1-2. (a) Sowtu ageisitoli e soi taki libisama abi toosutu fanowdu? Fa a toli ya e soi taki u poi toosutu taawan? (b) Sowtu ogii e miti son pikin?

LIBISAMA e fii bun te taawan e toosutu den te wan sani pasa anga den. U poi toosutu taawan tu, a so Yehofa meke u. Meke u taki wan pikin e pee neen a kai pii en kini. San a o du? Ai kee go neen mma efuso en dda. Winsi a mma efuso a dda á poi deesi a soo, tokuso a pikin e fii bun te den e toosutu en. Kande den e diki en poti a den futu tapu, boo winta na a soo efuso poti deesi gi en. Fosi i denki a tapu en mofu, da a go pee fi en baka. Bakaten a soo o betee.

² Ma son leisi moo gaan ogii e miti son pikin moo a kai di a sa kai pii en kini. Sama e tyai umanfasi a son pikin. Kande a wan leisi namo den du a ogii ya anga en. Taawan a omen yali den e du a sani ya anga en. Winsi a wan leisi namo sama du a sani ya anga wan pikin, tokuso a omen yali ai fii a bakapisi fu a sani ya. Den e sooto son wan fu den sama di du a gaan ogii ya. Ma son leisi ai gei enke a sama di du a sani ya e fika kookoo. Winsi den sitaafu a sama di du a sani ya, a pikin e fii den takuu bakapisi fu a sani di miti en omen yali langa, winsi a toon gaansama.

3. Enke fa 2 Korentesama 1:3, 4 e soi, da san Yehofa wani? Sowtu akisi wi o luku?

³ Efu sama be tyai umanfasi a wan baala efu sisa di a be yonkuu, neen ai fii den bakapisi fu a sani ya ete, da pe a sa fende yeepi? (Leisi 2 Korentesama 1:3, 4.) U sabi taki Yehofa wani den sama di e dini en fende toosutu, a wani den fii taki taawan lobi den tu. Neen meke wi o  luku den dii akisi ya: (1) Saide den sama di taawan tyai umanfasi a den abi toosutu fanowdu? (2) Sama sa toosutu den? (3) Fa u sa toosutu den?

4-5. (a) Saide u mu holi a pakisei taki pikinnengee anga gaansama a ná aseefi? (b) Te wan sama di a pikin e fitoow tyai umanfasi neen, sowtu takuu bakapisi a sani ya sa abi winsi omen yali pasa?

⁴ Te wan sama tyai umanfasi a wan pikin, son leisi ai abi toosutu fanowdu ete winsi a toon gaansama. Saide? Fu man fusutan a toli ya bun, u mu holi a pakisei taki pikinnengee anga gaansama a ná aseefi. A fasi fa wan pikin e fii te wan sama du ogii anga en anga a fasi fa wan gaansama e fii, a ná aseefi. Wi o luku wantu sani di e soi saide ai moo hati wan pikin te sama du ogii anga en.

⁵ Wan pikin mu man fitoow den sama di e solugu en, a mu fii taki den lobi en. Te a pikin de bun anga den sama di e kiya en, te ai fii taki den lobi en, da a sani ya o yeepi en fu fitoow taa sama di lobi en tu (Ps. 22:9). Ma a tyali taki gaanse leisi den sama di e tyai umanfasi a pikinnengee, a koosube famii fu a pikin efuso wan mati fu a famii di den e fitoow. Te wan sama di a pikin e fitoow du a ogii ya anga en, ai taanga gi a pikin fu fitoow taa sama, winsi omen yali pasa.

6. Saide a wan gaan ogii te wan sama tyai umanfasi a wan pikin?

⁶ Pikinnengee á poi yeepi denseefi, neen meke a wan gaan ogii te sama tyai umanfasi a den. A sani ya e tyai omen takuu bakapisi gi a pikin. Wan pikin á doo peesi ete fu siibi anga man efu uman. Te wan sama tyai umanfasi a wan pikin, a sani ya e poli a fasi fa a pikin e denki fu sekisi. A sani ya e meke a pikin fii enke a á bun. Ai taanga gi en fu fitoow sama tu.

7. (a) Saide a makiliki gi ogii-ati sama fu koli pikinnengee? Fa den e koli pikinnengee? (b) San den lei ya sa du anga wan pikin?

⁷ Wan pikin á poi denki enke wan gaansama, neen meke a ná ala yuu den e sabi efu wan sani bun efuso fowtu. Den á sabi fa fu koti pasi gi ogii tu (1 Kor. 13:11). Neen meke ogii-ati sama sa koli den makiliki. Den sama di e du a gaan ogii ya e koli den pikin fu biibi omen lei. Kande den e taigi a pikin taki neen seefi du meke a sani ya miti en. Kande den e taigi en taki a á mu taigi sama. Den e taigi en tu taki winsi a taki, nawan sama o biibi efuso yeepi en. Kande den e taigi a pikin taki a wan kowownu sani fu wan gaansama anga wan pikinnengee di lobi denseefi siibi anga denseefi. Den sowtu lei ya e buuya a pikin. Son leisi a baka omen yali fosi a pikin e fusutan taki ala den sani ya a be lei. Kande sowan pikin e si enke a á bun, sama á poi lobi en. Kande ai fii enke nawan sama e booko den ede anga en.

8. Saide u sa biibi taki Yehofa o toosutu den sama di taawan du ogii anga den?

⁸ Den sani ya e yeepi u fu fusutan saide den sama di taawan tyai umanfasi a den e fii den takuu bakapisi ete, winsi den toon gaansama. A sani ya a wan gaan ogii. Na ala se fu goontapu sama e du a ogii ya anga pikinnengee. A sani ya e soi kiin taki wi e libi aini den lasiti dei tuu. Beibel be taki aini den lasiti dei sama „ná o lobi taawan”. A be taki tu taki „ogiiman anga bidiigiman o kon moo ogii” (2 Tim. 3:1-5, 13). Saatan e koli sama fu du ogii-ati sani anga taawan. A wan tyali sani taki sama e holibaka gi Saatan. Ma u  sabi taki Yehofa abi makiti moo Saatan anga ala den bakaman fi en. Ai si ala den sani di Saatan e du fu koli sama. A sabi fa wi e fii te den sowtu ogii ya miti u. Neen meke u sa biibi taki a o toosutu u. Ai bigi gi u taki wi e dini „a Gadu di e toosutu sama, di e toosutu u te u de aini omen sowtu banowtu. Na a toosutu di Gadu e toosutu u meke useefi poi toosutu taawan winsi sowtu banowtu e miti den” (2 Kor. 1:3, 4). Sama Yehofa e koboloiki fu toosutu taawan?

9. Enke fa Kownu David sikiifi a Psalm 27:10, da san Yehofa e du te a si mma anga dda nai luku den pikin fu den bun?

⁹ Son leisi sama e tyai umanfasi a wan pikin, fu di a pikin mma anga dda á kibii en. Son leisi a famii efuso taa sama di den pikin e fitoow e du a ogii ya anga den. Den pikin di a sani ya miti, moo abi toosutu fanowdu. A psalm sikiifiman David be sabi taki Yehofa na a moo bun sama di sa toosutu u. (Leisi Psalm 27:10.) David be e biibi taki winsi u famii du ogii anga u, Yehofa o de enke wan Dda gi u. Fa Yehofa e du a sani ya? Ai koboloiki den sama di e dini en anga den hii ati. Den baala anga sisa aini a kemeente de enke u famii. Yesesi be e kai den taa sama di be e dini Yehofa en baala, en sisa anga en mma.—Mat. 12:48-50.

10. Fa Pawlesi be e du en wooko enke owluman?

¹⁰ Wi o luku wantu toli di e soi fa a kemeente sa libi anga denseefi enke famii. Apostel Pawlesi a be wan owluman di be e du en wooko bun. U sa waka neen baka. A be gi u taanga-sikin fu waka neen baka enke fa a waka a Yesesi baka (1 Kor. 11:1). Luku san Pawlesi be taki fu a wooko di a be e du enke owluman. Pawlesi be taki: „U soi switifasi gi u leti enke fa wan mma e solugu en pikin di de a bobi fu di a lobi en” (1 Tes. 2:7). Leti enke Pawlesi, a so owluman aini a ten ya sa taki switi anga sama te den e koboloiki Beibel fu toosutu den.

11. Saide u sa taki a ná owluman wawan sa toosutu taawan?

 ¹¹ A owluman wawan sa toosutu sama di taawan tyai umanfasi a den? Nono. Na ala u Yehofa gi a wooko fu „toosutu makandaa” (1 Tes. 4:18). Sisa di abi ondoofeni sa toosutu den sisa di abi toosutu fanowdu. Yehofa taki a o toosutu wi enke fa wan mma e toosutu en pikin (Yes. 66:13). Beibel e taki fu wantu uman di be e toosutu taawan te sani be miti den (Yopu 42:11). Yehofa e piisii te a si fa Kelesten sisa e toosutu den sisa di booko-saka. Son leisi den owluman e akisi wan sisa di abi ondoofeni efu a sa yeepi wan sisa di abi toosutu fanowdu. *

12. San wi á mu du te wi e toosutu sama?

¹² U mu luku bun fu u ná akisi a sama sani di o meke a fii wan fasi (1 Tes. 4:11). Fa u sa yeepi den sama di abi toosutu fanowdu? Meke u luku feifi sani di Beibel e soi taki u sa du fu toosutu sama.

13. Enke fa 1 Kownu 19:5-8 e soi, da san a engel fu Yehofa du gi Eliya? Fa u sa waka na a engel ya baka?

¹³ Yeepi a sama anga san a abi fanowdu. Di polofeiti Eliya be e kibii gi den sama di be e suku fu kii en, a be booko-saka te neen a be wani dede. Ma Yehofa sende wan engel fu toosutu en. A engel gi Eliya den sani di a be abi fanowdu. A gi en nyanyan neen a gi en taanga-sikin fu a nyan. (Leisi 1 Kownu 19:5-8.) A toli ya e leli u taki winsi a wan pikin sani u du gi wan sama di abi yeepi fanowdu, a abi wini. Kande u sa go luku en, boli wan sani tyai gi en efuso yeepi en anga taa sani. Den sowtu sani ya e soi a sama di booko-saka taki wi e booko wi ede anga en. A wan fasi fu soi en taki u lobi en tu. Efu ai taanga gi i fu taki anga wan sama di booko-saka, i sa du wan fu den sani ya fu soi taki yu e booko yu ede anga en.

14. San a toli fu Eliya e leli u?

¹⁴ Meke mati anga a sama di e fii booko-saka. A mu man fii taki a sa fitoow i. A toli fu Eliya e leli u wan taa sani tu. Yehofa du wan wonduu fu gi Eliya a kaakiti di a be abi fanowdu fu waka go te a Horeb Mongo. Na a mongo ya Yehofa be meke wan kuudei anga a foluku fi en. Kande di Eliya be doo a mongo ya, a á be e feele so moo. Kande a be e fii taki pe te a doo de, den sama di be wani kii en á be o poi fende en fu du ogii anga en. San a toli ya e leli u? Efu u wani yeepi wan sama di taawan du ogii anga en, u mu meke moiti fosi fu yeepi en fu a á feele taki ogii o miti en baka. Te owluman wani gi wan sisa di e fii booko-saka taanga-sikin, den mu holi a pakisei taki son sama e fii moo bun te den go taki anga en a osu, moo enke den kai en go a wan se na a komakandaa peesi. Taawan na a komakandaa peesi ai wani den taki anga en.

15-16. San a wani taki fu aliki bun?

¹⁵ I mu e aliki bun. Beibel e taigi u kiin taki: „I mu gaw fu aliki, ma yu á mu gaw fu taki” (Yak. 1:19). Yu e aliki bun te taa sama e taki? Kande wi e si enke a te u sidon pii e luku a sama duun, da na aliki wi e aliki bun. Ma wan sama di e aliki bun, á mu sidon pii namo. Di Eliya be e taigi Yehofa fa a be e fii, Yehofa be e aliki en. Neen meke a be fusutan taki Eliya be e feele, a be e fii enke neen wawan de. A be e fii enke ala den sani di a be du a  fu soso. Yehofa poti pakisei na ala den booko-ede fi en. A sani ya e soi taki a be aliki Eliya bun.—1 Kow. 19:9-11, 15-18.

¹⁶ Fa u sa soi taki wi e booko wi ede anga wan baala efuso sisa te wi e aliki en? Kande u sa taki wantu sani di e soi taki wi e booko wi ede anga en. Kande u sa taki: „Ai hati mi taki a sani ya miti i. A á fiti fu sama du a sani ya anga wan pikin!” Kande i sa poti wan efuso tu akisi di o yeepi i fu fusutan bun fa a sama e fii. Te yu e poti den sowtu akisi de, a sama e si taki yu e booko yu ede anga en tuutuu. A o si tu taki yu e meke moiti fu fusutan en bun.—1 Kor. 13:4, 7.

17. Saide wi á mu „gaw fu taki”?

¹⁷ Yu á mu „gaw fu taki”. Te a sama e taki yu á mu koti en mofu fu di i wani soi en san a sa du efuso fu di i wani yeepi en kengi a fasi fa ai denki. I mu abi pasensi. Di Eliya taigi Yehofa fa a be e fii, den sani di a taki be e soi taki a be e booko en ede tuutuu. Baka di Yehofa gi Eliya taanga-sikin, Eliya taigi en ete wan leisi fa ai fii. A taigi en denseefi sani (1 Kow. 19:9, 10, 13, 14). San a toli ya e leli u? Son leisi te wan sani e fooseli wan sama kande a o taki a toli anga wi omen leisi. U mu abi pasensi fu aliki en, leti enke Yehofa. Wi á mu suku fu losi a polobelema fi en, ma u mu meke moiti fu fusutan fa ai fii. U mu soi taki wi e booko wi ede anga en.—1 Peit. 3:8.

18. Fa wi e toosutu sama di e fii booko-saka te wi e begi anga den?

¹⁸ Begi anga a sama. Son leisi te wan sama e fii booko-saka a nai man begi. Kande a sama e fii enke a á bun sai fu begi Yehofa. Efu u wani toosutu a sama, u sa begi anga en. U mu kai en nen te wi e begi. U sa taigi Yehofa aini a begi taki u lobi a sama. U sa taigi Yehofa tu taki a kemeente lobi a sama di booko-saka.  U sa akisi Yehofa tu fu a yeepi a sama fu a á booko en ede tumisi. Den sowtu begi ya e toosutu a sama.—Yak. 5:16.

19. San o yeepi u fu taki sani di e toosutu taawan?

¹⁹ Taki sani di o toosutu a sama. I mu denki fosi i taki. Efi yu á denki fosi i taki i sa taki sani di o hati a sama. Efi i taki sani di e toosutu en a o fii bun (Odo 12:18). Neen meke a bun fu begi Yehofa fu yeepi i fu taki sani di o toosutu a sama. Holi a pakisei taki a moo bun sani di u sa koboloiki fu toosutu sama na a Wowtu fu Gadu.—Heb. 4:12.

20. Fa son baala anga sisa e fii fu di sama be tyai umanfasi a den di den be yonkuu? San u mu yeepi den fu fusutan?

²⁰ Son baala anga sisa e fii enke den kaba a soso fu di sama be tyai umanfasi a den di den be yonkuu. Son leisi den e fii enke den á bun, nawan sama lobi den. Ma a sani ya a ná tuu! Neen meke a bun fu soi den aini Beibel taki Yehofa lobi den. (Luku a faki „ Wi e fende toosutu aini a Wowtu fu Gadu.”) Pakisei fa wan engel be gi Daniyeli taanga-sikin di a be e fii booko-saka. Yehofa soi Daniyeli kiin taki a lobi en (Dan. 10:2, 11, 19). A sani ya e soi taki Yehofa e booko en ede anga den baala anga sisa te sani e moo den!

21. San o pasa anga ala den sama di á fika den ogii di den e du? Ma san u mu du nownow?

²¹ Te wi e toosutu taawan, wi e membee den taki Yehofa lobi den. Wi á mu feegete fu membee den tu taki Yehofa e kuutu sani a wan letifasi. Nawan ogii e kibii gi Yehofa. Yehofa o sitaafu ala den sama di e tyai umanfasi a pikinnengee, efu den á soi taki a sani di den du e hati den (Num. 14:18). Ma fosi a ten de doo, meke u du ala san u man fu soi den sama di taawan du ogii anga den, taki u lobi den. Dyonson Yehofa o puu ala den ogii di Saatan anga a goontapu fi en e du anga sama. A sabi di u sabi a sani ya e gi u taanga-sikin. Noiti moo wi o membee den ogii di e miti wi aini a goontapu fu Saatan ya.—Yes. 65:17.