1-2. (a) Oshihopaenenwa shilipi tashi ulike kutya ovanhu aveshe ova shitwa ve na omhumbwe yokuhekelekwa notava dulu yo okuhekeleka vamwe? (b) Ounona vamwe ohava yahamekwa ngahelipi?

OVANHU aveshe ova shitwa ve na omhumbwe yokuhekelekwa notava dulu yo okuhekeleka vamwe. Pashihopaenenwa, ngeenge okaana taka danauka, ndele take lidenge po nokuninga oshipute mongolo, otashi dulika ka lotokele kuxe ile kuina taka kwena. Ovadali itava ka velula oshipute, ndele otava ka hekeleka okaana. Otashi dulika va pule kutya owa ningwa shike, tave ka feta omahodi, tave ka hekeleke, notashi dulika nokuli va vaeke po omuti ile va mange po. Nokaana otaka ka mwena diva, notashi dulika ka ka twikilwe okudanauka. Noshipute otashi ka veluka mokweendela ko kwefimbo.

² Omafimbo amwe, ounona ohava yahamekwa meenghedi dinyanyalifi. Vamwe ohava hepekwa pamilele. Okaana otashi dulika ka hepekwe pamilele lumwe aluke, ile lwoikando oule womido dihapu. Kashi na nee mbudi kutya oka hepekwa pamilele monghedi ilipi, ohashi ka yahameke neenghono pamaliudo. Peemhito dimwe, nakuhepeka okaana oha mangwa po noha handukilwa. Ashike peemhito dimwe, nakuhepeka okaana oha faduka po. Ndele nande nakuhepeka okaana okwa mangwa po, okaana otashi dulika ka kale nouyahame fiyo osheshi ka kula.

3. Ngaashi sha popiwa mo 2 Ovakorinto 1:3, 4, ehalo laJehova olilipi, nomapulo elipi hatu ka konakona?

³ Ngeenge Omukriste oo a hepekelwe pamilele eshi a li okaana ota kondjo natango nouyahame wopamaliudo eshi a kula, oshike tashi dulu oku mu kwafela? (Lesha 2 Ovakorinto 1:3, 4.) Osha yela kutya Jehova okwa hala ovapiya vaye va ulikilwe  ohole nova pewe ehekeleko olo va pumbwa. Onghee natu ka konakoneni omapulo atatu: (1) Omolwashike ovo va hepekelwe pamilele eshi va li ounona va pumbwa ehekeleko? (2) Oolyelye tava dulu oku va hekeleka? (3) Ongahelipi hatu dulu oku va hekeleka?

4-5. (a) Omolwashike sha fimana okushiiva kutya ounona ova yooloka ko kovakulunhu? (b) Okuhepekwa pamilele otaku dulu okukuma ngahelipi etaleko lokaana li na sha nokulineekela vamwe?

⁴ Ovakulunhu vamwe ovo va hepekelwe eshi va li vanini, otashi dulika natango va pumbwa ehekeleko nonande opa pita omido dihapu. Omolwashike? Opo tu shi ude ko, tete otwa pumbwa okushiiva kutya ounona ova yooloka ko filufilu kovakulunhu. Luhapu onghedi omo ounona hava kumwa komahepeko oya yooloka ko kwaayo yovakulunhu. Natu ka konakoneni oihopaenenwa imwe.

⁵ Ounona ova pumbwa okukala ve na ekwatafano liwa nokulineekela ovo tave va tekula noku va fila oshisho. Ekwatafano la tya ngaho ohali kwafele ounona va kale ve udite va amenwa nova kale ve lineekela ovo ve va hole. (Eps. 22:9) Shinyikifa oluhodi, luhapu omahepeko ohaa ningilwa momaumbo, novapambele vopopepi nosho yo ookaume ovo unene ovahepeki. Ngeenge okaana oka hepekwa pamilele kuumwe oo ke lineekela, otashi ka kala shidjuu ke lineekele vamwe nonande opa pite omido dihapu.

6. Omolwashike okuhepekwa pamilele shi li oshinima shi nyanyalifi noshi yahameka?

⁶ Ounona ihava dulu okuliamena, nokuhepekwa pamilele oshi li oshinima shi nyanyalifi noshi yahameka. Okufininikila ounona momilele ofimbo vanini otashi dulu oku va yahameka neenghono. Okuhepeka ounona otaku dulu oku va ningifa va kale ve na etaleko lii li na sha nomilele, navo vene nosho yo ovo va hala okukala ookaume kavo.

7. (a) Omolwashike omuhepeki tashi dulika a heke nokuhepeka pamilele okaana noupu, nongahelipi ta dulu okuninga ngaho? (b) Oipupulu ya tya ngaho otai dulu okweeta oidjemo ilipi?

⁷ Ounona kave na naanaa eendunge dokudiladila, dokuninga omatokolo, ile dokudidilika nokuhenuka oshiponga. (1 Kor. 13:11) Onghee oshipu kovahepeki oku va heka. Ovahepeki ohava lombwele ounona oipupulu inyanyalifi, ngaashi kutya ounona ovo ve na epuko, nashi kale oshiholekwa, kape na oo ta ka pwilikina ile e na ko nasha ngeenge okaana oke shi lopota, ile kutya omilele pokati kovakulunhu nounona oku li onghedi yokuulikilafana ohole. Otashi pula omido dihapu opo okaana ka shiive kutya oinima aishe oyo oipupulu yongaho. Okaana ka tya ngaho otashi dulika ka kale taka diladila kutya ka ke na vali oshilonga, ka ke holike ile kape na ou te ka hekeleke.

8. Omolwashike hatu dulu okukala noushili kutya Jehova oha hekeleke ovo va yahamekwa?

⁸ Kashi kumwifa okushiiva kutya okuhepekwa pamilele otaku dulu okweeta ouyahame tau kalelele. Omunyonena oo owa nyika oshiponga neenghono. Omahepeko oo e li apeshe otaa ulike kutya otu li momafiku axuuninwa, pefimbo opo ovanhu vahapu ‘vehe nohole, ovanhu vai novakengeleledi tava ka ehena komesho mowii.’ (2 Tim. 3:1-5, 13.) Omakoto aSatana okwa nyika oshiponga, noshi nyemateka ngeenge umwe te lihumbata monghedi oyo tai mu hafifa. Ashike Jehova oku na eenghono e dule Satana nosho yo ovo have mu longele. Jehova oku shii omakoto aSatana. Oku shii filufilu okumona oixuna kwetu, nohe tu hekeleke. Otwa nangekwa noupuna eshi hatu longele ‘Kalunga kehekeleko alishe, ou te tu hekeleke moudjuu wetu aushe, opo tu shiive yo okuhekeleka ava ve li moudjuu keshe onehekeleko olo Kalunga ta hekeleke fye  vene.’ (2 Kor. 1:3, 4) Jehova oha longifa oolyelye va hekeleke vamwe?

9. She likolelela keendjovo dohamba David odo dili mEpsalme 27:10, oshike osho Jehova ta ka ningila ovo inava amenwa kovapambele?

⁹ Ovo inava amenwa kovadali vavo, ile ovo va hepekwa pamilele kovapambele, ovo unene va pumbwa ehekeleko. Omupsalme David okwa li e shii kutya Jehova oye omuhekeleki a denga mbada e shii okulineekelwa. (Lesha Epsalme 27:10.) David okwa li a tomhwa filufilu kutya Jehova oku li Xe yaavo va ungaungiwa navo nai kovapambele. Jehova ohe shi ningi ngahelipi? Oha longifa ovapiya vaye ovadiinini. Ovaitaveli vakwetu ove li onga ovapambele vetu. Pashihopaenenwa, Jesus okwa popya kutya ovo va li hava longele Jehova pamwe naye ove li ovamwaxe, ovamwaina nosho yo ina. — Mat. 12:48-50.

10. Omuyapostoli Paulus okwa li a ninga shike e li omukulunhuongalo?

¹⁰ Natu ka konakoneni oshihopaenenwa shi na sha nanghee oilyo yeongalo lopaKriste tai dulu okukala ya fa ovapambele vetu. Omuyapostoli Paulus okwa li omukulunhuongalo ha longo noudiinini. Okwa tula po oshihopaenenwa shiwa, nokwa li a nwefwa mo a lombwele vamwe ve mu hopaenene, ngaashi ye a hopaenena Kristus. (1 Kor. 11:1) Didilika nghee Paulus a li a popya kombinga yoilonga yaye e li omukulunhuongalo a ti: “Otwa holoka mokati keni nombili ngaashi ina omunyamifi ha tekula ouhanana vaye.” (1 Tes. 2:7) Ovakulunhuongalo ovadiinini kunena navo otava dulu okulongifa eendjovo donghenda nodombili eshi tava longifa Ombiibeli va hekeleke vamwe.

11. Oshike tashi ulike kutya ovakulunhuongalo havo ashike tava dulu okuhekeleka vamwe?

¹¹ Ovakulunhuongalo mbela ovo ashike va pumbwa okuhekeleka ovo va ninga oihakanwa ile tu tye ovo va hepekwa pamilele? Ahowe. Atushe otu na oshinakuwanifwa ‘shokuhekelekafana.’ (1 Tes. 4:18) Ovamwameme ovo va pyokoka otava dulu okutwa omukumo ovamwameme ovo va pumbwa ehekeleko. Jehova Kalunga okwe lifaafanifa naina oo ta hekeleke omona. (Jes. 66:13) MOmbiibeli omu na  oihopaenenwa yovakainhu ovo va li va hekeleka ovo va li momaudjuu. (Job 42:11) Jehova oha kala a hafa ngeenge ovakainhu Ovakriste kunena tava hekeleke ovamwameme ovo tava mono oixuna. Omafimbo amwe, ovakulunhuongalo otashi dulika va pule omumwameme oo a pyokoka a kwafele omumwameme oo ta mono oixuna. *

12. Otu na okuhenuka okuninga shike?

¹² Natu kale twa lungama tuha pule oinima oyo Ovakriste vakwetu inava hala okupopya kombinga yayo. (1 Tes. 4:11) Oshike twa pumbwa okuningila ovo va pumbwa ekwafo nehekeleko? Natu ka konakoneni eenghedi nhano dopaMbiibeli omo hatu dulu okuhekeleka vamwe.

13. Ngaashi sha popiwa me 1 Eehamba 19:5-8, omweengeli waJehova okwa li a ningila Elia shike, nongahelipi hatu dulu oku mu hopaenena?

¹³ Yandja ekwafo tali wapalele. Eshi omuprofeti Elia a li ta faduka po a ka xupife omwenyo waye, okwa li a teka omukumo nokwa li e lihalela okufya. Jehova okwa li a tuma omweengeli omunaenghono a ye komulumenhu oo a teka omukumo. Omweengeli okwa li e mu pa ekwafo tali wapalele. Okwa li a pa Elia oikulya nokwa li e mu lombwela a lye. (Lesha 1 Eehamba 19:5-8.) Mehokololo olo omu na oshili ya fimana, kutya: Omafimbo amwe oshinima shi li paunafangwa osho twa ningila umwe otashi dulu okukala ekwafo linene kuye. Ohatu dulu okuulika kutya otu hole ovamwatate novamwameme ovo tava mono oixuna moku va ningila sha, ngaashi oku va telekela, oku va pa oshali ile oku va shangela okakalata ketwomukumo. Ngeenge ohatu mono shidjuu okupopya kombinga yomaliudo avamwe, ohatu dulu okuulika kutya otu na ko nasha moku va pa ekwafo tali wapalele.

14. Oshike hatu lihongo mehokololo laElia?

¹⁴ Kwafela ovo va hepekwa pamilele va kale ve udite va amenwa nova manguluka. Ohatu dulu okulihonga sha mehokololo laElia. Jehova okwa li a kwafela omuprofeti pashikumwifilonga a ende oshinano shile a yuka komhunda yaHoreb. Otashi dulika Elia a li e udite a amenwa e shi a li konhele oyo ya li kokulekule oko Jehova a li a ningila ehangano noshiwana shaye monakudiwa. Otashi dulika a li e udite kutya oku li kokule novanhu ovo va li va hala oku mu dipaa. Oshike hatu dulu okulihonga moshihopaenenwa osho? Ngeenge otwa hala okuhekeleka ovo va ninga oihakanwa, otwa pumbwa tete oku va kwafela va kale ve udite va amenwa. Pashihopaenenwa, ovakulunhuongalo ove na okukaleka momadiladilo kutya omumwameme oo a hepekwa pamilele otashi dulika a kale e udite a amenwa nokwa manguluka ngeenge tava nu otee keumbo shi dulife okukala mokanduda okativali mOlupale lOuhamba. Umwe otashi dulika a kale a hala okupopila pOlupale lOuhamba nghee a hepekwa pamilele.

15-16. Oshike sha kwatelwa mo mokukala omupwilikini muwa?

¹⁵ Kala omupwilikini muwa. MOmbiibeli omu na omayele mawa taa ti: “Omunhu keshe na kale ha endelele okupwilikina, ne liteelele mokupopya.” (Jak. 1:19) Mbela otu li ngoo ovapwilikini vawa? Otashi dulika tu diladile kutya okukala omupwilikini muwa okukala ashike hatu tale komunhu oo ta popi nopehe na okutya sha. Ashike okukala omupwilikini muwa osha kwatela mo shihapu. Pashihopaenenwa, Elia okwa li a mbubulila Jehova omaliudo aye, na Jehova okwa li e mu pwilikina nawa. Jehova okwa li a mona kutya Elia okwa li a tila, e  udite e li oye aeke nota diladila kutya oilonga yaye aishe oya li yongaho. Okwa li e mu kwafela a finde omaliudo a tya ngaho. Okwa li a ulika kutya okwa pwilikina shili kuElia. — 1 Eeh. 19:9-11, 15-18.

¹⁶ Ngeenge hatu pwilikine komumwatate ile komumwameme, ongahelipi hatu dulu okuulika kutya otu mu uditile oukwao wananghali nosho yo olukeno? Omafimbo amwe, oitya ya hoololekeka otai dulu okuulika nghee tu udite. Oto dulu okutya: “Ombili eshi wa ningilwa oshinima osho. Ounona kave na okuungaungwa navo monghedi oyo.” Oto dulu okupula epulo limwe ile avali opo u shilipaleke kutya ou udite ko eshi kaume oo a nyemata a hala okutya. Oto dulu okupula kutya, “Owa hala naanaa okutya ngahelipi?” ile “Eshi wa ti ngaho, onda fika pexulifodiladilo kutya . . . Ondi li tuu mondjila?” Omapulo a tya ngaho opahole otaa dulu okutomha omunhu kutya owe mu pwilikina nawa, noto kendabala okuuda ko osho a hala okutya. — 1 Kor. 13:4, 7.

17. Omolwashike twa pumbwa okukala ovalididimiki ‘nokuliteelela mokupopya’?

¹⁷ Kala wa lungama u kale ho “liteelele mokupopya.” Kala omulididimiki. Eshi Elia a li ta mbubulile Jehova omutima waye, okwa li a wililwa po nokwa popya a handuka. Konima eshi Jehova a pameka eitavelo laElia, okwa li vali a popya omaliudo aye, ta longifa eendjovo da faafana. (1 Eeh. 19:9, 10, 13, 14) Osho otashi tu hongo shike? Omafimbo amwe, ovo va wililwa po ova pumbwa okupopya omaliudo avo lwoikando. Ngaashi Jehova, otwa pumbwa okukala hatu pwilikine nelididimiko. Ponhele yoku va lombwela nghee ve na okukandula po oupyakadi wavo, otwa pumbwa oku va udila oukwao wananghali nosho yo olukeno. — 1 Pet. 3:8.

18. Ongahelipi omailikano etu taa dulu okukala ehekeleko kwaavo ve li moupyakadi?

¹⁸ Ilikana pamwe naao e li moupyakadi. Ovo va wililwa po otashi dulika va mone shidjuu okwiilikana. Otashi dulika umwe a kale e wete  inaa wana okupopya naJehova. Onghedi imwe hatu dulu oku mu hekeleka, omokwiilikana pamwe naye hatu tumbula edina laye. Meilikano olo, ohatu dulu okulombwela Jehova kutya tu li eongalo, otu hole omumwameme ile omumwatate oo a wililwa po. Ohatu dulu okupula Jehova a kwafele noku hekeleke omupiya waye. Omailikano a tya ngaho otaa dulu okukala ehekeleko linene. — Jak. 5:16.

19. Oshike tashi dulu oku tu kwafela tu hekeleke vamwe?

¹⁹ Longifa eendjovo odo tadi velula notadi hekeleke. Diladila ofimbo ino popya. Eendjovo inadi diladilwa nawa otadi dulu okuyahameka vamwe. Eendjovo donghenda otadi dulu okuvelula vamwe. (Omayel. 12:18) Onghee ilikana kuJehova e ku kwafele u longife eendjovo donghenda notadi hekeleke. Dimbuluka kutya eendjovo daJehova odo di li mOmbiibeli odo unene di na eenghono. — Heb. 4:12.

20. Oshike osho vamwe ovo va hepekwa pamilele tashi dulika ve lidiladilile, notu na oku va dimbulukifa shike?

²⁰ Ovamwatate novamwameme ovo va hepekwa pamilele otashi dulika va kale ve udite va nyata, vehe na oshilonga, ile inava wana okukala ve holike. Oyo kai fi tuu oipupulu itoka tootoo! Onghee longifa Ombiibeli u va dimbulukife kutya Jehova oku va hole unene. (Tala oshimhungu “ Ehekeleko olo hali di mOmishangwa.”) Dimbuluka nghee omweengeli a li a pameka omuprofeti Daniel eshi a li a wililwa po. Jehova okwa li a hala omulumenhu oo a shiive kutya oku na ondilo momesho aye. (Dan. 10:2, 11, 19) Sha faafana, ovamwatate novamwameme ovo va wililwa po ove na ondilo momesho aJehova.

21. Oshike tashi ka ningilwa ovalongi vowii ovo inave lidilulula, notu na okukala twa tokola okuninga shike fimbo twa teelela?

²¹ Ngeenge hatu hekeleke vamwe, ohatu va dimbulikifa kutya Jehova oku va hole. Inatu dimbwa kutya Jehova oku li Kalunga omuyuki. Jehova oku shii keshe umwe oo a li a hepekwa pamilele, nokuli nonande kape na oo e shi shii. Oha mono keshe shimwe, novalongi vowii ovo inave lidilulula ote ke va handukila. (Num. 14:18) Fimbo twa teelela, natu ulikile ohole aveshe ovo va hepekwa pamilele. Shikwao vali, otashi hekeleke okushiiva kutya Jehova ota ka velula aveshe ovo va kala nokuhepekwa kuSatana nounyuni waye. Mafiku, oinima aishe oyo iyahameka itai ka dimbulukiwa vali. — Jes. 65:17.