1-2. a) Bõe n wilgd tɩ ninsaal buud fãa rata belsgo, la t’a tara tõog me n tõe n bels a taabã? b) Bõe n mi n paam kamb kẽere?

NINSAAL buud fãa rata belsgo. A tara tõog me n tõe n bels a taabã hal sõma! Wala makre, bi-bilf sã n deemdẽ, n wa lak n lʋɩ t’a rũmdã medge, a yãbdame, n zoe n kẽng a ma bɩ a baaba nengẽ. A roagdbã pa tõe tɩ nodrã maag zĩig pʋgẽ ye. La b tõe n belsa biigã. Tõe tɩ b na n sok-a lame tɩ bõe n maan-a, n yẽes a nintãmã, n dɩk-a, la b yeel-a bũmb kẽer sẽn na n maag a sũurã. Tõe me tɩ b na n ninga nodrã tɩɩm, pa rẽ bɩ b sẽbe. Pa yãt n kaoos la biigã sĩnd ye. Tõe t’a le sɩng reem menga. Tarẽ-n-tarẽ, nodrã wat n maagame.

² La wakat ninga, yell wẽnem sẽn yɩɩd woto n mi n paam kambã. B mi n belga biig bɩ n modg-a n tʋm tʋʋm-dẽgdo. Kẽer nengẽ tõe n yɩɩ vugri, la sãnda nengẽ, mi n yaa yʋʋm wʋsg la b maan-b woto. Sẽn yaa a soab fãa, yellã namsd-b-la wʋsgo, n tõe n kell n nams-b n kaoose. Wakat ninga, b paamd n yõka sẽn maan-a yellã, n sɩbg-a. Wakat ning me, yaa wa a pa na n tol n paam sɩbgr ye. La baa b sã n wẽneg n paam sẽn maan-a yellã n sɩbge, biigã tõe n ket n namsdame, hal baa a sã n wa lebg kãsma.

3. Wa 2 Korẽnt rãmb 1:3, 4 sẽn wilgdã, bõe la a Zeova rata? Sogs-bʋs la d na n leoke?

³ B sã n da belga d tẽed-n-taag bɩ b modg-a lame n tʋm tʋʋm-dẽgd a yãadmẽ tɩ ket n namsd-a, yɛ la a tõe n paam belsgo? (Karm-y 2 Korẽnt rãmb 1:3, 4.) D mii vẽeneg t’a Zeova ratame tɩ sẽn tũud-b yẽ wã paam belsg la nonglem wa  b sẽn datã. Rẽ n so tɩ d na n leok sogsg a tãabo: 1) Bõe yĩng tɩ b sẽn da belg bɩ n modg-b rãmb n tʋm tʋʋm-dẽgd b yãadmẽ wã wae n dat belsgo? 2) Ãnd dãmb n tõe n bels-ba? 3) Bõe la d tõe n maan tɩ sɩd bels-ba?

4-5. a) Bõe yĩng tɩ d segd n tẽegdẽ tɩ kambã ne kãsembã yaa toor fasɩ? b) B sã n belg biig bɩ n modg-a n tʋm tʋʋm-dẽgdo, lebgda toog t’a kɩs ned sɩda. Bõe yĩnga?

⁴ Neb kẽer b sẽn da belg bɩ n modg n tʋm tʋʋm-dẽgd b yãadmẽ wã tõe n ket n data belsgo, baa yʋʋm wʋsg poore. Bõe yĩnga? Sẽn na yɩl n wʋm a võore, d segd n deng n bãngame tɩ kambã ne kãsembã yaa toor fasɩ. B sã n maan biig wẽnga, yellã sẽn tõe n nams-a to-to wã pa yembr ne sẽn na n yaa kãsem la b maan a buud ye. D ges bũmb a wãn sẽn kɩt tɩ yaa woto.

⁵ Kambã ratame tɩ bãmb ne neb nins sẽn wubd-bã noom sõma, n kɩs taab sɩda. B ratame tɩ yɩ woto ne ned ning fãa sẽn dat bãmb neere. Rẽ, kambã yam gãeeme. Sõngd-b lame me tɩ b tõe n kɩs sɩd ne neb nins fãa sẽn nong bãmbã. (Yɩɩn. 22:10) Bʋko, nong n yaa biig zak ned wall b zoa n wẽnegd n belg-a bɩ n modg-a n tʋm tʋʋm-dẽgdo. A buud sã n paam biiga, lebgda toog t’a kɩs ned sɩda, baa kaoosg zugẽ.

6. Bõe yĩng tɩ d yetẽ tɩ ned sã n tʋm tʋʋm-dẽgd ne biiga, yaa wẽnem meng-menga?

⁶ Ned sã n maan biig woto, yaa wẽnem meng-menga, bala biig pa tõe n kogl a meng ye. Leb n yaa bũmb sẽn na n nams-a wʋsgo. Sẽn mik tɩ biigã nan pa bɩ n ta kãadem, la a nan pa tagsd pag ne rao lageng yellã, b sã n belg-a bɩ n modg-a n tʋm tʋʋm-dẽgdo, namsd-a-la wʋsgo. Tõe n kɩtame t’a tar tags-kɛg pag ne rao lagengã wɛɛngẽ, wall a pa le nand a mengã, pa rẽ bɩ a gũusd wʋsg ne ned buud fãa sẽn dat a zoodo.

7. a) Bõe yĩng tɩ yaa nana tɩ b belg biig wall b modg-a n tʋm tʋʋm-dẽgdo? b) Sẽn maand-b kambã woto wã sẽn kɩtd tɩ b tẽed bũmb kẽer sẽn pa sɩdã, mi n wata ne bõe?

⁷ Biig nan pa bɩ n sek a na tõog n tags neere, n bãng n yãk yam, wall a yã yell n gil ye. (1 Kor. 13:11) Rẽ n so tɩ yaa nana tɩ b belg biig wall b modg-a n tʋm tʋʋm-dẽgd ne-a wã. Sẽn maand-b kambã woto wã kɩtdame tɩ b tẽed bũmb kẽer sẽn pa sɩda. Wala makre, tɩ yaa biigã yelle, tɩ biigã pa segd n togs ned yellã, t’a sã n gom ne ned me, a soab pa na n kelg-a bɩ n tẽ a goamã, wall a yeel-a tɩ kãsem ne biig tõe n maana woto, n wilg tɩ b nonga taaba. Tõe n kaoosa yʋʋm wʋsgo, tɩ biigã ket n tẽed tɩ woto fãa yaa sɩda. Hal baa biigã bɩʋʋng zugẽ, a tõe n ket n tagsdame t’a vɩɩmã sãamame, t’a ka võore, la tɩ pa zems tɩ ned nong yẽ, bɩ n bels yẽ a yellã pʋgẽ ye.

8. Bõe yĩng tɩ d tõe n kɩs sɩd t’a Zeova tõe n bãng n belsa b sẽn maan-b rãmb wẽngã?

⁸ Dẽnd yell a woto sẽn tõe n nams biig a yõor tɛkã pa lingr ye. Sɩd yaa wẽnem tɛkẽ! Yel-kãngã sẽn tar piuugrã wilgda vẽeneg tɩ tõnd bee dũniyã yaoolem wakate, tɩ nebã wʋsg yaa neb “sẽn ka mi nimbãan-zoeere,” tɩ “nin-wẽnsã ne bɛlgdbã” me ‘kẽed wẽngã pʋgẽ n paasdẽ.’ (2 Tɩm. 3:1-5, 13) A Sʋɩtãan raabã yaa a sɩd maan nebã wẽng wa a sẽn tõe tɛka. D sẽn ne tɩ neb n be n tũud a raabã sãamda sũur wʋsgo. La a Zeova pãng yɩɩda a Sʋɩtãan ne a poorẽ dãmbã hal zĩig sẽn zãre. A mii a Sʋɩtãan sɩlmã sõma. D tõe n kɩsa sɩd t’a Zeova mii yɛlã sẽn namsd tõnd n ta zĩig ningã, la t’a tõe n bãng n belsa tõndo. D sẽn paam n tũud-a wã yaa bark meng-menga, bala a yaa “belsg fãa Wẽnnaam, sẽn belsd tõnd d zu-loeesã fãa pʋsẽ sẽn na yɩl tɩ tõnd me tõog n tall belsg ning tõnd sẽn  paamd Wẽnnaam nengẽ wã, n bels neb a taab zu-loees buud fãa pʋgẽ.” (2 Kor. 1:3, 4) Woto wã, ãnd dãmb la a Zeova tũnugd ne n belsd nebã?

9. Rĩm a Davɩɩd sẽn yeel bũmb ning Yɩɩn-sõamyã 27:10 wilgdame tɩ ned zak rãmb sã n daag-a n base, a Zeova maanda bõe?

⁹ Ned ba bɩ a ma sã n daag-a n base, wall yaa a zakã ned bɩ b zoa n belg-a bɩ n modg-a n tʋm tʋʋm dẽgdo, a wae n data belsg sõma. Yɩɩn-gʋlsd a Davɩɩd ra miime tɩ sẽn yɩɩd fãa, yaa a Zeova la d tõe n teege, n paam belsgo. (Karm-y Yɩɩn-sõamyã 27:10.) A Davɩɩd ra kɩsa sɩd tɩ ned zak rãmb sã n daag-a n base, a Zeova reegd-a lame. Wãn to la a reegd a soaba? A tũnugda ne sẽn tũud-b yẽ ne b sũur fãa wã. A Zeova tũudmã kɩtame tɩ tõnd ne d tẽed-n-taasã yaa wa zak a ye rãmba. Sɩd me, a Zeezi ra goma sẽn naag-b yẽ n tũud a Zeova wã yeele, n yelle tɩ bãmb n yaa yẽ ma-bi-raad ne a ma-bi-pogs la a ma-rãmba.—Mat. 12:48-50.

10. Bõe la tʋm-tʋmd a Poll maan-yã, a sẽn da yaa kãsem-soabã?

¹⁰ Bɩ d ges makr a wãn sẽn wilgd tɩ tigingã neb sɩd yaa wa zak a ye rãmba. D reng n gom tʋm-tʋmd a Poll sẽn kõ mak-sõng ningã yelle. A yɩɩ kãsem-soab sẽn da tʋmd wʋsg tigingã yĩnga. Wẽnnaam kɩtame t’a pʋd n yeel tigingã neb a taabã tɩ b yɩ yẽ togs-n-taase, wa yẽ me sẽn yaa Kirist togs-n-taagã. (1 Kor. 11:1) Ges-y-yã a sẽn bilg a sẽn da tʋmd to-to wã. A yeelame yaa: “Tõnd talla bʋgsem ne yãmba, wa pag sẽn dɩlgd a kamb la a get b yell ne bʋgsem to-to wã.” (1 Tes. 2:7) Rũndã-rũndã me, kãsem-dãmbã sẽn maand sɩd ne a Zeova wã tõe n dɩka a Poll togs-n-taare, tɩ b sã n wa na n tall Biiblã n bels ned sẽn dat sõngr bɩ b tall bʋgsem, la b gom goam sẽn kengd pɛlga.

11. Bõe n wilgd tɩ pa kãsem-dãmbã bal n tõe n bels nebã?

¹¹ Yaa kãsem-dãmbã bal n segd n bels neb nins b sẽn da tʋm tʋʋm-dẽgd ne wã bɩ? Ayo! Segdame tɩ tõnd fãa ‘ket n belsd  taaba.’ (1 Tes. 4:18) Saam-bi-pogs nins tẽeb sẽn bɩ sõma wã pʋd n tõe n bãng n belsa saam-bi-pogs sẽn dat belsgo. Sɩd me, a Zeova mengã yeelame tɩ yẽ yaa wa pag sẽn belsd a biiga. (Eza. 66:13) Biiblã pʋgẽ, b gomda pagb sẽn bels sũ-sãang rãmb yelle. (Zoob 42:11) Hakɩɩka, a Zeova sẽn ne tɩ tigingã pʋgẽ, pagbã belsda pagb nins sũy sẽn sãam wʋsgã, a sũur yaa noogo! Wakat ning menga, kãsem-dãmbã tõe n tɩ yãa saam-bi-poak tẽeb sẽn bɩ sõma, n na n ges a sã n tõe n sõnga saam-bi-poak a to sẽn be namsg pʋgẽ. *

12. D gũusda sẽn na yɩl n da wa maan bõe?

¹² La d sã n wa rat n sõng d to, d gũusda sẽn na yɩl n da wa baood n bãng yɛl a sẽn pa rat n dɩk n gom ne ned ye. (1 Tes. 4:11) Woto wã, bõe la d tõe n maane, tɩ sɩd sõng neb nins sẽn dat sõngr la belsgã? Bɩ d ges bũmb a nu Biiblã sẽn sõngd tõnd tɩ d bãng rẽ wɛɛngẽ.

13. Wa b sẽn wilg 1 Rĩm-dãmb 19:5-8 wã, bõe la malɛkã maan n sõng a Eli, la wãn to la d tõe n dɩk a togs-n-taare?

¹³ Maan-y bũmb sẽn na n sɩd sõng a soabã. No-rɛɛs a Eli sẽn wa n zoet n na n põsg a yõorã, a ra komsa raoodo, hal n da rat n ki tɩ sa. A Zeova tʋma malɛk a Eli nengẽ. Malɛkã maana bũmb sẽn sɩd sõng-a. A wa n kõo a Eli rɩ-tʋʋlga, la a yeel-a t’a yik n dɩ. (Karm-y 1 Rĩm-dãmb 19:5-8.) Kiba-kãngã kõta tõnd yam: Wakat ninga, d sã n maan bõn-kɩdg n na n sõng neda, tõe n sɩd sõng-a-la hal sõma. Wala makre, d sã n segl rɩɩb bilf n tɩ kõ d tẽed-n-taag sũur sẽn sãame, wall d kõ-a bũmb bilfu, pa rẽ bɩ d bool-a wall d gʋls-a mesaaze, tõe n kɩtame t’a bãng tɩ d nong-a lame, la tɩ d tagsda a yelle. Tõe tɩ d tõog n maan woto, baa d sã n getẽ tɩ yaa toog tɩ d sõs ne a soabã bũmb nins sẽn namsd-a wã zugu.

14. Yam-bʋg la d tõe n dɩk a Eli kibarã pʋgẽ?

¹⁴ Sõng-y-b tɩ b yamã gãande. A Eli kibarã kõta tõnd yam a to me. A Zeova maana yel-solemd tɩ no-rɛɛsã paam sõngr ning a sẽn da ratã, n tõog n kẽn n ta Horɛɛb tãngã sẽn zãr wʋsgã. Na maan yʋʋm kobse, a Zeova ra maana kaool ne Israyɛll nebã tãn-kãng zugu. Tõe t’a Eli sẽn ta hal be wã, a yam gãandame. Tõe t’a tagsame t’a yaa n paam n zãaga ne sẽn dat-b yẽ n kʋ wã. Woto wilgda tõnd bõe? Wilgdame tɩ d sã n dat n bels ned b sẽn da tʋm tʋʋm-dẽgd ne, wakat ninga, d segd n deng n sõng-a lame t’a yamã gãande. Wala makre, kãsem-dãmbã sã n wa na n sõs ne saam-bi-poak yell a woto sẽn paame, yɩta sõma tɩ b tẽeg tɩ kẽer nengẽ, sã n yaa zakẽ, b yamã na n gãeeme n yɩɩd sẽn na n yaa Rĩungã roogẽ. La nina nengẽ, Rĩungã roogẽ wã n são.

15-16. Bãng n kelg ned rat n yeelame tɩ bõe?

¹⁵ Yɩ-y ned sẽn mi kelgre. Ad saglg Biiblã sẽn kõte: “Ned buud fãa segd n wɩnga ne kelgre, la a maag ne goama.” (Zak 1:19) Bɩ ned fãa sok a meng yaa: ‘Mam mii ned kelgr bɩ?’ Tõe tɩ d tagsdame tɩ bãng ned kelgrã rat n yeelame tɩ ned sã n gomd ne-f bɩ f get a soabã, n sĩnd sɩɩ hal t’a wa gom n sa. La bãng n kelg nedã pa woto ye. Wala makre, a Eli sẽn wa n kong n pelg a pʋg n togs a Zeova bũmb ning sẽn namsd yẽ wã, a Zeova kelg-a-la neere. A Zeova mikame tɩ no-rɛɛsã maanda rabeem, t’a tagsdame t’a yaa a yembre, la a tagsdẽ me t’a tʋʋmdã fãa yɩɩ zaalem. Ne nonglem, a Zeova sõng-a lame t’a rems a tagsgã. A sɩd wilgame t’a kelga a Eli neere.—1 Rĩm. 19:9-11, 15-18.

 ¹⁶ D sã n wa kelgd neda, wãn to la d tõe n wilg tɩ d kʋmda a nimbãanega? Sasa ninga, goam a wãn bal sẽn kengd raood seka na wilg rẽ. Y tõe n yeelame yaa: “Yel-kãngã sẽn paam foo wã sãamda m sũur wʋsgo! Pa segd tɩ b maan biig woto ye!” Y tõe n sok-a-la sogsgo, n bãng y sã n sɩd wʋma a goamã võor sõma. Y tõe n sok-a lame yaa: “Fo tõe n maneg n bilga f sẽn yetã tɩ m wʋm a võor sõma bɩ?” Pa rẽ bɩ y sok-a yaa: “Fo gomdã rat n yeelame tɩ . . . Yaa woto bɩ?” Rẽ, a bãngdame tɩ y kelgd-a-la neere, n dat ne y sũur fãa n bãng yellã sẽn namsd-a to-to.—1 Kor. 13:4, 7.

17. Bõe yĩng tɩ d segd n tall sũ-mare, la d “maag ne goama”?

¹⁷ La gũus-y-yã, n da wa yĩm tɩ y segd n ‘maaga ne goam ye.’ Ra kʋʋg-y-yã a soabã goam, n na n wilg y sẽn tagsd t’a tog n maaname, wall n na n dems a tagsg ye. Tall-y sũ-mare! A Eli sẽn wa n kong n pelg a pʋg n togs a Zeova sẽn be a sũurẽ wã, a goamã wilgame t’a ra maanda yɩɩr wʋsgo, la t’a sũ-sãangã waoogame. A Zeova kenga a tẽebã, la baa ne rẽ, a le yeela wa a sẽn da yeelã bala. (1 Rĩm. 19:9, 10, 13, 14) Yam-bʋg la d tõe n dɩke? Wakat ninga, sũ-sãams sã n sãag neda, pa vugr bal la a na n togs sẽn namsd yẽ wã ye. Tõnd me ratame n kelgd nebã ne sũ-mar wa a Zeova. D ra baood n na n wilg b yellã tɩɩm ye. D sẽn dat yaa d wilg tɩ d kʋmda b nimbãanega.—1 Pɩy. 3:8.

18. D sã n naag ned sũur sẽn sãam tɩ d pʋʋse, wãn to la rẽ tõe n sɩd bels-a?

¹⁸ Naag-y-ba, tɩ y pʋʋs a Zeova. Tõe n yɩɩ toog ne neb nins sũy sẽn sãam wʋsgã tɩ b pʋʋse. Nina getame t’a pa segd ne a na gom ne a Zeova ye. D sã n wa rat n bels ned a woto, d tõe n naag-a lame tɩ d pʋʋse. Pʋʋsgã pʋgẽ bɩ d pʋd a yʋʋrã, la d togs a Zeova tɩ tõnd ne tigingã nebã nonga nin-kãnga wʋsgo. D kos a Zeova t’a bels-a la a keng a raoodo, a sẽn  yaa a Kaset soab a sẽn nong wʋsgã yĩnga. Pʋʋsg a woto buudã tõe n sɩd belsa ned hal sõma.—Zak 5:16.

19. Wãn to la d tõe n segl d menga, n bãng n bels neda?

¹⁹ Gom-y goam sẽn maagd sũuri, la sẽn kengd raoodo. Tags-y neer n yaool n gome. Ned sã n pa tags neer n yaool n gome, tõe n sãama sũuri. La goam sẽn kengd raood maagda sũuri. (Yel. 12:18) Woto wã, pʋʋs-y-yã a Zeova n kos-a t’a sõng-y tɩ y bãng n gom goam sẽn kengd pɛlga, sẽn belsde, la sẽn maagd sũuri. Tẽeg-y tɩ gomd ka be sẽn tar pãnga, n tõe n sõng ned n ta a Zeova goamã sẽn be Biiblã pʋgẽ wã ye.—Ebre. 4:12.

20. Ned b sẽn da tʋm tʋʋm-dẽgd ne tõe n wa tagsda bõe, la d rat n sõng-a lame t’a bãng bõe?

²⁰ Ned b sẽn da tʋm tʋʋm-dẽgd ne tõe n tagsdame t’a vɩɩmã sãamame, t’a ka võore, tɩ pa zems tɩ ned nong-a, la tɩ ned pʋd pa tõe n nong yẽ ye. Woto yaool n pa sɩd baa-baa! Ne Biiblã maasem, sõng-y-yã-a t’a bãng t’a Zeova nong-a-la wʋsgo. (Ges-y zĩ-gũbrã gom-zug sẽn yet tɩ: “Vɛrse-rãmb sẽn belsd la kengd raoodo.”) Tẽeg-y no-rɛɛs a Dãniyɛll sũurã sẽn wa n sãam t’a pa le tar raoodo, tɩ malɛk wa keng a pɛlg ne bʋgsem to-to wã. A Zeova ra ratame t’a Dãniyɛll bãng t’a nong-a-la wʋsgo. (Dãn. 10:2, 11, 19) Woto wilgdame t’a nonga d tẽed-n-taas nins sũy sẽn sãamã me wʋsgo.

21. Bõe n na n paam yel-wẽn-maandb nins sẽn pa rat n tek yamã, la nananda, bõe la d rat n maane?

²¹ D sã n belsd d taabã, tẽegd-b lame t’a Zeova nong-b lame. D tẽeg me t’a Zeova yaa Wẽnnaam sẽn nong tɩrlem. B sã n belga ned bɩ n modg-a n tʋm tʋʋm-dẽgdo, a Zeova yãame, baa ned pa yã. A nee bũmb fãa. A pa na n bas sẽn maand-b yel-wẽn n pa rat n tek yamã taal ye. (Sõd. 14:18) La nananda, d maan d sẽn tõe fãa, n wilg neb nins b sẽn da belg bɩ n modg n tʋm tʋʋm-dẽgdã tɩ d nong-b lame. Sẽn paase, d sẽn mi t’a Zeova na n wa kɩtame tɩ neb nins fãa yell a woto buud sẽn namsdã paam yolsg zãng-zãngã, kengda d raoodo. Ka la bilfu, d pa na n tol n le tẽeg bõn-kãens wall n tags b yell ye.—Eza. 65:17.