuguarügü, to derebuguti tafiñen anhein gayara lubéi tíderagun aban íbiri to asufuriruboun. *

12. Ka lunbei madügün wamani dan le wíderaguniña íbirigu?

¹² Inarüni, dan le lan wíderaguniña íbirigu, lunti málügüdagun wamaniña luagu katei le uágubei mabusenrun hamá hadimurehan (1 Tesa. 4:11). Ligíati, ka gayaraabei wadügüni hawagu ha emegeirubalin luma hawagu ha busenbaña heresibirun gurasu? Ariha wamá seingü adundehani tídangiñeti Bíbülia.

13. a) Según 1 Urúeigu 19:5-8, ka ladügübei lani Heowá ánheli luagu Elíasi? b) Ida luba wáyeihani le ladügübei ánheli?

¹³ Ru wamá ídemuei le ménrengunti. Dan le lanurahanbei profeta Elíasi ladüga lídanñein lan denchaü libagari, aba maguraasunhali lan darí lun labusenrun lun lounwen. Aba lóunahan Heowá aban ánheli gabafuti lun líchugun gurasu lun. Aba líchugun ánheli le éigini sǘgili lun profeta ani aban lariñagun lun lun leigin (aliiha huméi 1 Urúeigu 19:5-8). Arufudahati abahüdaguni le woun aban katei súdiniti: anihein dan, láurügü wadügün aban katei le ménrengunti gayaraati wíderaguni aban íbiri le asufurirubei. Lau wíchugun éigini, aban liraüraü idewesei, aban tiraüraü gárada lau abürüdǘni tachoururagüdübei lun hínsiñe lan woun ani berese wamá lau. Gayaraabei wadügüni katei le anhein masandiragun wabéi woungua buidu lun wayanuhan luagu le asuseredubei lun gürigia o le gáribei lun.

14. Ka amu katei wafurendeirubei lídangiñe abahüdaguni luáguti Elíasi?

¹⁴ Adüga wamá lun chouru lan hasandiragun ha asufurirubaña ani buidu ligíame hasandiragun houngua. Giribu wamá lumoun abahüdaguni luáguti Elíasi. Ruti Heowá erei lun lau aban milaguru lun gayara lan léibuguni limigifen üma le lunbei lanügüni darí wübü Orebü, le ñein lunbei meha ladüga Bungiu daradu hama lumutuniña saragu sígulu lubaragiñe dan ligía. Másiñati aba lan lasandiragun Elíasi lungua lidan fulasu díseti ligía séfuñu dise hawéi ha busenbaña háfaruni. Ka amu katei wafurendeirubei? Anhein busén wabéi wíderaguniña ha asufurirubaña ladüga houserún wuriba, furumiñe mosu wadügün lun buidu lan hasandiragun woungua. Kéiburi le, mosu gabaroun hamani wéiyaaña lidan afiñeni ámuñegueinarügü lan ligaburi hóunabun gürigia. Másiñati buídubei lan tasandiragun aban íbiri tungua ani chóuruñu lau tatun aban kopu ti o gafe túbiñe, ánhaña amu himei hamagili hayanuhan tidan Luban Wadamuridagun.

15, 16. Ka lílabei gíchigadi wamá arigei?

¹⁵ Ru wamá arigei. Ru tumuti Bíbülia adundehani furanguti le woun: “kada aban hídangiñe lunti aranseñu lan lun laganbun, gama lumoun lunti hámaru lan lun ladimurehan” (Sant. 1:19). Subuditi san woun ida luba lan wíchugun arigei? Gayaraati wasaminarun le lan lunbei wadügüni lun wíchugun arigei láurügü lan werederun deregüdagu, waríaguni le ayanuhabei wama sin wariñagun ni kata. Gama lumoun, mámarügübei le wadüga. Ariha waméi le ladügübei Heowá lun Elíasi. Aganba lumuti Bungiu Elíasi dan le labahüdahabalin Elíasi sun lidiheri lun luma le lasandirubei. Aba líchugun Bungiu fe hanufude lan Elíasi ani sandigua lan lungua lábuguarügüñein lan ani samina ligía sun lan le ladügübei mouni lan lun ni kata. Lau ínsiñehabuni aba letenirun Heowá lun kada aban lídangiñe idiheri le lasandirubei lani profeta. Ítara liña larufuduni luagu berese lan lau le labahüdahabei lun (1 Uru. 19:9-11, 15-18).

¹⁶ Sunme awanha lan aganbahaña ha ouserúabaña wuriba, ida luba warufuduni wínsiñehabu  luma gudemehabu le wasandirunbei hawagu? Anihein dan, gayaraati ladügün dimurei le saminawati buidu lun larufuduni berese wamá hau ha asufurirubaña. Gayaraabei wariñagun: “Sarí numuti le asuseredubei bun. Marichati ni aban lun ladügüni lanarime wuribani le lun aban irahü”. Ani lun wachoururagüdüni luagu gufuranda wamani buidu le labahüdahabei woun, gayaraati wamuriaha luma lun líderaguniwa lun gufuranda wamani buidu le lariñagubei woun lau wariñagun lun: “Dan le babahüdagubalin le nun, aba gufuranda nani..., ítara liña san?”. Libe burí dimurei le larufudubei lau ínsiñehabuni, wíchuguña lan arigei lun le lariñagubei, ani wáfaaguña lan lun gunfuranda wamani (1 Ko. 13:4, 7).

17. Ka uagu lunti lubéi gaguraasun wamá ani ‘hámaru wagíame lun wadimurehan’?

¹⁷ Ani guentó duari wamá lidan lóurate wóunabun. Madüraagua waméi liyanun gürigia, lúnrügü wíchugun adundehani lun o lúnrügü wariñagun chará lan. Gaguraasunrügü wamá. Dan le lariñagunbalin Elíasi sun le lasandirubei lun Heowá aba lariñaguni sun le adiheridagüdübalin. Ani lárigiñe lederebudagüdüni Heowá lafiñen, ábaya lariñaguni Elíasi ligiaméme (1 Uru. 19:9, 10, 13, 14). Furendeitiwa lídangiñe le añahein lan gürigia ha gáribei hasandirunu hanigi lárigiñe wuribani le adügǘbei houn busén hamá habahüdaguni le asuseredubei houn lóugiñe aban wéiyaasu. Lidan kesi le, lunti gaguraasun wamá dan le waganbuniña ítara kei meha ladügüni Heowá. Máluga wamá lun waransehani katei, le lunbei wadügüni lun warufudun gudemehabu luma ínsiñeni (1 Fe. 3:8).

18. Ka luwuyeri furíei gayaraabei líchugun gurasu houn ha asufurirubaña, ani ka uagu?

¹⁸ Furíei wamá tídangiñe sun wanigi hama ha asufurirubaña. Gürigia ha hanarimebei hiru másiñati manigi hamá lun hafurieidun. Háfuga sandiguatiña houngua madüna hamá hayarafadun lun Heowá. Anhein busén wabéi wíderaguniña, furíei wamá hama lau wayusuruni hiri. Ariñaga wamá lun Heowá hínsiñe hamá woun saragu, dandu wagía kei lílana damuriguaü. Ayumuragua wamá lun Heowá lun lagalumaruni igarigu le hasandirubei lubúeingu ha hínsiñebaña lun. Gayaraati ábanbei lan lanarime dǘgüdaguaü libe burí furíei le (Sant. 5:16).

19. Kaba íderaguawa lun waranserun luba wíchugun dǘgüdaguaü houn amu gürigia?

 ¹⁹ Anúadira wamá dimurei le gayaraati lareidaguagüdün ani ru ligía dǘgüdaguaü. Samina wamá lubaragiñe wayanuhan. Abuleseihati dimurei gáriti, gama lumoun ha hínsiñehabubaña areidaguagüda hamuti gáriti lau lubuidun dimurei le hariñagubei (Ari. 12:18). Ligíati amuriaha wamá luma Heowá lun líderaguniwa adarira dimurei lánina ínsiñehabuni le ruti darangilaü ani areidaguagüdalei le gáribei lasandirunu lanigi. Haritagua waméi dimurei lan le tídanbei Bíbülia ligía lan dimurei gabafutimabei, ladüga lúmagiñe lan Bungiu liabin (Ebü. 4:12).

20. Ladüga wuribani le súfuri hamaalibei, ka gayaraabei hachoururuni ha asufurirubaña, ani ka busén wabéi lun haritaguni?

²⁰ Ladüga le súfuri hamaalibei ha ouserúabaña wuriba lidan binadu dan, añahein sandiguatiña houngua wiye hamá, madüna hamá lun hínsiñewa hamá ani ua hamá ni aban abusenrútiña. Másiñati samina hamá madüna hamá lun hínsiñewa hamá. Aban lanarime iyeeni le. Ligíati yusu wamóun Bíbülia lun waritaguagüdüniña gebegi hamá saragu lun Heowá (ariha waméi rekuáduru “ Bérusu tídangiñeti Bíbülia le ruti gurasu”). Haritagua waméi le asuseredubei lun profeta Danieli dan le lasandiragunbei lungua méreeli lan ani lau íruni. Aban lóunahan Bungiu aban ánheli lun lasubudiragüdüni lun Danieli gebegi lan hínsiñe ligía lun (Dan. 10:2, 11, 19). Ani ligiaméme lasandirubei Heowá hawagu wíbirigu ha asufurirubaña, gebegitiña lun.

21. a) Kaba asusereda houn ha adügübaña wuribani ani masakürihantiña? b) Lubaragiñe liabin weyu ligía, ka lunbei aranseñu wamá lun wadügün?

²¹ Dan le wíchugun gurasu houn amu gürigia, aba waritaguagüdüniña aban lan Bungiu hínsiñehabuti Heowá. Maweiyasun wamá abulieidei aban lan Bungiu lánina irichaü ligía. Úati ni aban marichaü erederuti aramudaguñu luéi lagu. Ariha lumuti sun katei, ani chóurugüda lumuti lafayeiragüdübaña lan ha adügübaña wuribani ánhaña masakürihan (1 Lur. 14:18). Ligíati, adüga waméi sun wayaraati lun warufudun ínsiñeni houn ha ouserúabaña wuriba. Ma wagundan wasubudiruni lagaranihaba lan Heowá lun súnwandan lun gáriti le hawagubei ha ouserúabaña wuriba ladüga Satanási luma ubóu le lábugiñebei lubafu. Yarafa madise, maritawagún waalime luagu lanarime igarigu le (Isa. 65:17).