1, 2. (a) Apajlẹ tẹlẹ wẹ dohia dọ gbẹtọvi lẹ nọ do hudo homẹmiọnnamẹ tọn to jọwamọ-liho bosọ tindo nugopipe nado miọnhomẹnamẹ? (b) Aliho tẹ mẹ wẹ ovi delẹ ko yin awugblena te?

GBẸTỌVI lẹ nọ do hudo homẹmiọnnamẹ tọn to jọwamọ-liho, bosọ tindo nugopipe ayidego tọn de nado miọnhomẹnamẹ. Di apajlẹ, whenue ovivu he to aihunda de jai bo kinkọ́n kligonu, e sọgan yawu yì Papa kavi Mama dè po avi po. Mẹjitọ lọ lẹ ma sọgan hù apà lọ, amọ́ yé sọgan miọnhomẹna ovi lọ. Yé sọgan kàn nuhe jọ sè e, súnsún dasin na ẹn, dọho homẹmiọnnamẹ po awuvẹmẹ po tọn na ẹn, podọ vlavo bo do amasin apà lọ mẹ kavi blá ẹ. To ojlẹ kleun de godo, ovi lọ na nabọẹ, bo tlẹ gán sọ gọjẹ aihunda ji. To nukọn mẹ, apà lọ na kú.

² Ṣigba, to whedelẹnu ovi lẹ nọ gbleawu to aliho he ylan taun humọ lẹ mẹ. Delẹ to yé mẹ, nọ yin zinzanhẹ. Danú ehe sọgan yin wiwà do yé go whladopo kavi whlasusu to owhe lẹ gblamẹ. Depope he whẹho lọ yin, danú he yin wiwà do yé go enẹ sọgan hẹn awugble sinsinyẹn wá na yé to numọtolanmẹ-liho na ojlẹ dindẹn. To whẹho delẹ mẹ, danuwatọ lọ nọ yin wiwle bo nọ yin yasana. To whẹho devo lẹ mẹ, e sọgan taidi dọ sẹ́nhẹngbatọ lọ ma jiya nuhe e wà tọn. Ṣigba, eyin owhẹ̀ dodo tlẹ yawu yin didá, ovivu lọ uwọ sọgan gbẹ́ to oyà awugble sinsinyẹn danuwiwa lọ tọn lẹ tọn ji kaka biọ mẹhowhe mẹ.

3. Dile e yin nùdego do to 2 Kọlintinu lẹ 1:3, 4 mẹ, etẹwẹ yin ojlo Jehovah tọn, podọ kanbiọ tẹlẹ wẹ mí na gbadopọnna?

³ Eyin Klistiani he yin zinzanhẹ to ovu whenu de gbẹ́ to ahidi hẹ numọtolanmẹ awugble tọn, mahopọnna dọ e ko whẹ́n mẹho, alọgọ tẹwẹ e sọgan mọyi? (Hia 2 Kọlintinu lẹ 1:3, 4.) E họnwun dọ ojlo Jehovah tọn wẹ yindọ lẹngbọ etọn lẹ ni mọ owanyi po homẹmiọnnamẹ he yé tindo nuhudo etọn po yí. Enẹwutu, mì gbọ mí ni gbadopọnna kanbiọ atọ̀n delẹ: (1) Naegbọn mẹhe yin zinzanhẹ to  ovu whenu lẹ sọgan do hudo homẹmiọnnamẹ tọn? (2) Mẹnu wẹ sọgan na yé homẹmimiọn he sin hudo yé tindo? (3) Nawẹ mí sọgan miọnhomẹna yé po kọdetọn dagbe po gbọn?

4, 5. (a) Naegbọn e do yin nujọnu nado kẹalọyi dọ ovivu lẹ gbọnvona mẹho lẹ? (b) Nawẹ danuwiwa do ovi de go nọ yinuwado nugopipe etọn nado dejido mẹdevo lẹ go ji gbọn?

⁴ Mẹdelẹ he yin zinzanhẹ to ovu whenu bo tlẹ ko whẹ́n mẹho sọgan gbẹ́ nọ do hudo homẹmiọnnamẹ tọn mahopọnna dọ nulọ ko jọ sọn owhe susu die. Etẹwutu? Nado mọnukunnujẹemẹ, e dona họnwun na mí whẹ́ dọ ovivu lẹ gbọnvo taun na mẹho lẹ. Aliho he mẹ nuyiwahẹmẹ agọ̀ de nọ yinuwado ovivu de ji te nọ saba gbọnvo pete na lehe e sọgan yinuwado mẹho de ji do. Mì gbọ mí ni gbadopọnna apajlẹ delẹ.

⁵ Ovivu lẹ dona wleawuna haṣinṣan pẹkipẹki de hẹ mẹhe to pinplọn yé whẹ́n bo to nukunpedo yé go lẹ bosọ dona dejido yé go. Haṣinṣan mọnkọtọn lẹ nọ zọ́n bọ ovi lẹ nọ mọdọ emi tin to hihọ́ glọ bosọ nọ plọn nado dejido mẹdevo he yiwanna yé lẹ go. (Salm. 22:9) E blawu dọ danuwiwa do ovivu de go nọ saba wá aimẹ to owhé he gbè ovi lọ nọ nọ̀, podọ hagbẹ whẹndo tọn he sẹpọmẹ lẹ po họntọn whẹndo lọ tọn lẹ po wẹ nọ saba wadanu mọnkọ. Whenue mẹhe go ovi lọ dejido de wadanu dego, e sọgan hẹn vẹawuna ovi lọ nado nọ dejido mẹdevo lẹ go etlẹ yin to owhe susu godo.

6. Naegbọn ovivu zinzanhẹ do ylan taun bosọ nọ hẹn awugble sinsinyẹn wá?

⁶ Ovivu lẹ ma sọgan basi hihọ́na yede, podọ ovivu zinzanhẹ ylan taun bosọ nọ hẹn awugble sinsinyẹn wá. Eyin ovi de yin hinhẹn gánnugánnu nado tindo kọndopọ zanhẹmẹ tọn owhe susu lẹ jẹnukọn whẹpo ewọ nido whẹ́n jẹ obá lọ mẹ nado sọgan wàmọ to alọwle mẹ, enẹ sọgan hẹn awugble daho wá na ovi lọ. Zinzanhẹ ovivu lẹ sọgan hẹn yé tindo pọndohlan agọ̀ gando zanhẹmẹ go. E sọgan zọ́n bọ ovi lọ lẹ na nọ mọ yede di nuvọ́nọ bo ma na nọ dejido mẹdepope he jlo na jihọntọn hẹ yé go.

7. (a) Naegbọn e sọgan bọawuna danuwatọ ayiha gigẹdẹnọ de nado doyẹklọ ovivu de, podọ nawẹ danuwatọ lọ sọgan wàmọ gbọn? (b) Etẹ mẹ wẹ lalo mọnkọtọn lẹ sọgan dekọtọn do?

⁷ Yọpọvu lẹ ma tindo nugopipe nado lẹnnupọn sisosiso, nado gbeje whẹho lẹ pọ́n kitokito, kavi mọ owù lẹ hlan bo dapana yé. (1 Kọl. 13:11) Enẹwutu, e nọ bọawu taun na danuwatọ ayiha gigẹdẹnọ lẹ nado doyẹklọ ovivu lẹ. Danuwatọ lọ lẹ nọ plọn ovivu lẹ lalo he ylan taun lẹ, di apajlẹ, yé gán dọna ovivu lọ dọ ewọ wẹ mẹlẹ na dowhẹ, dọ nuhe jọ lọ dona yin aṣlihó, dọ eyin ovi lọ yì jẹwhẹ, mẹde ma na yí i sè kavi ylọ whẹho lọ dọ nujọnu, kavi dọ kọndopọ zanhẹmẹ tọn to mẹho de po ovivu de po ṣẹnṣẹn yin dohia owanyi nugbo tọn. Lalo mọnkọ lẹ sọgan yinuwado nugopipe nulẹnpọn tọn ovi de tọn gọna pọndohlan etọn gando nuhe yin nugbo go ji to aliho agọ̀ mẹ na owhe susu. Dile ovi mọnkọtọn to whinwhẹ́n, e sọgan nọ mọdọ nude jẹdò to emi go, dọ emi yin hinhẹnflu, bo ma jẹna owanyi po homẹmimiọn po.

8. Naegbọn mí sọgan kudeji dọ Jehovah gán miọnhomẹna mẹhe ko yin awugblena lẹ?

⁸ To whelọnu lọ, e ma yin nupaṣamẹ dọ ovivu zinzanhẹ sọgan hẹn awugble dẹn-to-aimẹ lẹ wá. Lehe danuwiwa enẹ ylan sọ! Nuyiwa kanyinylan tọn he gbayipe ehe yin kunnudenu he họnwun de dọ mí to gbẹnọ to azán godo tọn lẹ mẹ, yèdọ ojlẹ de he mẹ mẹsusu na yin “owanyi jọwamọ tọn matindotọ,” bọ “mẹylankan lẹ po mẹblutọ lẹ po na to yinylan deji dogọ” te. (2 Tim. 3:1-5, 13) Na nugbo tọn, wlẹnwin Satani tọn lẹ ylan taun, podọ e nọ blawu whenue gbẹtọvi lẹ yinuwa to aliho he na hẹn homẹ Lẹgba tọn hùn mẹ. Ṣigba, Jehovah do huhlọn tlala hú Satani po mẹhe nọ wà ojlo etọn lẹ po. Ewọ nọ mọ ayikinkan Satani tọn lẹ to whelẹponu. Mí sọgan deji dọ Jehovah nọ mọnukunnujẹ awufiẹsa mítọn mẹ to gigọ́ mẹ, podọ e sọgan na mí homẹmimiọn he sin hudo mí tindo. Dona de wẹ e yin na mí nado nọ  sẹ̀n “Jiwheyẹwhe homẹmimiọn lẹpo tọn, he nọ miọnhomẹna mí to whlepọn mítọn lẹpo mẹ, na mí nido sọgan penugo nado yí homẹmimiọn he mí mọyi sọn Jiwheyẹwhe dè do miọnhomẹna mẹhe tin to whlepọn wunmẹ depope mẹ lẹ.” (2 Kọl. 1:3, 4) Ṣigba, mẹnu lẹ wẹ Jehovah nọ yizan nado miọnhomẹnamẹ?

9. Sọgbe hẹ nuhe Ahọlu Davidi dọ to Salmu lẹ 27:10 mẹ, etẹwẹ Jehovah na wà na mẹhe whẹndo yetọn titi lẹ gbẹ́ dai lẹ?

⁹ Na taun tọn, mẹhe jiya danuwadomẹgo tọn na mẹjitọ yetọn lẹ gboawupo nado basi hihọ́na yé wutu lẹ, kavi mẹhe go mẹyọnmẹ de ko wadanu do lẹ sọgan tindo nuhudo homẹmiọnnamẹ tọn. Salmu-kantọ Davidi kẹalọyi dọ Jehovah wẹ yin homẹmiọnnamẹtọ dejidego hugan lọ. (Hia Salmu lẹ 27:10.) Davidi yise dọ Jehovah nọ kẹalọyi mẹhe ko yin gbigbẹdai gbọn mẹyiwanna yetọn lẹ dali lẹ. Nawẹ Jehovah nọ wàmọ gbọn? Ewọ nọ yí devizọnwatọ nugbonọ etọn lẹ zan. Mẹhe nọ sẹ̀n Jehovah hẹ mí lẹ wẹ yin whẹndo gbigbọmẹ tọn mítọn. Di apajlẹ, Jesu dlẹnalọdo mẹhe wá kọnawudopọ hẹ ẹ to Jehovah sinsẹ̀n mẹ lẹ taidi nọvisunnu, nọviyọnnu po onọ̀ etọn po.—Mat. 12:48-50.

10. Nawẹ apọsteli Paulu basi zẹẹmẹ nuhe azọ́n etọn taidi mẹho de bẹhẹn tọn gbọn?

¹⁰ Lẹnnupọndo apajlẹ de ji he do lehe haṣinṣan he to hagbẹ agun Klistiani tọn lẹ ṣẹnṣẹn taidi whẹndo de tọn do hia. Apọsteli Paulu yin mẹho agun tọn nugbonọ podọ azọ́n sinsinyẹnwatọ de. E ze apajlẹ dagbe de dai, podọ to anademẹ gbigbọ wiwe tọn glọ, e tlẹ dọna mẹdevo lẹ nado nọ hodo apajlẹ emitọn kẹdẹdile emi hodo Klisti tọn do. (1 Kọl. 11:1) Doayi lehe Paulu basi zẹẹmẹ nuhe azọ́n etọn taidi mẹho de bẹhẹn tọn do go. E dọmọ: “Míwlẹ to dẹẹdẹ wà to ṣẹnṣẹn mìtọn, taidi lehe onọ̀ he tindo ovi to anọ́nù nọ wlebòna ovi etọn titi lẹ do.” (1 Tẹs. 2:7) Mọdopolọ to egbehe, mẹho nugbonọ lẹ sọgan nọ yí hogbe fifá po homẹdagbe tọn lẹ po zan dile yé to Owe-wiwe lẹ yizan nado miọnhomẹna mẹhe tindo nuhudo alọgọ tọn lẹ.

11. Etẹwẹ dohia dọ e ma yin mẹho lẹ kẹdẹ wẹ sọgan miọnhomẹnamẹ?

¹¹ Be mẹho lẹ kẹdẹ wẹ sọgan miọnhomẹna mẹhe jiya ovivu zinzanhẹ tọn lẹ ya? Lala. Azọngban mímẹpo tọn wẹ nado nọ “to homẹmiọnna  ode awetọ zọnmii.” (1 Tẹs. 4:18) Na taun tọn, mẹmẹyọnnu he whèwhín lẹ sọgan yin asisa tulinamẹ tọn na mẹmẹyọnnu he do nuhudo homẹmiọnnamẹ tọn lẹ. Abajọ Jehovah Jiwheyẹwhe yí ede jlẹdo onọ̀ he nọ miọnhomẹna visunnu etọn de go. (Isa. 66:13) Biblu bẹ apajlẹ yọnnu susu he miọnhomẹna mẹhe to ayimajai mẹ lẹ tọn hẹn. (Jobu 42:11) Lehe homẹ Jehovah tọn nọ hùn do sọ nado mọdọ to egbehe, yọnnu Klistiani lẹ nọ miọnhomẹna mẹmẹyọnnu hatọ yetọn he to ahidi hẹ awufiẹsa sinsinyẹn lẹ! To whẹho delẹ mẹ, mẹho agun tọn dopo kavi awe sọgan yí wuntuntun do kanse mẹmẹyọnnu he whèwhín de eyin e na penugo nado na alọgọ mọnkọtọn mẹmẹyọnnu he to awufiẹsa mẹ de. *

12. Etẹwẹ mí nọ tin to aṣeji ma nado wà?

¹² Na nugbo tọn, mí nọ tin to aṣeji ma nado dín tlintlindo gando whẹho he ji Klistiani hatọ de ma jlo na dọhodo lẹ go. (1 Tẹs. 4:11) Ṣigba, etẹwẹ mí sọgan wà na mẹhe do hudo alọgọ po homẹmiọnnamẹ po tọn bosọ jlo na mọ ẹn yí lẹ? Mì gbọ mí ni gbadopọnna aliho atọ́n he sinai do Owe-wiwe ji delẹ, ehe mẹ mí sọgan nọ miọnhomẹnamẹ te.

13. Sọgbe hẹ 1 Ahọlu lẹ 19:5-8, etẹwẹ angẹli Jehovah tọn wà na Elija, podọ nawẹ mí sọgan hodo apajlẹ angẹli lọ tọn gbọn?

¹³ Nọ namẹ alọgọ he jẹ. Whenue yẹwhegán Elija họ̀njẹgbé nado whlẹn ogbẹ̀ etọn, e jẹflumẹ sọmọ bo biọ okú na ede. Jehovah do angẹli de hlan nado dla dawe he jẹflumẹ ehe pọ́n. Angẹli lọ na ẹn alọgọ he sin nuhudo e do. E na Elija núdùdù miyọ́nawu de bosọ dotuhomẹna ẹn nado dùnú. (Hia 1 Ahọlu lẹ 19:5-8.) Kandai enẹ bẹ nugbo họakuẹ de hẹn: To whedelẹnu nuyiwa homẹdagbe tọn kleun he wá do gànmẹ de sọgan wà dagbe susu. Awuwiwlena núdùdù de, nunina kleun de kavi wekanhlanmẹ mẹtọnhopọn tọn de na mẹmẹsunnu kavi mẹmẹyọnnu he jẹflumẹ de, na hẹn ẹn deji dọ mí yiwanna ẹn bosọ nọ hò etọn pọ́n. Vlavo eyin mí ma nọ voawu sọmọ nado dọhodo whẹho mẹdetiti tọn mẹdevo tọn kavi numọtolanmẹ sinsinyẹn tọn lẹ ji, mí gbẹ́ sọgan gọalọna mẹlọ to aliho devo ehelẹ mẹ.

14. Etẹwẹ mí sọgan plọn sọn kandai he gando Elija go mẹ?

¹⁴ Nọ gọalọna mẹhe tindo ayimajai lẹ nado voawu bo mọ yede to hihọ́ glọ. Mí sọgan sọ plọn nudevo sọn kandai he gando Elija go mẹ. To azọ́njiawu-liho, Jehovah na yẹwhegán lọ alọgọ he sin nuhudo e do nado zinzọnlin kaka yì Osó Holẹbi kọ̀n. Vlavo ahun Elija tọn na ko jẹdò to whenue e tin to lẹdo he to olá enẹ mẹ, yèdọ fie Jehovah basi alẹnu hẹ akọta etọn te to owhe kanweko susu lẹ die. E sọgan ko tindo numọtolanmẹ lọ dọ todin emi yin whinwhlẹn pete sọn alọ mẹhe jlo na wadanu do emi go lẹ tọn mẹ lo. Etẹwẹ mí sọgan plọn sọn ehe mẹ? Eyin mí jlo na miọnhomẹna mẹhe jiya ovivu zinzanhẹ tọn lẹ, e sọgan biọ jẹnukọn whẹ́ dọ mí ni gọalọna yé na ahun yetọn ni jẹdò. Di apajlẹ, mẹho lẹ dona hẹn do ayiha mẹ dọ mẹmẹyọnnu he tin to ayimajai mẹ de sọgan tindo numọtolanmẹ hihọ́ tọn bosọ voawu dogọ eyin ewọ tin to ninọmẹ he ma gbàhundona ẹn de mẹ po kọfanamẹnu kleun de po to owhé de gbè hugan dọ ewọ ni tin to abò pẹvi Plitẹnhọ Ahọluduta tọn de mẹ. E sọgan nọma yinmọ na mẹdevo.

15, 16. Etẹwẹ todoaitọ dagbe de yinyin bẹhẹn?

¹⁵ Nọ yin todoaitọ dagbe. Biblu na ayinamẹ he họnwun ehe dọmọ: “Mẹdopodopo dona nọ yawu nado dotoai, whleawu nado dọho.” (Jak. 1:19) Be mí nọ yin todoaitọ dagbe ya? Vlavo mí nọ saba pọ́n todidoai namẹ hlan di nuhe ma biọ ayidonugo sọmọ de, bo nọ lẹndọ e ma hugan nado to finẹ poun bo to mẹlọ pọ́n bosọ gbọṣi abọẹ. Ṣigba, todoaitọ dagbe yinyin bẹ nususu hẹn humọ. Di apajlẹ, Elija wá dọ numọtolanmẹ awufiẹsa tọn etọn lẹ na Jehovah, podọ Ewọ dotoaina ẹn ganji. Jehovah mọnukunnujẹemẹ dọ  Elija to budi, bo mọdọ emi to ṣokẹdẹ bosọ lẹndọ nuhe emi ko wà lẹpo yin ovọ́. Jehovah yí owanyi do na ayidonugo ahunmẹdunamẹnu etọn lẹ dopodopo. Gbọnmọ dali, Ewọ dohia dọ emi dotoaina Elija nugbonugbo.—1 Ahọ. 19:9-11, 15-18.

¹⁶ To whenue mí to todoaina mẹdevo lẹ, nawẹ mí sọgan do mẹtọnhopọn po awuvẹmẹ sisosiso po, he yin kunnudenu owanyi tọn lẹ hia gbọn? To whedelẹnu, hogbe kleun he yin didọ po wuntuntun po bo dozolanmẹnamẹ lẹ sọgan do numọtolanmẹ mítọn hia. A sọgan dọ nude taidi: “E vẹna mi taun dọ enẹ jọ do gowe! Ovivu de ma dona yin nuyiwa hẹ to aliho mọnkọ mẹ!” Vlavo a sọgan kàn kanbiọ dopo kavi awe sè nado hẹn ẹn diun dọ a mọnukunnujẹ nuhe mẹvivẹ he to awufiẹsa mẹ lọ to didọ mẹ. A sọgan kanse dọ, “Jaale, be a gán gọalọna mi nado mọnukunnujẹ nuhe dọ a te mẹ ganji ya?” kavi “Eyin n’mọnukunnujẹ nuhe dọ a te mẹ, be didọ a te dọ . . . Mọ wẹ ya?” Nuyiwa owanyi tọn mọnkọtọn lẹ sọgan hẹn mẹlọ deji dọ a to todoaina ẹn nugbonugbo, bo to vivẹnudo nado mọnukunnujẹ nuhe dọ e te mẹ.—1 Kọl. 13:4, 7.

17. Naegbọn mí dona nọ fahomẹ bo nọ “whleawu nado dọho”?

¹⁷ Ṣigba, nọ “whleawu nado dọho.” Ma gbòhódonù na mẹlọ nado na ẹn ayinamẹ kavi nado vọ́ pọndohlan etọn jlado blo. Podọ, nọ fahomẹ! Whenue Elija dọ nuhe to ahun ji na ẹn lẹ na Jehovah, e yí hogbe sinsinyẹn he do awufiẹsa etọn hia lẹ zan. To nukọn mẹ, whenue Jehovah ko hẹn yise Elija tọn lodo godo, yẹwhegán lọ vọ́ numọtolanmẹ etọn lẹ dọtọ́n bo yí hogbe dopolọ lẹ zan. (1 Ahọ. 19:9, 10, 13, 14) Etẹwẹ yin nuplọnmẹ lọ? To whedelẹnu, e nọ biọ dọ mẹhe tindo ayimajai lẹ ni dọ nuhe to ahun ji na yé tọ́n hugan whladopo. Taidi Jehovah, mí nọ jlo na yí homẹfa do dotoai. Kakati nado nọ to tintẹnpọn nado hẹn pọngbọ wá, mí nọ do mẹtọnhopọn po awuvẹmẹ sisosiso po hia.—1 Pita 3:8.

18. Nawẹ odẹ̀ mítọn lẹ sọgan miọnhomẹna mẹhe tin to awufiẹsa mẹ lẹ gbọn?

¹⁸ Nọ yí ahundopo do hodẹ̀ hẹ mẹhe to awufiẹsa mẹ lọ. Mẹhe jẹflumẹ lẹ sọgan nọ mọdọ emi ma penugo nado hodẹ̀. Yé sọgan nọ mọdọ emi ma jẹ nado dọnsẹpọ Jehovah. Eyin mí jlo na miọnhomẹna  omẹ mọnkọ de, mí sọgan hodẹ̀ hẹ ẹ bo donù yinkọ etọn go. Mí sọgan dọna Jehovah obá he mẹ mẹhe jẹflumẹ lọ họakuẹ na mí podọ na agun lọ jẹ. Mí sọgan biọ to Jehovah si nado de awufiẹsa lẹngbọ vivẹ́ etọn ehe tọn pò, bosọ miọnhomẹna ẹn. Odẹ̀ mọnkọtọn lẹ sọgan miọnhomẹnamẹ sisosiso.—Jak. 5:16.

19. Etẹwẹ sọgan gọalọna mí nado miọnhomẹna mẹdevo lẹ?

¹⁹ Nọ yí hogbe he nọ jlọmẹdote bo nọ miọnhomẹnamẹ lẹ zan. Nọ lẹnnupọn whẹpo do dọho. Ohó he yè ma lẹnnupọn whẹpo do dọ lẹ sọgan gbleawunamẹ. Hogbe homẹdagbe tọn lẹ sọgan jlọmẹdote. (Howh. 12:18) Enẹwutu, biọ alọgọ Jehovah tọn to odẹ̀ mẹ nado mọ hogbe homẹdagbe po homẹmiọnnamẹ po tọn lẹ gọna dehe sọgan de awufiẹsa mẹtọn pò lẹ. Hẹn do ayiha mẹ dọ hogbe depope ma tindo huhlọn sọ hogbe Jehovah lọsu titi tọn he tin to Biblu mẹ lẹ.—Heb. 4:12.

20. Nujikudo tẹwẹ ninọmẹ ylankan he mẹ mẹdelẹ jugbọn sọgan hẹn yé tindo, podọ etẹwẹ mí nọ jlo na flin yé?

²⁰ Mẹhe yin zinzanhẹ to ovu whenu delẹ sọgan kudeji dọ emi ko yin hinhẹnflu, yin nuvọ́nọ, kavi dọ mẹde ma yiwanna emi—bọ emi ma tlẹ yin mẹhe yè gán yiwanna. Lalo nankọ die! Enẹwutu, nọ yí Owe-wiwe lẹ zan nado flinnu yé dọ yé họakuẹ nugbonugbo to nukun Jehovah tọn mẹ. (Pọ́n apotin lọ “ Homẹmiọnnamẹ sọn Owe-Wiwe lẹ Mẹ.”) Flin lehe angẹli de yí homẹdagbe do hẹn yẹwhegán Daniẹli lodo do to whenue ewọ gbọjọ bosọ jẹflumẹ. Jehovah jlo dọ dawe he ewọ yiwanna enẹ ni yọnẹn dọ ewọ họakuẹ na emi. (Dan. 10:2, 11, 19) Mọdopolọ, mẹmẹsunnu gọna mẹmẹyọnnu mítọn he to awufiẹsa mẹ lẹ họakuẹ na Jehovah!

21. Etẹwẹ to tepọn ylanwatọ he ma lẹnvọjọ lẹpo to sọgodo, ṣigba etẹwẹ mímẹpo dona magbe nado to wiwà todin whẹ́?

²¹ Whenue mí to homẹmiọnna mẹdevo lẹ, mí nọ flinnu yé gando owanyi Jehovah tọn go. Podọ, mí ma dona wọn gbede dọ Jehovah sọ yin Jiwheyẹwhe whẹdida dodo tọn de. Nuyiwa danuwiwa tọn depope ma whlá do e. Jehovah nọ mọ popolẹpo, podọ ewọ ma na dike ylanwatọ he ma lẹnvọjọ lẹ ni nọma yin yasana. (Sọh. 14:18) Amọ́, todin whẹ́, mì gbọ mí ni nọ wà nuhe go mí pé lẹpo nado nọ do owanyi hia mẹhe ko jiya danuwiwa tọn lẹ. Humọ, homẹmiọnnamẹnu daho wẹ e yin nado yọnẹn dọ Jehovah na hẹn mẹhe go Satani po aihọn etọn po ko wadanu do lẹpo jẹgangan mlẹnmlẹn! To madẹnmẹ, onú he nọ hẹn awufiẹsa wá enẹlẹ depope ma nasọ gọwá ayiha kavi ahun mẹ gbedegbede ba.—Isa. 65:17.