1-2. (a) En ranyisi mane ma nyiso ni dhano duto ne ochue gi gombo mar yudo hoch kod nyalo mar hoyo jomamoko? (b) Nyithindo moko ihinyoga e yo mane?

DHANO duto ne ochue gi gombo mar yudo hoch kod nyalo mar hoyo jomamoko. Kuom ranyisi, ka nyathi matin ogore piny sama otugo mi oridho chonge, kinde mang’eny obiro ringo ir wuon-gi kata min-gi koywak. Kata obedo ni jonyuolnego ok nyal change, ginyalo hoye. Ginyalo penje gima oa timorene, ginyalo yweyone pi wang’e, ginyalo nyise weche ma kueyo chunye kendo ma nyiso ni gihere, kata ginyalo ketone yath kata tueyone kama litno. Mapiyo nono, nyathino weyo ywak kendo onyalo kata dok e tugo. Mosmos, adhola ma ni e chongeno chango chuth.

² Kata kamano, nitie hinyruok moko maricho ahinya ma nyalo yudo nyithindo. Kuom ranyisi, moko kuomgi inyalo njaw e yor nindruok. Inyalo timnegi kamano dichiel kata nyadinwoya kuom higni mang’eny. Bed ni gino otimore dichiel kata nyadinwoya, oweyo adhola maduong’ ahinya e chuny ng’ato. Seche moko, ijukoga joma timo tim marachno kendo ikumogi. Jomoko to nyalo nenore ka gima gidhi adhiya nyime gi ngimagi kaka pile kata mana bang’ timo tim marachno. To kata ka okum ng’at monjawo nyathi mapiyo, hinyruok mokelo ne nyathino nyalo chando nyathino kata mana kosebedo ng’ama duong’.

3. Kaka onyis e 2 Jo-Korintho 1:3, 4, Jehova dwaro ni ji otim ne rombene ang’o, to gin penjo mage ma wadwaro nono?

³ Ka po ni nitie Jakristo moro ma ng’ato nonjawo kotin to pod en gi chuny malit, inyalo konye nade? (Som 2 Jo-Korintho 1:3, 4.) Jehova dwaro ni ji otim ne rombene gik ma nyiso ni ohergi, kendo onego hogi sama mano dwarore.  Mano e momiyo wadwaro nono penjo adekgi: (1) Ang’o momiyo dwarore ni oho joma ne onjaw ka ne pod gitindo? (2) Gin jomage ma nyalo hoyogi? (3) Ere kaka wanyalo hoyogi e yo ma konyogi gadier?

4-5. (a) Ang’o momiyo ber ng’eyo ni nyithindo opogore gi joma dongo? (b) Njawo nyathi e yor nindruok nyalo chocho nade yo monenogo jomamoko?

⁴ Joma sani koro dongo to ne onjaw ka ne pod gitindo pod nyalo dwaro ni ohogi kendo okonygi kata obedo ni higni osekalo mang’eny nyaka ne timnegi tim anjawono. Nikech ang’o? Mondo wawinj tiend wachni, nyaka wakwong wang’e ni nyithindo opogore gi joma dongo. Yo ma tim moro nyalo hinyogo nyathi opogore gi yo ma tim achiel achielno nyalo hinyogo ng’ama duong’. Wane ane ranyisi moko.

⁵ Dwarorega ni nyithindo ong’i gi joma ritogi. Ng’iyo ma kamano miyo nyithindo neno ni oritgi maber kendo konyogi mondo gigen joma ritogigo. (Zab. 22:9) Gima lit en ni thothne nyithindo injawoga e miechgi, kendo joma timonegi kamano gin wedegi kata osiepe mong’iyo gi joodgi. Sama otim ne nyathi gima kamano, mano nyalo mone dhi nyime geno jomamoko kata bed ni higni osekalo mang’eny ma romo nade.

6. Ang’o momiyo njawo nyithindo en tim gero?

⁶ Nyithindo onge gi teko mar geng’o ng’ama dwaro hinyogi, omiyo, njawogi en tim gero. Keto nyithindo gi weche nindruok ka pod gibor gi higni ma dendgi kod pachgi biro ikoree ne nindruok e kend, nyalo hinyogi marach. Timno nyalo miyo nyathi obed gi paro marach e wi nindruok, onyalo dongo kochayore, kata onyalo tang’ mokalo tong’ sama ng’ato temo ng’iyo kode.

7. (a) Ang’o momiyo yot ahinya mondo ng’ato owuond nyathi mi onjawe, to onyalo wuonde gi weche mage bang’ njawe? (b) Miriambo ma ng’ama onjawo nyathi tiyogo nyalo kelo ne nyathino rach mage?

⁷ Pach nyithindo ok otegno e okang’ ma ginyalo fwenyo mapiyo gik ma nyalo hinyogi kata ng’eyo giwegi gik ma ginyalo timo mondo gigeng’ hinyruok. (1 Kor. 13:11) Nikech mano, yot ahinya mondo ng’ato owuondgi mi njawgi. Thothne ka ng’ato osenjawo nyathi, owuondo nyathino ni nyathino e ja makosa, kata ni gima otimoreno en gima onego ging’e mana kendgi ji ariyo, kata ni onge ng’ama biro chikone ite kata yie ni gima kamano otimore adier, kata ni gima gitimono nyiso ni giherore. Miriambo ma kamano nyalo chocho pach nyathino mi obudh higni mang’eny kokia ni mago ne gin mana miriambo ma ne igeng’ego mondo kik oful wachno. Nyathi ma kamano nyalo dongo koparo ni ochido ma onge ng’ato ang’ata ma nyalo here kata hoye.

8. Ang’o momiyo wan gadier chuth ni Jehova oikore hoyo joma nigi lit?

⁸ Weche ma wasenonogo konyowa ng’eyo gimomiyo joma oseganjaw nyalo kalo e pek mathoth kata mana bang’ higni mang’eny. To mano doko tim marach! Yo ma timno okwakogo piny sani nyiso maler ni wadak e ndalo mag giko ma Muma nokoro ni ji mang’eny ne dhi bedo “joma onge hera” kendo ni “joma richo gi joma pando kitgi ka giwuondorego [ne dhi] medo bedo maricho.” (2 Tim. 3:1-5, 13) Timbe Satan kelo mana hinyruok lilo, kendo en gima lit ahinya neno kaka ji timo gik ma more. Kata kamano, teko ma Jehova nigo ohingo mar Satan gi joma luwe te. Jehova neno gik moko duto ma Satan timo. Wan gadier chuth ni Jehova ong’eyo lit ma wakalee, kendo oikore hoyowa kinde duto. Wamor ahinya ni watiyo ne “Nyasach hoch duto, ma  hoyowa e masichewa duto mondo wabed gi nyalo mar hoyo jomamoko manie bwo masira moro amora, ka wahoyogi gi hoch ma wayudo koa kuom Nyasaye.” (2 Kor. 1:3, 4) Gin jomage ma Jehova tiyogo e hoyo joge?

9. Ka luwore gi weche ma Ruoth Daudi nowacho e Zaburi 27:10, ang’o ma Jehova timo ne joma joodgi ojwang’o?

⁹ Nitie jomoko ma ne onjaw nikech jonyuolgi kod wedegi ne ok oritogi maber kaka dwarore. Joma kamago nyalo dwaro hoch makende ahinya. Ruoth Daudi nong’eyo ni Jehova oikore hoyo jotichne. (Som Zaburi 27:10.) Ne en gadier ni Jehova rwako joma jonyuolgi kod wedegi ojwang’o. Jehova timo mano e yo mane? Otiyo gi jotichne ma ni e piny ka. Jotich Jehova wetewa gin kaka joodwa. Kuom ranyisi, Yesu noluongo joma noyie luwe ni owetene, nyiminene, kod minene.​—Mat. 12:48-50.

10. Jaote Paulo nowacho ang’o e wi migawo ma ne en-go mar bedo jaduong’?

¹⁰ Ne ane ranyisi ma nyiso ni joma ni e kanyakla mar Jokristo gin joot achiel. Jaote Paulo ne en jaduong’-kanyakla ma jakinda kendo ma ne ochung’ motegno. Noketo ne Jokristo wetene ranyisi maber kendo ne ojiwogi mondo giluw timne kaka en bende ne oluwo tim Kristo. (1 Kor. 11:1) Nitie kinde ma ne owuoyo e wi migawo ma ne en-go mar bedo jaduong’ kowacho niya: “Ne wadembore e kindu mana kaka miyo ma dhodho nyathi rito nyithinde owuon konyisogi hera matut.” (1 The. 2:7) Jodongo ma kindegi bende nyalo tiyo gi weche mang’won kamano sama gitiyo gi Ndiko e hoyo joma nigi lit.

11. Ang’o ma nyiso ni ok jodongo kende e ma nyalo hoyo joma nigi lit?

¹¹ Be jodong-kanyakla kende e ma onego oho joma nonjaw ma pod nigi lit e chunygi? Ok en kamano. Waduto wan gi ting’ mar hoyo jowetewa. (1 The. 4:18) Nyimine ma gin Jokristo motegno e kanyakla nyalo hoyo nyimine ma nigi lit e yo maber ahinya. Jehova Nyasaye wacho ni ochalo gi miyo ma hoyo nyathine. (Isa. 66:13) Muma  wuoyo e wi mon moko ma ne ohoyo jomamoko ka ne gin e chandruok. (Ayub 42:11) Onge kiawa ni Jehova bedo ma mor sama oneno ka nyimine ma Jokristo e kindegi hoyo nyimine wetegi ma pod winjoga lit nikech tim anjawo ma ne otimnegi! Kinde moko, jaduong’ achiel kata jodongo ariyo nyaloga kwayo nyaminwa motegno mondo okony nyaminwa ma nigi chandruok ma kamano. *

12. Ang’o monego watang’go?

¹² Kinde duto onego watang’ ahinya mondo kik wadonjre e weche ma ng’ato ok diher ni jomamoko ong’e. (1 The. 4:11) To nade ka ng’ama nigi lit dwaro ni wakonye kendo wahoye? Wanon ane yore moko abich ma wanyalo hoyego.

13. Ka luwore gi 1 Ruodhi 19:5-8, ang’o ma malaika mar Jehova notimo ne Elija, to ere kaka wanyalo luwo ranyisi mar malaikano?

¹³ Tim ne ng’atno gimoro ma nyalo konye. Ka ne janabi Elija ringo mondo ores ngimane, chunye nonyosore mochopo kama nogombo mana tho. Jehova nooro malaika mondo ojiwe. Malaikano notimo gima ne nyalo konyo Elija kanyo gi kanyo. Nomiyo Elija chiemo maliet mi ojiwe mondo ochiem. (Som 1 Ruodhi 19:5-8.) Mano puonjowa adiera moro maduong’: Nitie seche ma timo atima ne ng’ato gimoro ma konye achiel kachiel oromo hoye. Kuom ranyisi, tedo ne Jakristo wadwa chiemo, miye mich moro, kata orone barua ma jiwe nyalo miyo obed gadier ni wahere kendo wadewe. Omiyo, ka waneno ni wuoyo e wi gimoro malit ma ng’ato osekalee teknwa, wanyalo timone atima gimoro ma nyiso ni wahere kendo wadewe.

14. Ang’o ma wanyalo puonjore e wi gima notimore ne Elija?

¹⁴ Mi ng’at ma chunye onyosore owinj maber kendo one ni onge gima biro hinye. Nitie gima chielo ma wanyalo puonjore e wi gima notimore ne Elija. Jehova notimo hono mi Elija obedo gi teko mar wuotho nyaka Got Horeb, ma ne en wuoth ma rabora. Nyalo bedo ni ka koro Elija ne ni e godno ma e got ma ne Jehova otimoe singruok gi jotichne e higni machon, nowinjo ni en kama onge gima ne nyalo hinyee. Samoro nowacho e chunye ni, ‘Koro to an mabor gi joma ne dwaro nega.’ Mano puonjowa ang’o? Ka wadwaro konyo joma nigi lit e chunygi nikech nonjawgi, onego wakwong wami gibed gadier ni onge gima nyalo hinyogi ka wan kodgi. Kuom ranyisi, jodongo onego ong’e ni nyaminwa ma chunye onyosore nyalo bedo thuolo ka giwuoyo kode e ode moloyo ka giwuoyo kode e Od Romo. Moko bende nyalo bedo thuolo e Od Romo moloyo e utegi.

15-16. Chiko it maber oriwo timo ang’o?

¹⁵ Chikne iti maber. Muma puonjowa kama: “Ng’ato ka ng’ato nyaka bed ng’at ma winjo wach piyo, ma terore mos kuom wuoyo.” (Jak. 1:19) Be wachikoga itwa maber sama jomamoko wuoyo? Wanyaloga paro ni chiko it en aena ling’ aling’a thi kendo ng’iyo wang’ ng’ama wuoyo. Mago kende ok oromo. Par ane ka koro Elija ne nyiso Jehova gik ma ne chande. Jehova nochiko ite maber. Mano nomiyo ofwenyo ni Elija ne luor kendo noparo ni onge jomamoko ma ne tiyo ne Jehova, kendo noneno ni kinda ma notimo ne en mana kayiem nono. Jehova nokonye loyo gik ma ne chandego duto. Ee, nonyiso ni nochiko ne Elija ite maber.​—1 Ru. 19:9-11, 15-18.

¹⁶ Sama wachiko itwa ne Jakristo wadwa, ere kaka wanyalo nyiso ni wanenone lit, ma  en gima nyiso ni wahere? Tiyo gi weche matin kendo mang’won nyalo nyiso ni waneno lit. Inyalo wacho kama: “Mos ahinya kuom gima notimoreno! Mano gima ok onego otim ne nyathi kata matin!” Samoro bende ber penjo penjo moro achiel kata ariyo mondo ibed gadier ni iwinjo gima Jakristono wacho. Kuom ranyisi, inyalo penje ni, “Nitie gimoro ma ia wacho to ok awinje maber, be inyalo nwoyonago?” kata “Sama niwacho ni . . . , nakawo ni itemo wacho ni . . . En kamano, koso?” Weche mang’won kamano nyalo miyo ng’at miwuoyogo obed gadier ni ichikone iti maber kendo ni itemo ahinya mondo ing’e gima chande.​—1 Kor. 13:4, 7.

17. Ang’o momiyo onego wahore kendo kik warikni wuoyo?

¹⁷ Tang’ kik irikni wuoyo. Kik ing’ade ni idwa miye paro moko kata rieyo gimoro mowacho. Hori! Seche ma Elija koro noyawo ne Jehova chunye, nowuoyo ka en gi lit mang’eny. Bang’ ka Jehova nosemiye teko kendo jiwo yiene, nonwoyo ne Jehova gik ma ne chande kotiyo mana gi weche ma notiyogo motelo. (1 Ru. 19:9, 10, 13, 14) En puonj mane ma wayudo kanyo? Seche moko, joma nigi lit e chunygi nyalo ywagonwa gik ma chandogi nyadinwoya. Mana kaka Jehova, onego wahore sama wachikonegi itwa. Kar temo nyisogi mapiyo gik monego gitim, ber mondo wakechgi akecha kendo wabed mang’won kodgi.​—1 Pet. 3:8.

18. Ere kaka lamo ma walamo sama wan gi joma chunygi lit nyalo hoyogi?

¹⁸ Lem kode kowuok e chunyi. Joma chunygi onyosore samoro yudoga ka teknegi lemo. Ginyalo paro ni gin joma nono e wang’ Jehova. Ka wadwaro hoyo ng’at ma kamano e yo maber, wanyalo lemo ka wan kode kendo waluong nyinge e lamo. Wanyalo nyiso Jehova kaka wageno Jakristono kod kaka jo kanyakla bende ogene. Wanyalo kwayo Jehova mondo ohoye kendo oduog chunye. Wacho weche ma kamago e lamo nyalo hoye ahinya.​—Jak. 5:16.

19. Ang’o ma nyalo konyowa ikore maber ka wadwaro hoyo ng’ato?

 ¹⁹ Yier weche ma nyalo duogo chunye. Kwong ipar gima idwaro wacho ka pok iwuoyo. Mwomruok gi wach nyalo mana medo lit. Weche mang’won to nyalo chango adhola ma ni e chuny ng’ato. (Nge. 12:18) Omiyo, kwa Jehova mondo okonyi yiero weche mang’won ma nyalo hoyo ng’ato. Ng’e ni onge weche mang’won moloyo weche Jehova owuon ma yudore e Muma.​—Hib. 4:12.

20. Joma noseganjaw nyaloga bedo gi paro mane marach, to ang’o monego waparnegi?

²⁰ Ng’at ma noseganjaw e yor nindruok nyalo dongo koparo ni ochido ma onge ng’ato ang’ata ma nyalo here kata hoye. Mano ok en adier kata matin! Omiyo, ti gi Ndiko e paronegi ni Jehova oherogi kendo ogenogi malich. (Ne sanduk ma wiye wacho ni, “ Hoch ma Wayudo e Ndiko.”) Par ane kaka malaika mar Jehova nojiwo Daniel e yo mang’won e kinde ma ne chuny Daniel onyosore. Jehova ne dwaro ni Daniel ong’e ni ohere ahinya. (Dan. 10:2, 11, 19) Jokristo wetewa ma chunygi onyosore bende onego ong’e ni Jehova oherogi ahinya!

21. Ang’o ma biro timore ne joricho modagi loko yoregi, to sama warito mano, ang’o monego wadhi nyime timo?

²¹ Sama wahoyo jomamoko, waparonegi kaka Jehova oherogi. Bende, wiwa ok onego owil ni Jehova en Nyasaye mohero tim makare. Tim moro amora ma ng’ato timo mar njawo jomamoko e yor nindruok ok opondo e wang’ Jehova. Oneno gik maricho te ma ji timo, kendo ok obi weyo ma ok okumo joricho modagi loko yoregi. (Kwan 14:18) Sama warito kinde mobiro rieyoe weche, wadhiuru nyime timo duto ma wanyalo mondo waho joma nosetimnegi tim marachno. E wi mano, en gima hoyo chunywa ahinya ng’eyo ni Jehova biro tieko chuth timbe maricho ma Satan kod pinyni osekelo ne ji, moriwo nyaka tim mar njawo jomamoko e yor nindruok! Machiegnini, wi ji biro wil gi gik maricho duto mosetimnegi. Ee, gigo ok nochand chunygi kendo!​—Isa. 65:17.