1, 2. a) Kukwe niedre ni töi mikakäre jäme ye nita ribere jai, ¿ye erere ni raba nuainne ño ye kukwe meden tä bämike? b) ¿Monsotre ruäre yebätä kukwe meden tare tä nemen bare?

KUKWE niedre ni töi mikakäre jäme ye ni jökrä tä ribere jai aune ni raba ye erere nuainne ni mada kräke arato. Ñodre, monso chi tädre jadenkä ngwane matadre tibien ngukodokwä räkwäsädrekä ie, rikadre betekä muare kwärä ja driere rün o meye ie. Niaratre ñan raba miketa kwin akwa raba kukwe niere ie töi mikakäre jäme. Dre nibi bare ye ngwandretari kwetre ie, okwä ñöi sökadretre kwetre, küde kitadre ngärä kwetre aune kukwe niedre kwetre ie töi jämebiti aune träin bätädrete kwetre aune kräkäi mikadre kwetre. Ye ngwane monso ye raba nemen kwekebe aune raba nikenta jadenkä. Kä rikai ta ngwane ngukodokwä rabaita kwin.

² Akwa, monsotre ruäre tä ja tare nike bäri. Monsotre ruärebätä küdreta batibe o kä kwati krubäte te. Kukwe ye erere tä nemen bare ye köböite monsotre tä ja tare nike krubäte. Nitre ruäre tä küdrere monsobätä ye gata aune mikata ja ngie nuin, akwa mada abokän ñaka gata bengwairebe. Ni küdrekä monsobätä ye mikata ja ngie nuin, akwa monso ye tä ja tare nike jankunu nememe ünä.

3. a) Kukwe nieta 2 Corintios 1:3, 4 ye erere, ¿Jehová töita ño? b) ¿Kukwe meden meden ngwantarita abokän nibike mike gare jai?

³ Ni kristiano nämäne chi ye ngwane küdrebarebätä, ¿kukwe yebe täbe ja tuin akwa dre raba töi mike jäme? (Ñäkädre 2 Corintios 1:3, 4 yebätä). Erametre, oveja Jehovakwe taredre aune töi mikadre jäme ie niara tö. Ye medenbätä, kukwe ketamä ngwantarita abokän nibike mike gare jai: Nitre ruäre nämäne monsore ngwane küdrebarebätä, ¿ye ñobätä töi mikadre jäme tätre ribere jai? ¿Nire raba nitre ye töi mike jäme? Aune, ¿ni raba dre nuainne nitre ye töi mikakäre jäme?

4, 5. a) Monsotre kia ye töi ñaka ja erebe nitre niena ünä yebe, ¿ye ñobäta nikwe ngwandre törö jai? b) Küdreta monsotrebätä ye ngwane, ¿ñobätä ñaka tä nemen nuäre niaratre kräke tö ngwankäre ni madai?

⁴ Nitre ruäre nämäne monsore ngwane küdrebarebätä, kä nikanina kwati krubäte ta akwa niaratre töi mikadre jäme ye tätre ribere jai. Ñobätä kukwe ye tä nemen bare ye rabadre gare nie yekäre, käne monsotre kia ye töi ñaka ja erebe nitre niena ünä yebe ye nikwe ngwandre törö jai aune küdretabätä ye ngwane tätre ja tare nike bäri. Ani kukwe ye mike gare ruäre jai.

⁵ Nire nire tä monsotre ngübare yebe monsotre rabadre ja kete kwin aune tö ngwen ie. Ye köböire, jata nemen ruin kriemikani ietre aune tä nemen tö ngwen ni niaratre ngübaka ie (Sal. 22:9). Akwa, monso ye mräkätre aune ja ketamuko mräkätre yekwe ye arabe tätre küdrerebätä. Monso tä tö ngwen akwa kukwe ñaka kwin nuaintabätä ngwane, ¿dreta nemen bare? Ye köböite, ñaka raba nemen nuäre monso kräke tö ngwankäre ni madai kä kwati krubäte te.

6. ¿Küdreta monsotrebätä ye ñobätä käme krubäte?

⁶ Monsotre kia yebätä küdreta bäri. Monsotre kia mikata ja dibiti jabe jämi nemen ünä ja mäkätekäre ye ngwane, ye köböite tätre ja tare nike krubäte töite aune ja ngrabarebiti. Küdreta bätätre ye köböite niaratre ñaka tä nemen töbike kwin nitre tä nemen jabe yebätä, tätre ñaka töbike kwin jabätä o ni mada tö rökrai ken yebätä.

7. a) Nitre küdrekä monsobätä ye kräke, ¿ñobätä tä nemen nuäre monso ngökakäre aune tätre nuainne ño? b) ¿Kukwe ngwarbe nieta monsotre ie ye köböite dreta nemen bare?

⁷ Monsotre kia ye töi jämi ngitiekä kwin, kukwe meden kwin aune töbikadre ño metre ne kwe kukwe tare ñaka rabadre bare ye ñaka gare ietre (1 Cor. 13:11). Ye medenbätä, ni küdrekä monsobätä ye kräke tä nemen nuäre monso ngökakäre. Ni ye tä kukwe ngwarbe niere monso ie ye köböite monso tä ja tare nike krubäte, ñodre, niara ara köböite küdrebarebätä, ñaka ja driedre kwe ni madai, dre namani barebätä ye niedre kwe ngwane ni mada ñaka mikai era jai o nitre niena ünä tätre monsotre kia mike jabe ye abokän tä tarere metre tätre niere ie. Ye köböite nirebätä küdrebare yei kukwe ngwarbe niebare ye ñaka raba nüke gare ie kä kwati krubäte te. Monso ye ririadrera akwa ja tädre ruin käme ie, ja rabadre ruin ngwarbe ie aune ni mada ñaka raba tarere raba nemen ruin ie.

8. Nire nire tä ja tare nike ye Jehová raba töi miketa jäme, ¿ye ñobätä gare metre nie?

⁸ Nibira gare nie ye erere, monsotre kiabätä küdreta ye köböite niaratre tä ja tare nike kä kwati krubäte te. Kukwe ye käme krubäte. Kä nengwane küdreta krubäte monsotrebätä ye tä mike gare nita nüne kä krüte te, nitre “ñaka rabai ni mada tarere jire” aune nitre tä “ja bämike jerekäbe” rabai ja ngwen bäri käme (2 Tim. 3:1-5, 13, TNM). Diablu tä kukwe käme dätere aune kukwe meden tuin kwin ie ye erere nitre kä nebätä tä nuainne. Akwa Jehová ye bäri dite Satana aune nitre kukwe käme nuainkä ye kräke. Ne madakäre, Diablu tö kukwe meden nuain ye gare kwin Ngöböi. Ye medenbätä, nita ja tare nike ye gare kwin Ngöböi aune niara raba ni töi miketa jäme ie ni raba tö ngwen metre. “Nita ja tare nike bätäkä ngwarbe angwane, Ngöböta ni die mike amne tä kä miketa nuäre nibtä, ni mda mda tädre ja tare nike ño ño angwane, ni rabadre ni ye die mike amne kä miketa nuäre btä”, nita Ngöbö ye mike täte ye tä kä mike juto nibätä (2 Cor. 1:3, 4). ¿Nire mikata Jehovakwe ni töi mikakäre jäme?

9. Rei David kukwe tikani Salmo 27:10 ye erere, ¿nire mräkätre tä tuenmetre ye kräke Jehovakwe dre nuaindi?

⁹ Nire rün aune meye ñaka kriemikani yebätä küdrebare o mräkätre kwe arabe käkwe küdrebarebätä, metrere nitre ye töi mikadre jäme tätre ribere jai. Ni mada töi mikadre ño jäme  ye gare bäri kwin Jehovai ye nämäne gare rei David ie (ñäkädre Salmo 27:10 yebätä). * Nire mräkätre tä tuenmetre ye Ngöböta tarere ie David nämäne tödeke. ¿Jehovata nuainne ño? Tä nuainne nitre niara mikaka täte yebiti. Nitre konkrekasionte ye ni mräkä. Ñodre, nire nire nämäne Ngöbö mike täte ye abokän Jesús etebatre, ngwaitre aune meye niebare kwe (Mat. 12:48-50).

10. ¿Pablo nämäne sribire ni umbrere ye ngwane dre nuainbare kwe?

¹⁰ Kukwe ye kwrere tä nemen bare ño konkrekasionte ye ani mike gare jai. Apóstol Pablo nämäne sribire ni umbrere ngwane, nämäne sribire ja dibiti aune nämäne kukwe kwin bämike. Niara nämäne ja ngwen Kristo erere aune nitre kristiano rabadre ja ngwen niara erere ye niarakwe niedre ietre ye Ngöbökwe mikani tike (1 Cor. 11:1). Niara nämäne sribire ni umbrere ye ngwane, bati kukwe ne niebare kwe: “Ngäbäkre chi därebe meye kwe tä ngibiare kianbtä abko ben meyeta blite jäme, kwrere jire nunkwe blitaba jäme munbe” (1 Tes. 2:7). Ye erere arato, nire nire tä ja tare nike ye nitre umbre ja ngwanka metre tä kukwe niere töi mikakäre jäme ngwane, tätre nuainne Biblia yebiti aune tätre blite töi jämebiti bentre.

11. ¿Kukwe meden tä bämike ñan nitre umbre ji ngwanka aibe rabadre kukwe niere ni mada töi mikakäre jäme?

¹¹ Nitrebätä küdrebare ye nitre umbre ji ngwanka ye ñan aibe raba kukwe niere ietre töi mikakäre jäme. Ni jökrä rabadre kukwe nieta mäträkäre ne mike täte: “Munkwe blita ja die mikakäre kwärikwäri” (1 Tes. 4:18). Meritre Testiko ruäre ie kukwe niedre töi mikakäre jäme yekäre, meritre mada Testiko niena ünä kukwe ja üairebiti raba niaratre dimike. Ni meyere tä monso kwe töi mike jäme ye erere Jehovata ja bämike (Is. 66:13). Nitre ruäre nämäne ja töibikaire krubäte ye meritre ruäre käkwe dimikani ye kädrieta Bibliabätä (Job 42:11). Meritre Testiko ruäre tä töbike krubäte ye meritre ünä kukwe ja üairebiti tä kukwe niere ietre dimikakäre ye tä mate kwin Jehovabätä. Ruäre ngwane, nitre umbre ji ngwanka raba ngwentari käbube meri Testiko niena ünä kukwe ja üarebiti ie ne  kwe raba meri mada Testiko tä ja tare nike ye dimike o ñakare. *

12. Ni tädre ja mräkä iti dimike ye ngwane, ¿nikwe dre ngwandre törö jai?

¹² Erametre, ni tädre ja mräkä iti dimike ngwane kukwe meden abokänbätä ñan tö blitai ye nikwe ñaka ngwandretari ie (1 Tes. 4:11). Ye erere ngwane, ¿nitre tä ja di ribere aune töi mikadre jäme ye kräke ni raba dre nuainne? Kukwe ketarike abokän ni raba nuainne nieta Bibliakwe ye ani mike gare jai.

13. a) Kukwe nieta 1 Reyes 19:5-8 ye erere, ¿ángel Jehovakwe dre nuainbare Elías kräke? b) ¿Ángel kukwe bämikani ye erere ni raba ja ngwen ño?

¹³ Nitre tä dre ribere jai ye ererebätä dimikadre. Ni Ngöbö kukwei niekä Elías ngitiani ñobätä ñan aune ja nire kwe namani kukwe tare te, niara di nianinkä yebätä tö namani krütai. Ye ngwane, Jehovakwe ángel dite juani niara töi mikakäre jäme. Ángel yekwe mrö krube biani ni Ngöbö kukwei niekä ie aune mrö ye kwetadre kwe niebare kwe ie (ñäkädre 1 Reyes 19:5-8 yebätä). * Kukwe namani bare ye tä kukwe ütiäte driere nie: ruäre ngwane, ja mräkä tä ja tare nike ye kräke nita ja töi mike kwin ye raba dimike krubäte. Mrö biandre ie, jondron biandre ie o kukwe bökän tikadre ie täräbätä yebiti rabai gare ie nita niara tarere aune ni töitabätä. Kukwe meden ben nitre tä ja tuin o kukwe tare krubäte tä kisete yebätä ñaka nemen nuäre ni kräke blitakäre ben ngwane, nikwe kukwe ye erere nuaindre.

14. ¿Kukwe namani bare Elías yebätä ye tä dre driere nie arato?

¹⁴ Nitrebätä küdrebare ye nikwe dimikadre ne kwe ja rabadre ruin kwin ie aune töi rabadre jäme. Ani bliteta Elías yebätä. Jehovakwe niara dimikani jondron ñan tuabare yebiti ne kwe niara rikadre mente nemen ngutuä Horeb yekänti, ngutuä yekänti Ngöbökwe kukwe ükaninte juta kwe yebe siklo nikani ta yete. Elías nämäne mente nitre ja mikaka niara rüere yebätä, aisete ja namani ruin kriemikani ie raba ruin nie. ¿Kukwe meden ja töi kräke abokän ni raba mike gare jai arato? Nitrebätä küdrebare ye ni tö dimikai ngwane, käne niaratre ie ja rabadre ruin jäme. Ni itire itire ñaka töbike ja erebe ye nitre umbre ji ngwanka rabadre ngwen törö jai. Ñodre, meri Testiko iti ie ja raba nemen ruin kwin kabe ñain ja gwirete o kukwe ruäre nuainne töi jämebiti, akwa mada abokän ie ja raba nemen ruin kwin blitakäre Ju Ja Ükarakrö yete.

15, 16. ¿Ni mada kukwe nuadre kwin ye dre gärätä?

¹⁵ Nikwe ni mada kukwe nuadre kwin. Biblia tä mäträre krörö nibätä: “Ni jökrä käkwe ja mikadre juto jötrö ngwarbe ni kukwe nuare; akwa ni jökrä käkwe ñakare ja kada mikadre juto blitakäre jötrö ngwarbe” (Sant. 1:19, NGT). ¿Nita ni mada kukwe nuin kwin? Nita ni mada kukwe nuin ye abokän ni tädre kwekebe, ni mada tä blite ye ngwane mikadre ñärärä jerekäbe aune ñaka blitadre ni raba nemen nütüre. Akwa, ni mada kukwe nuadre kwin yekäre, ni raba kukwe mada nuainne. Jehovakwe dre nuainbare Elías kräke ye ani mike gare jai. Kukwe meden nämäne Elías mike ja töibikaire ye niebare jökrä kwe Ngöböi ngwane, Ngöbökwe kukwe nuani kwin. Ni Ngöbö kukwei niekä yebätä kä jürä nämäne, ja namani ruin kaibe ie aune dre dre nuainbare kwe ye ñaka namani ütiäte namani nütüre, ye nükani gare Ngöböi. Kukwe keteitire keteitire nämäne niara mike töbike yebätä Jehovakwe dimikani. Yebiti Ngöbökwe bämikani nämäne Elías kukwe nuin (1 Rey. 19:9-11, 15-18).

 ¹⁶ Nirebätä küdrebare ye ni tädre kukwe nuin ngwane, ¿nita ni ye tarere aune mike tuin bobre jai ye ni raba bämike ño? Nita töbike kwin kukwe niekäre ye raba ni ye dimike. Ni raba kukwe ne erere niere ie: “Kukwe namani bare mäbätä ye tare krubäte. Kukwe ye erere ñaka nuaindre monso kiabätä näre”. Aune tädre kukwe niere nie ye nüke gare nie ye nikwe bämikadre yekäre, nikwe ribedre ie raba kukwe ye niereta ne kwe rükadre gare bäri kwin nie o ni raba niere ie: “Mäkwe kukwe ye nini ngwane, nü gare kore tie..., ¿ñan ererea?”. Nikwe kukwe ye niedi ie ngwane, nikwe bämikai nita niara kukwe nuin kwin aune ja ruin ño ie ye nita mike nüke gare jai (1 Cor. 13:4, 7).

17. ¿Ñobätä nikwe ni mada ngübadre bätärekä aune ñaka blitadre kukweite ta?

¹⁷ Akwa, nikwe blitadre ngwane nikwe ja ngübadrebiti blitakäre. Ni mada tädre blite ye ngwane, nikwe ñaka blitadre kukweite ta mäträkärebätä o töi ükatekäre. Nikwe ni mada ngübadre bätärekä. Elías kukwe mikani gare Jehovai ngwane, kukwe meden nämäne niara mike ja töibikaire ye niebare metre kwe ie. Jehovakwe Elías dimikani tödeke bäri ngwane, Elías kukwe mikani gare ie ye arabe niebareta kwe ie (1 Rey. 19:9, 10, 13, 14). Ne tä mike gare nie, nire tä töbike krubäte ye raba kukwe meden tä kisete ye niereta bä kabre nie. Ye erere ngwane, Jehovakwe nuainbare ye erere, nikwe ni ye kukwe nuadre bätärekä. Kukwe ye ükadrete ño ye nikwe ñaka niedre, ñakare aune nikwe ni mada ye mikadre tuin bobre jai aune taredre (1 Ped. 3:8).

18. ¿Nitre tä ja tare nike ye kräke oradre ño abokän köböire töi raba nemen jäme aune ñobätä?

¹⁸ Nire tä ja tare nike yebe nikwe oradre ja brukwä tätebiti. Ni mada tä ulire ngwane ja ñaka raba nüke törö ie orasion nuainkäre. Ja ñaka raba nemen ruin kwin ie orakäre Jehovai. Ni tö ni ye dimikai ngwane, nikwe oradre ben ye ngwane, nikwe niara kädekadrete. Nita niara tarere aune konkrekasion tä tarere ye nikwe niedre orasionte Jehovai. Aune Ngöbökwe oveja kwe ütiäte ye dimikadre kukweta kisete yebätä ye nikwe ribedre ie. Nita orasion nuainne kore ngwane, ye raba ni mada töi mike jäme (Sant. 5:16).

19. ¿Dre raba ni dimike ni mada töi mikakäre jäme?

 ¹⁹ Kukwe meden raba ni mada dimike aune töi mike jäme ye nikwe niedre. Nikwe töbikadre kwin käne blitakäre. Kukwe nieta okwä kware ye raba mate tare ni madabätä, akwa blitata töi jämebiti ye tä ni mada miketa kwin (Prov. 12:18). Ye erere ngwane, ni raba ribere Jehovai ni dimikadre kwe kukwe nuäre abokän raba nitre tä ja tare nike ye dimike ye erere niere. Kukwe nieta Bibliabätä ye raba ni mada dimike bäri kwin ye nikwe ngwandre törö jai, ñobätä ñan aune kukwe ye kite Jehovakri (Heb. 4:12).

20. Kukwe ñaka kwin namani bare ye köböite, ¿nitre ruäre tä ja tare nike ye töi raba nemen ño aune ni tö dre ngwain törö ietre?

²⁰ Nitrebätä küdrebare mekerabe ye ruäre ie ja ñaka raba nemen ruin kwin aune ja raba nemen ruin käme ie bätä ni mada ñaka tä tarere raba nemen ruin ie. Ne madakäre, ni mada ñaka raba niara tarere jire raba nemen ruin ie. Ye abokän kukwe ngwarbe mikata era kwetre jai. Ye medenbätä, niaratre ye ütiäte Jehová kräke ye nikwe mikadre gare ietre Bibliabiti (recuadro “ Texto Bibliabätä ne tä nitre töi mike jäme” mikadre ñärärä). Daniel ni Ngöbö kukwei niekä ie ja namani ruin di ñakare aune ulire ye ngwane, dre namani bare ye nikwe ngwandre törö jai. Ngöbökwe ángel juani dimike, ñobätä ñan aune nämäne ütiäte Ngöbö kräke aune nämäne tarere ye rabadre gare ie (Dan. 10:2, 11, 19). Ye erere arato, ja mräkätre tä ulire ye Jehovata mike tuin ütiäte jai.

21. a) Nirekwe küdrebare monso kiabätä ye ñaka ja töi kwitai ngwane, ¿dre rabai barebätä? b) Köbö ye ngübakäre, ¿ni töi rabadre kwatibe dre nuainbätä?

²¹ Nita kukwe niere ni mada töi mikakäre jäme ye ngwane, Jehová ye Ngöbö ja tarekä ye nita ngwen törö ie. Aune Ngöbö ye kukwe ükatekä metre ye nikwe ñaka käi kwitadrekä jabiti arato. Nire tä küdrere ni madabätä ye ñaka raba ja üke Ngöbö okwä bäre mento. Kukwe jökrä tuin ie, nire käkwe küdrebare monso kiabätä ye ñaka ja töi kwitai ngwane mikai ja ngie nuin kwe (Núm. 14:18). Köbö ye ngübakäre, nikwe ja di ngwandre nirebätä küdrebare ye tarekäre. Nire nire tä ja tare nike Satana aune nitre gobrainta kwe ye kisete, ye Jehová köböra miketa kwin kärekäre ye tä ni töi miketa jäme. Kukwe tare namani bare ye ñaka rükaita törö nie aune ñaka rükaita ni brukwäte ye käi nibira ja ken (Is. 65:17).