1, 2. (1) ¿Kasa naaʼinraka wanee jintüi wototule nia? (2) ¿Kasa saaʼinraka tü niikat süpüla sükaalinjain nia? (3) ¿Kasa müliaka atuma naaʼin waneinnua tepichi?

CHOʼUJAASÜ wamüin wakaalinjünüin otta eeshii süpüla wakaalinjain na waneinnua. Jamüshijaʼa wototule wanee jintüi otta seeshituule nüsapain sünain ashaitaa, awataashi nia sümaa niiʼira eemüin tü niikat. Nnojotsü süpüla süshatüin tü nülioʼukat sutuma, sümüliatpejeʼe naaʼin. Süsakirüin nia jamakuwaʼipalin nia, sülaʼataain nuʼwüira, sujuupatüin nia, anasü sünüiki nümüin, eesüjaʼa suʼlojule nülioʼu otta kaülüjüle shia kuluulu sutuma. Ooʼulaa müshia chi jintüikai suulia aʼyalajaa otta eeshi nüshaitüle nüchikuaʼa. Ashatüsü tü nülioʼukat mapa.

² Eepejeʼe tepichi müliakana maʼin aaʼin. Eeshii na ataüjaanakana, eesü uwatuale saainjünüin tia namüin jee kakaliale müin naya atumawaa. Mojushaatasü maʼin naaʼin saalinjee tia. Eeshi nütüjaanüle aaʼu chi makai atuma naya jee apüreesajinnüshi nia, eepejeʼe nnojoire nütüjaanüin aaʼu. Müliashii na tepichikana saalinjee tia jee miyoʼushii naya sümaa mojuin naaʼin, maʼwaisü nakuwaʼipa mayaa jaʼitashi püreesain chi makai amaʼüla namüin.

3. (1) ¿Kasa nüchekaka Jeʼwaa napüleerua na anoujashiikana saashin 2 Corinto 1:3, 4? (2) ¿Jarat tü pütchi wasoutuinjatkalü eʼipajee?

³ ¿Kasa akaalinjeechika wanee anoujashi eekai nütaüjaanüin jintüliiwaʼaya nia jee ayatakai mojuin aaʼin saalinjee tia? (Paashajeʼera 2 Corinto 1:3, 4). Shia nüchekaka Jeʼwaa alinjanain apülaa na anoujashiikana nünain otta nakaalinjünüin. Müshiijeʼe wekirajaainjanain  sünain susoutia pütchikat tüü: ¿Jamüshii nakaalinjünüinjanaka na ataüjaanakana tepichiiwaʼaya naya? ¿Jaralii na keraakana süpüla akaalinjain naya? ¿Kasa waaʼinrajatka süpüla wakaalinjain naya?

4, 5. (1) ¿Jamüsü sotuinjatka waaʼin naatain nukuwaʼipa wanee jintüi nuulia wanee wayuu miyoʼu? (2) ¿Kasa alataka nütaüjaanüle wanee jintüi?

⁴ Eeshii wayuu choʼujaakana amüin süka nataüjaanüin tepichijaiwaʼaya naya, choʼujaasü namüin nakaalinjünüin jaʼitasü kakaliairüin tü alatakat namüin. Süpüla wayaawatüin saaʼu jamüin makaʼa tia, soteesü waaʼin naatain nukuwaʼipa wanee jintüi nuulia wanee wayuu miyoʼu otta naata sümüin tü naaʼinrakat wanee jintüi sülatüle kasa mojusü nümüin suulia tü naaʼinrakat wanee wayuu miyoʼu. Wekirajaa sünain jamüin makaʼa tia.

⁵ Anainjatü naaʼin na tepichikana namaa na epijakana otta na aaʼinmajakana naya. Sünainjee tia nnojoishii naya mmoluin otta anasü naaʼin namaa na wayuu aikana apüla naya (Sal. 22:9). Wainmapejeʼe na tepichi ataüjaanakana nepialuʼu, naya makana amaʼüla namüin na napüshikana jee nayale naʼaleewainyuu na kachonniikana naya. ¿Kasache alataka müle tü aaʼinnakat nümüin wanee jintüi? Nnojoleerü anain naaʼin namaa na waneinnua, jaʼitakajeʼe neʼe miyoʼupa nia, ayateeria müin nukuwaʼipa.

6. ¿Jamüsü mojushaataka maʼin nataüjaanüle na tepichikana?

⁶ Eʼnna amüinchii na tepichikana jee mojushaatasü maʼin nataüjaanüle. Eʼrüshii kasa mojusü na tepichikana sutuma nataüjaanüin, jama nnojoluin keraain naya süpüla naainjiraain nakuwaʼipa, mojusü naaʼin sutuma otta nnojotsü keraain nouyase süpüla kasaalüin naya. Saaʼujee nataüjaanüin, naata neʼe tü jülüjakat naaʼin süchiki tü aainjirawaakalü akuwaʼipaa, süchiki nakuwaʼipa otta nachiki na wayuu arütkaakana nanainmüin.

7. (1) ¿Jamüsü mapüleeka nümüin wanee kamaʼürai nütaüjaain tepichi? (2) ¿Jamüsü nünüiki wanee kamaʼürai namüin na tepichikana? (3) ¿Jamüsü nakuwaʼipa na tepichikana sutuma tü alawaa aküjünakat namüin?

⁷ Nnojotsü nayaawatüin aaʼu wanee kasa na tepichikana, nnojotsü nasakireʼerüin suluʼu naaʼin süchiki wanee kasa jee nnojotsü natüjaain aaʼu anale jee mojule shia (1 Cor. 13:11). Müsüjeseʼe mapüleein nümüin wanee kamaʼürai nütaüjaain tepichi. Nüküjain namüin nayain kasirüin nataüjaanüin, nnojoluinjatüin naküjain shia sümüin wayuu, nnojoleerüin jaralüin anoujain nanüiki naküjale süchiki tü aaʼinnakat namüin otta alin naya nüpüla chi ataüjaakai naya. Mojusü nakuwaʼipa na tepichikana sutuma tia alawaakat. Miyoʼujeena naya sümaa nnojoluin natüjaain saaʼu alawaain neʼe tia münakat namüin. Eeshi miyoʼule wanee jintüi sümaa jülüjain naaʼin shiʼyarülajünüin nukuwaʼipa, nnojoluin kasain anain apüla nia otta maalinjachin nia süpüla wayuu.

8. ¿Jamüshii wanoujainjanaka sünain nükaalinjain Jeʼwaa na müliakana aaʼin sutuma kasa mojusü?

⁸ Sünainjee tia wekirajaaitpakalü anain, wayaawata aaʼu jamüin mojuka maʼin nataüjaanüle na tepichikana, kakaliasü mojuin naaʼin saalinjee tia. Sutuma jouluin maʼin tü kasa mojusü aaʼinnakat, wayaawata aaʼu sülüʼülüin sükalia süpüla sajaʼttüin kasa mojusü, müshiijeseʼe wainmain «wayuu eekai maalin wayuu napüla» otta müshiʼiya «na wayuu eʼrüliikana wayumüin ooʼulaka na eʼikeʼerüliikana wayuu», kooʼomüinsü maʼin natuma tü namaʼülakat (2 Tim. 3:1-5, 13). Mojushaatasü maʼin tü kasa nimeejakalü aka Satanaa otta oonooshii na wayuukana sümaa tü naʼalainkat. Niapejeʼe pülain maʼin Jeʼwaa nuulia Satanaa otta noulia na wayuu oonookana sümaa naʼalain. Nütüjaa aaʼu Jeʼwaa kasain naaʼinrüin chi Yolujaakai. Makalaka wanoujainjanain sünain nütüjaain saaʼu tü kasa müliakalü atuma waaʼin otta eein süpüla nükaalinjain waya. Anasü waaʼin sutuma niain waʼyataain amüin Maleiwa. «Je müleka müliale waya, akaaliijüneena waya nütüma  süpüla wakaaliijainjatüin wayuu eekai müliain. Katsüinjeerü waaʼin süpüla akaaliijaa wayuu, süka wakaaliijünüin palajana nütüma chi Maleiwakai» (2 Cor. 1:3, 4). ¿Jaraliiche na nüneekakana Jeʼwaa süpüla nakaalinjain na müliakana aaʼin?

9. Saashin Salmo 27:10, ¿kasa naaʼinraka Jeʼwaa napüleerua na wayuu maalinkana süpüla napüshi?

⁹ Eeshii nayale choʼujaain amüin akaalinjünaa na wayuu nnojoliikana aaʼinmajünüin natuma na kachooinkana naya jee nayale na ataüjaanakana sutuma wayuu neʼraajüin. Nütüjaa aaʼu David niain neʼe Jeʼwaa anakai süpüla akaalinjaa waya (paashajeʼera Salmo 27:10). Nunouja anainrü David niain Jeʼwaa akaalinjaka na wayuu maalinkana süpüla napüshi. ¿Kasa naaʼinraka Jeʼwaa süpüla nükaalinjain naya? Naaʼinrüin tia nakajee na waneepiakana sünain aʼyatawaa nümüin. Wapüshi na wawalayuu aʼwaajakana Jeʼwaa wanaa wamaa. Naashin Jesuu, müshii aka saaʼin nuwalayuu jee nii na wayuu aʼwaajakana Jeʼwaa wanaa nümaa (Mat. 12:48-50).

10. ¿Jamüsü nünüiki Pablo süchiki tü niʼyataainkat napüleerua na anoujashiikana?

¹⁰ Wekirajaa sünain wanee sukuwaʼipa süpüla wayaawatüin saaʼu nayain wapüshin na wawalayuukana. Wayuu aʼyataai Pablo, waneepiashi nia nümaa Jeʼwaa otta anasü nukuwaʼipa napüleerua na anoujashiikana. Naapüin Jeʼwaa chi naaʼinkai nümüin süpüla nüshajüin namüin na anoujashiikana. Shia nüshajaka niainjachin nashatüin akuwaʼipa maʼaka niakai nüshatüin nukuwaʼipa Kürisüto (1 Cor. 11:1). Anuu nünüiki Pablo süchiki tü niʼyataainkat napüleerua na anoujashiikana: «Aluʼujasa waya, kamaneepüʼüshii jümüin maa aka saaʼin wane eyüü wanaa sümaa saaʼinmajüin tü süchooinkalüirua» (1 Tes. 2:7). Müsia neʼe nakuwaʼipa na laülaashiikana maaʼulu, kamaneeshii naya otta anasü nanüiki nakaalinjapa na nawalayuukana sükajee tü sümakat tü Wiwüliakat.

11. ¿Jamüshii nnojoliika nayainjanain neʼe na laülaashiikana akaalinjain na anoujashiikana?

¹¹ Nnojoliipejeʼe nayainjanain neʼe na laülaashiikana akaalinjain na ataüjaanakana. Anuu tü waaʼinrajatkat wayakana wapüshuaʼa: «Anakaja jooluʼu jütütülaajiraale [jaaʼin]» (1 Tes. 4:18).  Na jieyuu laülaakana aaʼin sünain anoujaa, eesü süpüla nakaalinjain na wawalayuu jieyuukana. Naashin Jeʼwaa, müshi nia aka saaʼin wanee eyüü amüliajaka saaʼin süchonnii (Is. 66:13). Aashajaasü tü Wiwüliakat nachiki jieyuu amüliajaka naaʼin na mojukana aaʼin (Job 42:11). Talatüshi Jeʼwaa sutuma niʼrüin na wawalayuu jieyuukana sünain akaalinjaa na mojukana aaʼin. Eeshii süpüla nasakirüin na laülaashiikana wanee wawala eekai laülaain saaʼin sünain anoujaa müleka eere süpüla sükaalinjain wanee wawala eekai mojuin saaʼin. *

12. ¿Jamüsü wayaawatüinjatka wanüiki wakaalinjapa wanee wawala?

¹² Wakaalinjapa wanee wawala, wayaawatüinjatü wanüiki suulia wasakirüin nia sünain wanee kasa nnojotka naashajaweein achiki (1 Tes. 4:11, TNM). ¿Kasache waaʼinrajatka süpüla wakaalinjain na mojukana aaʼin sümaa anashiin namüin nakaalinjünüin? Wekirajaa sünain jaʼraisü kasa waaʼinrajatka saashin tü Wiwüliakat.

13. (1) Saashin 1 Reyes 19:5-8, ¿kasa naainjaka wanee aapiee nüpüleerua Elías? (2) ¿Kasa watüjaka sünainjee tü naaʼinrakat chi aapieekai?

¹³ Wakaalinja naya sünain tü choʼujaakat namüin. Mojushaatasü naaʼin Elías, chi nünüikimaajachikai Maleiwa süka nuʼutunajachin aaʼin, müshijeseʼe nuʼluwataain jee naapüin naaʼin sünain outaa. Nuluwataaka Jeʼwaa wanee aapiee süpüla nütütüleʼerüin naaʼin. Saapünaka eküülü jaʼisü nümüin Elías nutuma chi aapieekai (paashajeʼera 1 Reyes 19:5-8). Eesü tü watüjakat sünainjee tü naaʼinrakat chi aapieekai. Eeshi süpüla wakaalinjain wanee wawala mojukai aaʼin müleka kamaneere waya nümüin. Eeshi süpüla wekirüin nia, wasülajüin wanee kasa nümüin jee shiale washajüin karaloʼuta nümüin eere waküjain alin nia wapüla otta kachipünaain nia waaʼin. Eesü süpüla waaʼinrüin tia müleka nnojorüle wasakireein nia sünain wanee kasa nnojotka nüküjeein achiki jee mojuka atuma naaʼin.

14. ¿Kasa watüjaka sünainjee tü naaʼinrakat Elías?

¹⁴ Anainjatü naaʼin watuma na wayuu mojukana aaʼin. Wekirajaa sooʼomüin süchiki tü alatakat nümüin Elías. Nükaalinjain nia Jeʼwaa sükajee nüpülain süpüla nuʼunuinjachin saaʼumüin tü uuchikat Horeb, eejatüle nüpansaajüin paala Jeʼwaa nünüiki namüin na israeliitakana. Eesüjaʼa anale naaʼin Elías suluʼu tia mmakat, jama wattajachin nia noulia na oʼuteekana naaʼin. ¿Kasa watüjaka sünainjee tia? Wakaalinjeere na wayuu mojukana aaʼin sutuma nataüjaanüin, wachajaainjatü sukuwaʼipa süpüla anain naaʼin watuma. Jamüshiijaʼa na laülaashiikana, sotuinjatü naaʼin naatayaa sümüin tü anashiikat namüin na wawalayuukana sülatüle tia namüin. Eesü anashiire sümüin wanee wawala saashajaain süchiki tü alatakat sümüin sümaa süsaain kepein chaa shipialuʼu namaa na saashajaakana amaa, eepejeʼe wawala eekai anain saaʼin sünain yootoo süchiki tia suluʼu tü outkajaaleekat.

15, 16. ¿Kasa waaʼinrajatka süpüla jülüjain waaʼin nanüiki na waneinnua?

¹⁵ Waapaja nanüiki. Anuu sünüiki tü Wiwüliakat wamüin: «Anakaja müleka eere jaaʼin sünain tü nüküjakat wane juwala jümüin sümaa nnojolüin jüsouktüin pejeewa sünainmüin tü nümakat» (Sant. 1:19). ¿Eejawaisüche waaʼin sünain tü namakat na waneinnua? Eeshiijaʼa wamüle jimatüinjanain waya sünain aapajaa nanüiki na waneinnua, weirakaainjanain namüin jee nnojoliinjanain wasoutuin shiʼipajee nanüiki. Eepejeʼe sooʼomüin tü waaʼinrajatkat. Jülüjataa waaʼin kasain naaʼinrüin Jeʼwaa süpüla naapajüin nünüiki Elías. Jülüjasü maʼin naaʼin Jeʼwaa nünüiki Elías nüküjapa süpüshuaʼa tü alatakat nümüin jee tü shapaakalü atuma naaʼin. Niyaawata aaʼu mmoluin Elías, nnojoluin jaralin akaalinjain nia naashin jee amülain neʼe tü niʼyataainkat naaʼinruʼu. Kamaneepejeʼe Jeʼwaa nümüin sümaa  nükaalinjain nia. Sükajee tia, niyaawata aaʼu Elías jülüjain naaʼin Jeʼwaa tü nümakat nümüin (1 Rey. 19:9-11, 15-18).

¹⁶ Waapajüle nanüiki na ataüjaanakana paala, jaʼyainjatü suluʼu wakuwaʼipa alin naya wapüla otta wamülialaain naalin. Eesü süpüla waküjain namüin wanee pütchi eekai nayaawatüin akajee alin naya wapüla. Eeshii süpüla wamüin namüin: «Aluʼutaʼaleeshijaʼa pia. Nnojotsü müinjatüin tü aaʼinnakat nümüin wanee jintüi». Otta eeshii süpüla wasakirüin naya süpüla wayaawatüin tü naküjeekalü achiki. Müle shia watuma, natüjaweerü aaʼu jülüjain waaʼin tü namakat wamüin, kamaneein waya namüin otta wayaawateein saaʼu tü namakat (1 Cor. 13:4, 7).

17. ¿Jamüshii nnojoliinjanaka washapajaain aaʼin otta wasoutuin pejeewa?

¹⁷ Nnojoliinjana waya asoutuin pejeewa namüin na mojukana aaʼin. Nnojo wasoutamaatüin wanaa sümaa naashajaain süpüla waküjain namüin tü naaʼinrajatkat jee wanoutuin wanee kasa mojuka natuma. Nnojo washapajaain aaʼin. Nüküjain Elías nümüin Jeʼwaa süpüshuaʼa tü alatakat nümüin. Shiasaʼa süchikijee nütütüleʼennüin aaʼin nutuma Jeʼwaa, nüküjain Elías süchikuaʼa tü nüküjakat paala (1 Rey. 19:9, 10, 13, 14). Sünainjee tia watüjaa aaʼu eein wayuu kojuyatuaka aküjain süchiki tü alatakat namüin. Müshiijeseʼe nnojoliinjanain washapajaain aaʼin waapajapa nanüiki maʼaka naapajüin Jeʼwaa nünüiki Elías. Nnojo waküjain namüin tü anakat süpüla naaʼinrüin, wakaalinja naya otta kamanee waya namüin (1 Ped. 3:8).

18. ¿Jamüsü aneetka naaʼin na mojukana aaʼin wachuntule napüleerua?

¹⁸ Woʼuraaja namaa na müliakana aaʼin. Eeshii nnojoliire noʼuraajüin na wayuu mojukana aaʼin. Eesü nnojorüle anain naaʼin sünain achuntaa nümüin Jeʼwaa. Wakaalinjeere naya, woʼuraaja namaa sümaa wachuntüin nanülia. Waküja nümüin Jeʼwaa alin naya wapüla otta alin naya napüla na wawalayuukana. Wachunta napüleerua süpüla anain naaʼin nutuma Jeʼwaa. Müle sukuwaʼipa watuma, aneerü naaʼin (Sant. 5:16).

19. ¿Kasa wachuntajatka nümüin Jeʼwaa?

¹⁹ Waküja namüin pütchi eekai anain. Wayaawatüinjatü  saaʼu tü wanüikinjatkat. Aisü sümüin wayuu pütchi eekai mojuin, anapejeʼe saaʼin sutuma pütchi eekai anain (Prov. 12:18). Müshiijeseʼe wachuntajanain nümüin Jeʼwaa süpüla anainjatüin wanüiki wakaalinjapa na mojukana aaʼin. Tü pütchi anakat maʼin süpüla amülialaa saaʼin wayuu, shia tü suluʼukat tü Wiwüliakat, jama nünüikin shia Jeʼwaa (Heb. 4:12).

20. (1) ¿Kasa jülüjaka naaʼin na wayuu ataüjaanakana paala? (2) ¿Kasa waküjainjatka namüin?

²⁰ Na wayuu ataüjaanakana paala, jülüjasü naaʼin shiʼyarülajünüin nakuwaʼipa, nnojoluin kasain anain apüla naya otta maalin naya süpüla wayuu. Otta eeshii namüle nnojoliin jaralin alinjanain apüla naya. Nnojotpejeʼe shiimain tia. Müshiijeseʼe waküjainjanain namüin sükajee tü Wiwüliakat kojutuin maʼin naya nümüin Jeʼwaa (paashajeʼera tü pütchikat « Pütchi suluʼujeejatka tü Wiwüliakat amülialeetka paaʼin»). Wekirajaa sünain tü naaʼinrakat Jeʼwaa soʼu mojuin maʼin naaʼin Daniel, chi nünüikimaajachikai. Nuluwataain Maleiwa wanee aapiee süpüla nütütüleʼerüin naaʼin Daniel jee süpüla nüküjain nümüin kojutuin nia nümüin Jeʼwaa sümaa alin nia nüpüla (Dan. 10:2, 11, 19). Akaʼaya neʼe na wawalayuu mojukana aaʼin, kojutushii naya nümüin Jeʼwaa.

21. (1) ¿Kaseerü alataka namüin na kamaʼüralii nnojoliikana ayaawajaain suulia naainjala? (2) ¿Kasa waaʼinrajatka sümaʼinruʼu najaʼttirüin Jeʼwaa na kamaʼüraliikana?

²¹ Watütüleʼerapa naaʼin na wayuukana, waküjeein namüin alin wayuu nüpüla Jeʼwaa otta lotuin sukuwaʼipa wanee kasa nutuma. Nnojotsü eein wanee kasa mojusü eekai suunjulajünüin achiki nuulia. Niʼrüin kasa süpüshuaʼa otta süsaleena nutuma na kamaʼüralii aaʼinrakana kasa mojusü sümaa nnojoluin nayaawajaain suulia naainjala (Núm. 14:18). Sümaʼinruʼu naaʼinrüin Jeʼwaa tia, wakaalinja na müliakana aaʼin sutuma nataüjaanüin. Talatüshii waya sutuma watüjaain saaʼu najaʼttireerüin Jeʼwaa namüliala na wayuu müliakana nutuma Satanaa otta natuma na mojulaashiikana. Nnojoleerü sotuin saaʼin wayuu tia (Is. 65:17).