1-2. а) Кʹижан мәсәлә дьдә кʹьфше, ԝәки мәрьв һʹәԝще бәрдьлийе нә у кӧ фәрәсәте ԝан һәйә бәр дьле һәвда бен? б) Һьнә зарʹ чь зийанәкә мәзьн дьстиньн?

МӘРЬВ ӧса һатьнә әʹфьрандьне кӧ һʹәԝще бәрдьлийе нә у һьн жи нав ԝанда жи һәйә әԝ фәрәсәт, кӧ бәр дьле мәрьвада бен. Бәʹса хәбәре, чахе зарʹа бьчʹук ԝәʹде листьке дькʹәвә у чока ԝи дьһʹәрьшә, әԝ дьгьри у дьрʹәвә бал де йан баве хԝә. Де-бав рʹаст ә нькарьн бьрина зарʹе ԛәнщ кьн, ле бәр дьле ԝида тен. Әԝана дьпьрсьн кӧ чь ԛәԝьми, һесьред ԝи тʹәмьз дькьн, гьлийед ширьн жерʹа дьбежьн у ԝи һʹәмез дькьн. Паше әԝана бьрина ԝи ида дәрман дькьн йан гьредьдьн. Зарʹ ида һеса дьбә у нагьри, у дьбәкә диса бәрдәԝам дькә бьлизә. Ԝәʹдә дәрбаз дьбә у бьрина ԝи жи ԛәнщ дьбә.

² Ле щара һьнә зарʹ зийана һе мәзьн дьстиньн, мәсәлә, чахе рʹасти зорбәтийа сексуали тен. Һьнә зарʹ тʹәне щарәке рʹасти ве йәке һатьнә, ле һьнәк жи бь сала рʹасти ве зорбәтийе тен. Фьрԛи тʹӧнә чьԛас щар әԝана рʹасти ве йәке һатьнә, әԝ һʹәму зарʹ зийана психоложи дьстиньн, дьле ԝан бьриндар дьбә у еша дьле ԝан гәләк ԝәхт дәрбаз набә. Щара әԝед кӧ зорбәти зарʹа кьрьнә, тенә щәзакьрьне у дькʹәвьнә кәле, щара жи ӧса те кʹьфше, кӧ әԝана жь щәзакьрьне хьлаз бунә. Ле һәрге жи әԝ мәрьв те щәзакьрьне, йәкә зийана кӧ әԝи дайә зарʹе, сәр зарʹе бь сала жи дькарә бьминә.

3. Чаԝа 2 Корьнтʹи 1:3, 4-да те готьне, ԛьрара Йаһоԝа чь йә, у кʹижан пьрса әме ве готареда шеԝьр кьн?

³ Ле һәрге Мәсиһик, бьчʹуктайеда рʹасти зорбәртийе һатийә у һʹәта иро жи бьрина дьле ԝи, ԝи дешинә, чь дькарә али ԝи бькә? (Бьхунә 2 Корьнтʹи 1:3, 4.) Йаһоԝа дьхԝазә у әԝ ԛьрара ԝи йә, ԝәки хьзмәткʹаред ԝи һʹьзкьрьне у дьлбинийе бьстиньн. Ләма ԝәрә әм шеԝьр кьн се пьрса: 1) Чьрʹа әԝед кӧ бьчʹуктайеда рʹасти зорбәтийа сексуали һатьнә,  һʹәԝще бәрдьлийе нә? 2) Кʹе дькарә дьлбинийе бьдә ԝан? 3) Әм ча дькарьн бәр дьле ԝанда бен?

4-5. а) Чьрʹа фәрз ә әм фәʹм кьн, ԝәки зарʹ жь мәрьвед мәзьн щӧдә дьбьн? б) Чаԝа зорбәти сәр итʹбарийа зарʹе һʹӧкӧм дькә?

⁴ Һьнә мәрьвед мәзьн, йед кӧ бьчʹуктайеда рʹасти зорбәртийа сексуали һатьнә, дьбәкә һәла һе паши гәләк сала жи һʹәԝще бәрдьлийе бьн. Чьрʹа? Сәва әм ве йәке фәʹм кьн, пешийе лазьм ә бьзаньбьн кӧ зарʹ жь мәрьвед мәзьн гәләк щӧдә дьбьн. Чахе зарʹ рʹасти зорбәтийа сексуали тен, әԝ йәк щурʹәки майин сәр ԝана һʹӧкӧм дьбә, ле чахе мәзьн рʹасти ве йәке тен, сәр ԝана щурʹәки дьн һʹӧкӧм дьбә. Дина хԝә бьдьнә чәнд мәсәла.

⁵ Зарʹ гәрәке итʹбарийа хԝә ԝан мәрьва биньн, йед кӧ ԝана мәзьн дькьн у хԝәй дькьн, у ӧса жи тʹәви ԝан незик бьн. Бь сайа ве йәке, зарʹ хԝә хԝәйкьри тʹәхмин дькә у һин дьбә, ԝәки итʹбарийа хԝә мәрьвед майин жи бинә, йед кӧ ԝи һʹьз дькьн (Зәб. 22:9). Ле йазьх, гәләк щар зорбәтийа сексуали ве маледа дьԛәԝьмә кʹидәре зарʹ дьжи, чьмки һʹәчʹи зәʹф зорбә нәфәред мале нә йан жи һәвалед малбәте нә. Чахе мәрьве незик зорбәтийе зарʹе дькә, зарʹ ида итʹбарийа хԝә һьндава мәрьва ӧнда дькә, у һәла һе жи гәләк сал дәрбаз дьбә, әԝ диса жи ԝи һʹалида нә.

6. Чьрʹа зорбәтийа сексуали берʹәʹмти у зийандар ә?

⁶ Зарʹ хԝәха нькарьн хԝә хԝәй кьн, ләма зорбәтийа сексуали һьндава ԝанда берʹәʹмти у зийандар ә. Чахе зоре зарʹа дькьн кӧ тьштед сексуали бькьн, ле әԝана һе физикида, емосийалида у һʹьшда һазьр ниньн бона һәләԛәтийа сексуали у зәԝаще, демәк һе гьһишти ниньн, зарʹ зийана мәзьн дьстиньн. Зорбәти ӧса жи дькарә ньһерʹандьна зарʹа сәр сексе, хьраб кә. Зарʹ ӧса жи дькарьн хԝә ньмьз һʹәсаб кьн у ида итʹбарийа хԝә һьндава мәрьва ӧнда кьн.

7. а) Чьрʹа мәрьвед зорбәрʹа һеса йә зарʹа бьхапиньн, у ча әԝана зарʹа дьхапиньн? б) Ахьрийа ԝан дәрәԝа дькарә чь бә?

⁷ Зарʹ щерʹьбанди ниньн у нькарьн хофе тʹәхмин кьн, йан жи тедәрхьн (1 Корн. 13:11). Ләма жи мәрьвед зорбә һеса зарʹа дьхапиньн. Әԝана дәрәԝед хоф зарʹарʹа дьбежьн. Мәсәлә, дьбежьн ԝәки ве зорбәтийеда зарʹ нәһәԛ ә, әԝ гәрәке кәсәкирʹа нәбежә, йан жи һәрге әԝ бежә, ԝе ԝи баԝәр нәкьн. Һьнәк жи зарʹа дьхапиньн, кӧ йанчь әԝ йәк тьштәки нормал ә, чьмки әԝ әʹйанкьрьна һʹьзкьрьне йә. Зарʹ бь гәләк сала әԝан дәрәԝа баԝәр дькә у паше фәʹм дькә, ԝәки әԝ һатийә хапандьне. Әԝ зарʹ чахе мәзьн дьбә, дькарә хԝә һʹәсаб кә кӧ әԝ һʹәрам ә, у нәһежайи һʹьзкьрьне у бәрдьлийе йә.

8. Чьрʹа әм гәрәке дӧдьли нәбьн, ԝәки Йаһоԝа дькарә бәрдьлийе бьдә ԝан, йед кӧ кӧл-дәрда дькʹьшиньн?

⁸ Мә дит ԝәки зийана жь зорбәтийа сексуали гәләк ԝәхт дьминә. Рʹасти жи әԝ зӧлмикә гәләк мәзьн ә! Әԝ йәк кӧ зорбәтийа зарʹа гәләк бәлабуйи йә, әшкәрә нишан дькә, ԝәки әм рʹожед ахьрийеда дьжин, ләма мәрьв «дьлсар» ьн у «мәрьвед хьрабә хԝәйифел» хьрабийеда пешда дьчьн (2 Тимтʹ. 3:1-5, 13). Нетед Шәйтʹан бь рʹасти зӧлм ьн, у чьԛас хьраб ә чахе мәрьв тьштед ӧса дькьн, кӧ дьле Шәйтʹан хԝәш тен. Ле Йаһоԝа жь Шәйтʹан у хьзмәткʹаред ԝи гәләк ԛәԝаттьр ә. Йаһоԝа һаш кьред Шәйтʹан һәйә. Ләма әм гәрәке дӧдьли нәбьн, кӧ әԝ занә әм чь кӧл-дәрда дькʹьшиньн, у дькарә бәрдьлийе бьдә мә. Әм рʹасти жи кʹәрәмкьри нә, кӧ хьзмәт дькьн Хԝәдейе һʹәму бәрдьлийерʹа. «Әԝ нава һʹәму тәʹли-тәнгийада дьл дьдә бәр мә, ԝәки әм жи бькарьбьн дьл бьдьнә бәр ԝан, йед кӧ нава һәр щурʹә тәʹли-тәнгийада нә, бь ԝе  бәрдьлийе, пе кʹижане әм хԝәха жь Хԝәде тенә бәрдьликьрьне» (2 Корн. 1:3, 4). Ле Йаһоԝа бь сайа кʹе бәрдьлийе дьдә?

9. Ль гора гьлийед Даԝьд жь Зәбур 27:10, Йаһоԝа ԝе чь бькә бона ԝан, нәфәред кʹижана хьраб ьн һьндава ԝанда?

⁹ Һьнә де-бава зарʹед хԝә жь зорбәтийа сексуали хԝәй нәкьрьнә, йан жи әԝ йәк пьшт гӧһе хԝәва авитьнә. Илаһи әԝ зарʹ у ӧса жи йед кӧ алийе мәрьвед незикда рʹасти зорбәтийе һатьнә, һʹәԝще бәрдьлийе нә. Даԝьде зәбурбеж заньбу, ԝәки Йаһоԝа һәйә канийа бәрдьлийейә лапә баш. (Бьхунә Зәбур 27:10.) Даԝьд баԝәр дькьр, ԝәки Йаһоԝа ԝе ԝана бькә бьн пʹәре хԝә, нәфәред кʹижана хьраб  ьн һьндава ԝанда. Ле Йаһоԝа ча бәр дьле ԝанда те? Әԝ ве йәкеда хьзмәткʹаред хԝәйи амьн дьдә хәбате. Хушк-бьред мә, малбәта мәйә рʹӧһʹани нә. Мәсәлә, Иса әԝед кӧ тʹәви ԝи Йаһоԝарʹа хьзмәт дькьрьн, нав дькьр ча бьра, де у хушк (Мәт. 12:48-50).

10. Чаԝа Паԝлос шьхӧле хԝәйи рʹуспитийе шьровәкьр?

¹⁰ Дина хԝә бьдьнә мәсәле, кӧ чаԝа щьват дькарә бьбә мина малбәте. Паԝлосе шанди мәрьвәки хәбатһʹьз у рʹуспики амьн бу. Әԝи мәсәләкә баш һиштийә, у һәла һе жи дьготә хушк-бьра, ԝәки чʹәʹв бьдьнә ԝи, чьмки әԝи чʹәʹв дьда Иса (1 Корн. 11:1). Дина хԝә бьдьне кӧ Паԝлос шьхӧле хԝәйи рʹуспитийе ӧса шьровәкьр: «Әм нава ԝәда рʹунәрм бунә, чаԝа кәваник кӧ зарʹед хԝәрʹа дьрʹьщьфә» (1 Тʹеслн. 2:7). Иро жи гава рʹуспийед амьн пе Кʹьтеба Пироз бәр дьле ԝанда тен, йед кӧ һʹәԝщә нә, гәрәке тʹәви ԝан пе гьлийед ширьн, нәрм у дьлшәԝат хәбәр дьн.

11. Чь дьдә кʹьфше ԝәки нә тʹәне рʹуспи гәрәке бәрдьлийе бьдьн?

¹¹ Ле гәло тʹәне рʹуспи гәрәке бәр дьле ԝанда бен, йед кӧ рʹасти зорбәтийе һатьнә? На. Һәр кәс жь мә борщдар ә, ԝәки «бәр дьле һәвда» бен (1 Тʹеслн. 4:18). Илаһи хушкед рʹӧһʹанида гьһишти дькарьн гәләк дьлбинийе бьдьнә ԝан хушка, кӧ рʹасти зорбәтийе һатьнә. Биньн  бира хԝә, Кʹьтеба Пирозда Йаһоԝа Хԝәде хԝә бәрамбәри де дькә, йа кӧ бәр дьле кӧрʹе хԝәйи бьчʹукда те (Иша. 66:13). Кʹьтеба Пирозда гәләк мәсәлед ԝан жьна һәнә, йед кӧ ԝәʹде тәнгасийа дьлбини дьданә мәрьва (Иб. 42:11). У дьле Йаһоԝа гәләк ша дьбә, чахе дьвинә ԝәки хушк бәр дьле ԝан хушкада тен, йед кӧ емосийалида хԝә хьраб тʹәхмин дькьн! Һьнә дәрәщада, рʹуспи дькарьн хушкәкә гьһиштирʹа башԛә бежьн, ԝәки али фьлан хушке бькә у дьлбинийе бьдә ԝе. *

12. Әм гәрәке чьда фәсал бьн?

¹² Һәрге әԝ Мәсиһи нахԝазә мәрʹа гьли кә дәрһәԛа хԝә, һәмьки әм гәрәке фәсал бьн, кӧ нәкʹәвьнә нав шьхӧле ԝан, у ԝан пьрса нәдьнә ԝан, щаба кʹижана әԝана нахԝазьн мәрʹа бежьн (1 Тʹеслн. 4:11). Ле чь әм дькарьн бькьн бона ԝан, йед кӧ дьхԝазьн аликʹари у бәрдьлийе бьстиньн? Ԝәрә әм сәр һʹиме Кʹьтеба Пироз пенщ тьшта шеԝьр кьн у пебьһʹәсьн ча әм дькарьн али ԝан бькьн.

13. Чаԝа 1 Пʹадшати 19:5-8-да те гьликьрьне, Йаһоԝа бона Елйас бь сайа мәләкәки чь кьр, у чаԝа әм дькарьн чʹәʹв бьдьнә ԝи мәләки?

¹³ Пе кьред хԝә али ԝан бькьн. Чахе Елйас пʹехәмбәр дьрʹәвийа сәва әʹмьре хԝә хьлаз кә, әԝ ӧса дьлтәнг бу, ԝәки хԝәрʹа мьрьн дьхԝәст. Йаһоԝа мәләкәки ԛәԝи шанд сәва тʹәсәлийа ԝи бькә. Әԝи мәләки ве йәкеда али Елйас кьр, чьда әԝ һʹәԝщә бу. Әԝи хԝарьнәкә гәрм да Елйас у бь нәрми жерʹа гот ԝәки бьхԝә. (Бьхунә 1 Пʹадшати 19:5-8.) Әԝ сәрһати нишан дькә, ԝәки щара ԛәнщикә бьчʹук дькарә гәләк кʹаре бинә. Мәсәлә, хԝарьн, пʹешкʹешәкә бьчʹук йан жи нәʹмә, кʹижанеда гьлийед ширьн у дьлшәԝати ньвисар ьн, дькарә һʹьзкьрьн у хәмкьрьна мә һьндава ԝанда, бьдә кʹьфше. Һәрге мәрʹа чәтьн ә хәбәр дьн дәрһәԛа тьштед ԝани шәхси, йан жи дәрәща ԝан кӧ ешәкә ӧса мәзьн анийә, әм бь кьред бьчʹук дькарьн али ԝан бькьн.

14. Әм чь дәрсе дькарьн һин бьн жь сәрһатийа Елйас?

¹⁴ Ӧса бькьн ԝәки әԝ мәрьве дьлтәнг, хԝә хԝәйкьри у рʹьһʹәт тʹәхмин кә. Жь сәрһатийа Елйас әм дькарьн дәрсәкә дьн жи һин бьн. Йаһоԝа бь кʹәрәмәт али ԝи пʹехәмбәри кьр, ԝәки һʹәта Чʹийайе Һорәб һәрʹә. Ԝи щийе дур у башԛә, кʹидәре Йаһоԝа бь ԛьрʹна пешда пәйман тʹәви щьмәʹта хԝә гьредабу, Елйас хԝә рʹьһʹәт тʹәхмин дькьр. Әԝи дьбәкә тʹәхмин дькьр, ԝәки әԝед кӧ дьхԝәстьн ԝи бькӧжьн, дур ьн у нькарьн бьгьһижьнә ԝи. Әм чь дәрсе дькарьн жь ве йәке һин бьн? Һәрге әм дьхԝазьн дьлбинийе бьдьнә мәрьвед кӧ рʹасти зорбәтийе һатьнә, пешийе әм гәрәке ӧса бькьн сәва әԝана хԝә рʹьһʹәт тʹәхмин кьн. Бәʹса хәбәре, рʹуспи гәрәке бир нәкьн, ԝәки хушка кӧ дьлбьриндар ә дькарә малда хԝә һе рʹьһʹәт у баш тʹәхмин кә, нә кӧ Ода Щьватеда, ле кәсәк жи дьбәкә Ода Щьватеда дьһа хԝә рʹьнд тʹәхмин кә.

15-16. Чь те һʹәсабе бьбьнә гӧһдарванед баш?

¹⁵ Гӧһдарванед баш бьн. Кʹьтеба Пироз ширәтәкә зәлал дьдә: «Бьра һәр мәрьв бьһистьнеда сәрхԝә бә» (Аԛуб 1:19). Дьбәкә әм дьфькьрьн, ԝәки рʹьнд гӧһ бьдьнә мәрьва, әԝ те һʹәсабе чʹәʹве мәрьва бьньһерʹьн у тьштәки нәбежьн. Ле тʹәне әԝ йәк нинә. Мәсәлә, чахе Елйас кӧла дьле хԝә Йаһоԝарʹа рʹет, Йаһоԝа рʹьнд гӧһ да ԝи. Йаһоԝа заньбу, ԝәки тьрсе Елйас гьртьбу, әԝи хԝә тʹәне тʹәхмин дькьр, у дьфькьри ԝәки һʹәму шьхӧле ԝи пʹучʹ бу. Хԝәде бь һʹьзкьрьн али ԝи кьр, ԝәки дәрде ԝи сьвьк кә. Бь ве йәке Йаһоԝа да кʹьфше, ԝәки бь рʹасти гӧһ да Елйас (1 Пʹадш. 19:9-11, 15-18).

¹⁶ Чахе әм гӧһ дьдьнә ԝан мәрьва, ча әм дькарьн дьлбинийе бьдьнә ԝан? Щара чәнд  гьлийед лайиԛ у дьлгәрми, дькарьн нишан кьн, кӧ әм бона ԝан бәрхԝә дькʹәвьн. Әм дькарьн ԝанрʹа бежьн: «Дьле мьн дьшәԝьтә бона тә. Тʹӧ зарʹ һежайи ве йәке нинә!». Дьбәкә һун дькарьн пьрсәке йан чәнд пьрса бьдьнә ԝи мәрьви, сәва бьзаньбьн кӧ ԝә әԝ һәвале хԝәйи дьлтәнг рʹаст фәʹм кьр йан на. Мәсәлә, һун дькарьн пьрс кьн: «Бьбахшинә, дькари һьнәки зәлал мьнрʹа шьровәки, ԝәки әз тә рʹаст фәʹм кьм?», йан жи бежьн, «Чахе тә гот . . . мьн ӧса фәʹм кьр . . . Мьн тә рʹаст фәʹм кьр?». Бь сайа ве йәке әԝ мәрьв ԝе баԝәр бә кӧ һун бь рʹасти гӧһ дьдьнә ԝи у дьхԝазьн ԝи рʹаст фәʹм кьн (1 Корн. 13:4, 7).

17. Чьрʹа әм гәрәке бь сәбьр бьн у хәбәрданеда ләз нәкʹәвьн?

¹⁷ Фәсал бьн ԝәки «хәбәрданеда» ләз нәкʹәвьн. Ләз нәкʹәвьн ширәте бьдьнә ԝи мәрьви, йан жи ньһерʹандьна ԝи рʹаст кьн. Бь сәбьр бьн! Чахе Елйас ахьрийеда дьле хԝә Йаһоԝарʹа вәкьр, пе гьлийед хԝә да кʹьфше ԝәки тʹәвһәв ә у дьле ԝи гьран ә. Ԝәʹдә шунда, чахе Йаһоԝа баԝәрийа Елйас ԛәԝи кьр, әԝи диса әԝ гьли гот у ӧса кӧла дьле хԝә рʹет (1 Пʹадш. 19:9, 10, 13, 14). Әм жь ве йәке чь дәрсе һин дьбьн? Щара мәрьвед дьлшкәсти гәләк щар кӧла дьле хԝә дьбежьн. Ԝәрә әм мина Йаһоԝа бь сәбьр гӧһ бьдьнә ԝан. Дәԝса кӧ ԝанрʹа ширәта бьдьн кӧ ча проблема хԝә сафи кьн, һе баш ә һьндава ԝанда дьлшәԝат бьн у дьлбинийе бьдьнә ԝан (1 Пәт. 3:8).

18. Чаԝа дӧа дькарә дьлбинийе бьдә ԝан, йед кӧ дьлшкәсти нә?

¹⁸ Бь дьл у щан тʹәви ԝи мәрьве дьлтәнг дӧа бькьн. Әԝед кӧ депресийеда ньн, щара нькарьн дӧа бькьн. Әԝана дьбәкә хԝә нәһежа тʹәхмин дькьн, кӧ Йаһоԝарʹа дӧа кьн. Һәрге әм дьхԝазьн бәр дьле ԝан мәрьвада бен, ԝе баш бә ԝанрʹа бежьн кӧ әм дьхԝазьн тʹәви ԝан бона ԝан дӧа бькьн. Чахе һун дӧа дькьн наве ԝан һьлдьн. Дӧада әм дькарьн Йаһоԝарʹа бежьн, ԝәки әԝ мәрьвед дәлал у дьлшкәсти, чьԛас ԛимәт ьн бона мә у щьвате. Әм ӧса жи дькарьн  жь Йаһоԝа һиви кьн, ԝәки дьлбинийе у бәрдьлийе бьдә хьзмәткʹаред хԝәйи һʹьзкьри. Дӧайе ԝи щурʹәйи дькарә гәләк али ԝан мәрьва бькә (Аԛуб 5:16).

19. Чь дькарә али мә бькә, ԝәки дьлбинийе бьдьнә мәрьве дьлшкәсти?

¹⁹ Гьлийед ӧса бьжберьн кӧ бькарьбьн дьлбинийе бьдьнә ԝан мәрьва у дьле ԝан рʹьһʹәт кьн. Пешийа кӧ тьштәки бежьн, пешда рʹьнд бьфькьрьн. Гьлийед ширьн дькарьн дьле бьриндар дәрман кьн (Мәтʹлк. 12:18). Ләма жь Йаһоԝа һиви кьн, ԝәки али ԝә бькә, кӧ һун гьлийед ширьн, дьлгәрм у нәрм бежьн. Бир нәкьн ԝәки тʹӧ гьлийе мә һаԛас ԛәԝат нинә, чьԛас гьлийе Хԝәде жь Хәбәра ԝи (Ибрн. 4:12).

20. Әԝед кӧ бәре рʹасти зорбәтийе һатьнә, дьбәкә дәрһәԛа хԝә чь дьфькьрьн, у әм чь дьхԝазьн биньн бира ԝан?

²⁰ Әԝ мәрьвед кӧ бәре рʹасти зорбәтийа сексуали һатьнә, щара дьфькьрьн, ԝәки әԝана һʹәрам ьн, нәһежа нә у тʹӧ кәс ԝе ԝана һʹьз нәкә. Ле әԝ йәк нәрʹаст ә! Ләма жи бь Кʹьтеба Пироз биньн бира ԝан, ԝәки әԝана бәр чʹәʹве Йаһоԝа гәләк ԛимәт ьн (Бьньһерʹьн чаргошә « Бәрдьли жь Кʹьтеба Пироз»). Биньн бира хԝә, чахе Данийел пʹехәмбәр сьст у бетʹаԛәт бу, мьлйакʹәт ча бь дьлгәрми ԝи ԛәԝи кьр. Бәле, Йаһоԝа дьхԝәст, ԝәки әԝ мәрьве дәлал бьзаньбә, кӧ әԝ чьԛас ԛимәт ә (Дан. 10:2, 11, 19). Хушк-бьред мәйә дьлтәнг жи, бәр чʹәʹве Йаһоԝа гәләк ԛимәт ьн!

21. Чь ахьри һивийа ԝан мәрьвед зорбә йә, йед кӧ тʹобә накьн, у әм гәрәке чь бәрдәԝам кьн бькьн?

²¹ Чахе әм бәр дьле ԝан мәрьвада тен, әм али ԝан дькьн, ԝәки әԝана бир нәкьн, кӧ Йаһоԝа ԝана һʹьз дькә. У әм ӧса жи гәрәке тʹӧ щар бир нәкьн, кӧ Йаһоԝа Хԝәдейе һәԛийе йә. Тʹӧ зорбәти у тʹӧ хьраби ве вәшарти нәминә. Йаһоԝа һәр тьшти дьвинә, у әԝ ԝе тʹӧ щар бе щәза нәһелә ԝан мәрьвед зорбә, йед кӧ тʹобә накьн (Жьмар 14:18). Ԝәрә әм гьшк алийе хԝәда һʹәму тьшти бькьн, сәва һʹьзкьрьне нишан кьн ԝанрʹа, йед кӧ рʹасти ве зорбәтийе һатьнә. Хенщи ве йәке, чьԛас дьлбинийе дьдә мә әԝ йәк, кӧ зутьрәке Йаһоԝа ԝе бь тʹәмами бьринед дьле ԝан мәрьва ԛәнщ кә, йед кӧ алийе Шәйтʹан у дьнйа ԝида, рʹасти хьрабийе һатьнә! Һьндьк майә кӧ әԝ һʹәму кӧл-дәрд дәрбаз бьн, у ԝе һьн дьле ԝанда, һьн жи бира ԝанда әԝ еш нәминә (Иша. 65:17).