1-2. (a) Tae-e ra ǁgau khoesib ǁkhaeǂgaohesa ǂhâ hâsa tsî nēsan kaise ǃgâise a dī ǁkhāsa? (b) ǀNî ǀgôana mati ra tsûtsûhe?

KHOESIB ge ǁkhaeǂgao-esa ǂhâ hâ tsî nēsa kaise ǃgâi ǀgaub ǃnâ a dī ǁkhā. Aiǁgause, ǂkham ǀgôa-i ga ǁnā tsî ǁî-i di ǁgoasa a tsûtsû o ǀhuru-i ra hîna, o i ge ǁî-i ǁgûs tamas ka io ǁgûba ǃoa ā rase ra sī. ǁGûn ge ǀgôa-i tsûba a ūbē ǁoa xawen ge ǁî-e a ǁkhaeǂgao ǁkhā. ǁÎn ge tae-i go īsa a dî ǁkhā, ǁgamrona ǀombē tsî ǁî-e ǁkhaeǂgaos mîde a mā ǁkhā tsî sōǀoa-i tsîna. ǁAeb ǀkha i ge ǀgôa-e ra ā ǀû tsî ǁkhawa ra ǀhuru tsoatsoa. Tsî i ge ǁaeb ǀkha ra ǂgau.

² Xawe ǀnî ǁaegu ain ge ǀgôana kaise kai ǀgaugu ǃnâ ra tsûtsû-e. ǀNîn ge ra ǀgaiǃkhō-e. Nēs ge ǀgui ǃnāsa a īǁkhā tamas ka io ǂgui kuriga a aiǃgû ǁkhā. Nēs ge ǀgôa-e kaise a tsûtsûǂgao ǁkhā. ǀNî ǁaegu ai i ge tsūdī go khoe-e ǃkhōsis ǃnâ ūhe tsî a ǁkhara-e ǁkhā. ǀNî ǁaegu ai i ge tsūdī go khoe-e nē ǁkharaga ra ǂgōsen. Nēs ga ī xaweb ge ǁnā tsūdī go khoe-i go ǃaroma tsûba tsûtsû-e go khoe-i ǀkha nî hâhâ.

3. 2 Korinteǁîn 1:3, 4 ǃnâ i ra mîhe khamis Jehovab ǂâisa a tae tsî mâ dîde da nî ǃhoaǃgao?

³ ǀGôasis ǃnâ ge ǀgaiǃkhōhe Xristeǁî-i ga noxoba nē tsûba a ūhâ o, o i ǁî-e mati a huihe ǁkhā? (Khomai re 2 Korinteǁîn 1:3, 4.) Jehovab di ǂâis ge în ǁîb gūna ǂhâbasa ǀnammi tsî ǁkhaeǂgaosa hō. Nēs ǃaroma hā re î da ǃnona dîde ǃhoaǃgao: (1) ǀGaiǃkhōsa ge ûi ǃkharu khoena tae-i ǃaroma ǁkhaeǂgaohesa ǂhâ hâ? (2) Ham-e  nē ǁkhaeǂgaosa a mā ǁkhā? (3) Mati da ǁkhaeǂgaosa ǃgâi ǀgaub ǃnâ a mā ǁkhā?

4-5. (a) Tae-i ǃaroma i a ǂhâbasa ǂansa ǀgôan kaikhoena xu ra ǀkharasa? (b) ǀGaiǃkhōsa mati ǀgôan nau khoen ǃoa-ai ūhâ ǂgomǃgâsiba a tsâǀkhā ǁkhā?

⁴ ǀNî kaikhoen hîna ge ǀgôaron a hîna a ǀgaiǃkhōhen ge noxoba kurigu ǃkharu hâse ǁkhaeǂgaohesa ǂhâ hâ. Tae-i ǃaroma? Nēsa ǁnâuǃās ǃaroma da ge ǂgurose nî ǂanǃgâ ǀgôaron kaikhoena xu ra ǀkharasa. ǀGôan ge ǃkharagagu ǀgaugu hînan kaikhoena tsâǀkhāhe tama hâgu ǃnâ a tsâǀkhāhe ǁkhā. ǀNî aiǁgaude ǃoa kō re.

⁵ ǀGôan ge ǁnān hîna ra kōǃgânin ǃnâ ǂgomǃgâsiba nî omkhâi. Nēs ge ǀgôana ǃnorasase ra tsâ kai tsî ǁkhāǁkhā nî în ǁnān hîna ǀnamnina ǂgomǃgâ. (Psa. 22:9) Xawe tsûtsûsasen ge ǀgaiǃkhō-aona ǃnāsase omsa xu hâ, ǀgūkhoen, ǀhōsan tamas ka io a ǂanǂansa khoe. Nē ǀgaub ǃnâ ǀgôan di ǂgomǃgâsiba khôas ge kaise ra ǃgom kai nē ǀgôa-e kurin ǃkharu hâ xawe khoena ǁkhawa ǂgomǃgâsa.

6. ǀGaiǃkhōsa tae-i ǃaroma a tsûtsûsa?

⁶ ǀGôan ge aitsama a ǁkhaubasen ǁoa tsî ǀgaiǃkhō-aon ge ǁgai tsî a tsûtsû nî ǁkhā. ǀGôana sorosise ǂharugu-ūs noxoban nēs ǃaroma sorosises, emosioneelses tsî ǃgameb ǃaroma ǂhanu tama hâ hînas ge kai ǂkhôaba ra ǃaroma. ǀGaiǃkhōs ge ǁîn mûǂuib hînan ǁgoe-ūgus, ǁîǀnamsenxasib tsî ǁîna ǃoa ra ǀgū khoen ǃoagu ūhâba ǃgâi tama ǀgaub ǃnâ ra tsâǀkhā.

7. (a) Tae-i ǃaroma i a supu ǀgaiǃkhō-ao-e ǀgôa-e ǂgaeǂhapusa tsî ǁî-e nēsa mati a dī ǁkhā? (b) Nē ǂhumiba tae-e a ǃaroma ǁkhā?

⁷ ǀGôan ge ǁîn ǁnâuǃāb ǃnâ noxoba kai tama hâ tsî tsū xū-e mû tsî a ǁkhaubasen ǁoa. (1Kor. 13:11) ǁNās ǀkha i ge kaise a supu khoe-e ǁîna ǂgaeǂhapu tsî tsûtsûsa. Tsûtsû-aon ge ǀgôana ra ǂhumiba tsî ra mîba în tā khoe-e mîba, khoe-i ǁî-e ǃgâ tide amaga tsî kai hâ khoe-i tsî ǀgôa-i tsîna ǁgoe-ūgus a ǃgâi di ra mî nēs ǀnamma ra ǁgau amaga. Nē ǂhumib ge ǀgôa-i ǂâi ǀgaub tsî amaba ǂgoms tsîna ǂgui kuriga a tsâǀkhā ǁkhā. ǁNā ǀgôa-i ge ǁî-i ûib ǂâibasensa ūhâ tama hâ khami ra tsâ tsî ǀnam-e tsî i ǁkhaeǂgaohe ǁoa khamis tsîna.

8. Tae-i ǃaroma da ǂgomǃgâsiba a ūhâ ǁkhā Jehovab ǁnān hîna tsûtsû-e hâna nî ǁkhaeǂgao ǃkhaisa?

⁸ Buru kai da tama i ge hâ ǀgaiǃkhō-ao-i hâhâ ra tsûba a ǃaroma ǁkhā ǃkhaisa. Nēs ge kaise a tsûtsûsa. Nēs ge ra ǁgau ǀuni tsēdi ǃnâ da ûi hâsa, nē tsēdi ǃnân ge khoena nî “ǀnamoǃnâ” tsî “ǂkhaba khoen tsî ǂgaeǂhapu-aon ge ǃaruǀîǀgui nî tsū.” (2Tim. 3:1-5, 13) Satanni ǀgaugu ge a eloxoresa tsî kaise i ge a tsûaǂgaoxa khoesib ǁGâuaba ra ǂkhîǂkhî xūna ra dī o. Xaweb ge Jehovaba ǁGâuab tsî ǁîb demongu xa a hoaǀgaixa. ǁÎb ge ǁGâuab ǂgaeǂhapu di ǃoa-ai ǂgī tama hâ. ǂÂis ǃnâ da ge nî ūhâ Jehovab sida ra hōǃâ tsûba ra mû ǃkhaisa tsîb ǂhâ da hâ ǁkhaeǂgaosa nî mādasa. Kaise da ge a ǀkhaesa “ǁGûb ǀkhomxaǂgaosigu dib tsî Elob ǁkhaeǂgaob hoab diba, sige ǁgâiǀāb hoab ǃnâ sige ra ǁkhaeǂgaoba, sige nî ǁkhāti mâ ǁgâiǀāb hoab ǃnâ hâna ǁkhaeǂgao ǁkhāse, ǁnā ǁkhaeǂgaob ǀkha, ǁîb ǀkha ge aitsama Elob xa ra ǁkhaeǂgaoheba.” (2Kor. 1:3, 4) Jehovaba ham-e ra sîsen-ū î-i ǁkhaeǂgao da?

9. Gao-aob Davib mîdi hîna Psalmdi 27:10 ǃnâ hâdi ǃoagub Jehovaba tae-e ǁnān hîna ge ǁîn omaridi xa a āxūna nî dība?

⁹ ǁNān hîna ge ǁgûn xa a āxūhen tsî ǁnān hîna ge ǁîn ǀgūkhoe i xa a tsûtsûhen tsîn ge ǁkhaeǂgaohesa ǂhâ hâ. Psalmdi xoa-aob Davib ge ge ǂan i Jehovab hoaǁae nî ǁkhaeǂgao da ǃkhaisa. (Khomai re Psalmdi 27:10.) Davib ge ǂgomsa ge ūhâ i Jehovab ǁnān hîna ge ǁîn ǀgūkhoen xa a āxūhena nî ǃkhōǂgā ǃkhaisa. Jehovaba nēsa mati ra dī? ǁÎb ǂgomǂgomsa ǃoaba-aonab ge ra sîsen-ū. Sida ǃgâsan hîna Jehovaba ra ǃoaban ge a sida gagasi omari. Aiǁgause, Jesub ge ǁnān hîna ge ǁîba Jehovaba ǃoabas ǃnâ gere ǁhaona ǁîb ǃgâsan tsî ǁgûn ase gere mûǂan.—Mat. 12:48-50.

10. Apostel Pauluba mati ǁîb sîsen-e mûǂam-aob ase ge ǁguiǃā?

¹⁰ ǁNā ǀgaub aiǁgaus xa ǂâi re Xristeǁî ǀhaohâb ǃnâ. Paulub ge kaise ǃgarise gere sîsen mûǂam-aoba. ǁÎb ge ǃgâi aiǁgausa ge mā tsîb ge gere ǂkhâǃnâ-e nau khoena mîbasa în ǁîba ǁgae ǁîb Xristuba ra ǁgae khami. (1Kor. 11:1) Paulub ge ǁîb sîsen-e mûǂam-aob ase sao rase ge ǁguiǃā: “Xawe ge ge sadu ǁaegu khoexaǃnâse ge ī i, ǀgôakōǃgâ-aos ra ǁîs di ôana kōǃgâ khami.” (1Tes. 2:7) Nētsē gu ge ǀhaohâb ǃûi-aoga ǁkhā xū-e nî dī, ǁîgu khoexaǃnâ mîdi ǃnâ-ū Elobmîs ai ǃgaoǃgaosa ǁkhaeǂgaosa gu ra mā hîna.

11. Tae-e ra ǁgau ǀhaohâb ǃûi-aogu ǀguigu ǁkhaeǂgaosa mā tama hâsa?

¹¹ ǀHaohâb ǃûi-aogu ǀguiga ǀgaiǃkhōs ǃnâ ge ǃkharu khoena nî ǁkhaeǂgao? Hî-î. Hoada ge a “ǁkhaeǂgaogu” ǁkhā. (1Tes. 4:18) ǀGaisa Xristeǁî taradi ge ǁkhaeǂgaosa ǂhâ hâ ǃgâsade a ǁkhaeǂgao ǁkhā. Jehovab ge ǁgûs hîna ǁîs ǀgôa-e ra ǁkhaeǂgaos ǀkha ra ǀgopeǀnōsen. (Jes. 66:13) Elobmîs ge aiǁgaude ūhâ taradi hîna nau khoena ra ǁkhaeǂgaodi dide. (Job. 42:11) Jehovab ge kaise ra ǂkhî mûsa Xristeǁî taradi hâsa hîna nau  ǃgâsadi emosioneelse ǃgom ǁaegu ǃnâ ra ǃkharude ǂkhâǃnâs ǃaroma. ǀNî ǁaena gu ge ǀhaohâb ǃûi-aoga ǃgâsade a ǂgan ǁkhā i di ǃgom ǁaegu ǃnâ ra ǃkharu ǃgâsade hui. *

12. Tae-e da dī ǂgao tama hâ?

¹² Xristeǁîn ǂganǃgâsasib ǃnâ ra ūhâ ǂgao ǂhôan ǃnâ da ge dī xū-e ūhâ ǂgao tama hâ. (1Tes. 4:11) Xawe da ǁnān hîna ra huihe ǂgao tsî huiba ôana a hui ǁkhā? Hā re î da koro ǀgauga ǃhoaǃgao hîna da ǁkhaeǂgaosa a mā ǁkhāga.

13. 1 Gao-aogu 19:5-8 tawa i ra mîhe khamib Jehovab di ǀhomǃgāba tae-e Eliaba ge dība tsî nēsa da mati a ǁgae ǁkhā?

¹³ Huiba mā re. Eliab ge ǁîb ûib ǃaroma a ǃkhoe o, ob ge kaise ge ǂkhabuǂâi hâ i tsî gere ǁō ǂgao. Jehovab ge ǀhomǃgāba ge sî îb nē ǂkhabuǂâi hâ aoba ǁkhaeǂgao. ǀHomǃgāb ge ǃgâi huiba ge mābi. ǁÎb ge Eliaba ǀgamsa ǂû-e mā tsî ge ǂkhâǃnâ îb ǂû. (Khomai re 1 Gao-aogu 19:5-8.) Nē ǃnaeǃkhais ge amaba ra ǁkhāǁkhā: Khoexaǃnâsib hîna da khoe-e ra ǁgaub ge kaise ǃgâi sîsenǂuiba a ūhâ ǁkhā. ǂÛǀhaos tamas ka io ǀkhaeba da ge ǁî-e a mā ǁkhā, nēs ge tsûaǂgao hâ khoe-e a ǁkhaeǂgao ǁkhā sida ǀnammi tsî khoexaǃnâsib tsîna ra ǁgause. Nau khoe-i ǀkha sida ǂganǃgâsa xūn xa ǃhoas xa da ga ǃgombahe xawe da ge noxoba huiba a mā ǁkhā.

14. Tae-e da Eliab aiǁgausa xu a ǁkhāǁkhāsen ǁkhā?

¹⁴ ǁGâiǀāb ǃnâ hâ khoe-e ǃnorasase tsî ǃgâise tsâ kai re. ǀNî hâ xū-e da ge noxoba Eliaba xu a ǁkhāǁkhāsen ǁkhā. Jehovab ge buruburuxase kēbo-aoba ǂhâb ge hâ i huiba ge mā îb Horeb ǃhomma ǃoa ī. Jehovab ge ǃgaeǀhaosa ǁîb khoen ǀkha a dī ǃkhais tawab ge Eliaba ǃnorasase gere tsâ. ǁÎb ge ǀnîsi gere ǂâi ǁîba gere ǃgam ǂgao khoena xub ǃgūse hâ di. Tae-e da nē aiǁgausa xu a ǁkhāǁkhāsen ǁkhā? Tsūdī-e hâ khoena da ga ǁkhaeǂgao ǂgao o, o da ge aibe ǁîna ǃnorasase nî tsâ kai. Aiǁgause, ǀhaohâb ǃûi-aogu ge ǂâis ǃnâ nî ūhâ tsûaǂgao hâ ǃgâsas ge oms ai ǃhoa ūhes xa nî ǃgâibahe tsî Gaosib ǀHû-ommi ǃnâ ǃhoas xa ǃgâibahe tide. Xawe ǀnî hâ ǃgâsa i ge Gaosib ǀHû-ommi ǃnâ ǃhoas xa nî ǃgâibahe.

15-16. ǃGâi ǃgâ-aosisa tae-e ǃkhōǂgā hâ?

¹⁵ ǃGâi ǃgâ-aose ī re. Elobmîs ge sao ra ǁkhaeǂgaosa ra mā: ‘Mâ khoe-i hoa-e a-i ǃhae ǁnâu i nîsa, î-i ǂau ǃhoa i nîsa.’ (Jak. 1:19) ǃGâi ǃgâ-ao i da a? ǂHâǂhâsa tama hâ xū-i ase da ge khoena ǃgâsa a mû ǁkhā tamas ka io khoe-e xū-e mî tama hâse a kō ǁkhā. Xawe ǃgâise ǃgâs ge ǁnās xa ǃnāsa-e ǃkhōǂgā hâ. Aiǁgause, Eliab ge ǁîb tsâsiga Jehovaba ǃoa ge khōraǂui tsîb ge Jehovaba ǃgâise gere ǃgâ. Jehovab ge ge ǁnâuǃā Eliab gere ǃao, ǀguri tsâsen tsî ǁîb sîsen-i a ǁau khami tsâsa. Jehovab ge ǁîba ge hui îb nē tsâsiga sîsenǂam. ǁÎb ge Eliabab gere ǃgâ ǃkhaisa ge ǁgau.—1Gao. 19:9-11, 15-18.

¹⁶ ǃGâsa-e da ra ǃgâ hîna da mati tsâbaǁhaoxasib, khoexaǃnâsib tsî ǀnammi tsîna a ǁgau ǁkhā? ǀNî ǁaegu ai i ge ǀoro mîdi hîna da ra mîde sida ra tsâ ǀgauba a ǁgau ǁkhā. ǀNîsi du ge a mî  ǁkhā: “Kaise ta ge ǁgaise ra tsâ nēs go sadu ǀkha a īsa. ǀGôa-i ge tā ǁnā ǀgaub ǃnâ nî hâ-ūhe.” ǀNîsi du ge dî-e a dî ǁkhā, i du ǁnâuǃā khoe-i mati ra tsâsa. ǀNîsi du ge a dî ǁkhā, “toxoba du huite re î da ǁnâuǃā tae-e du ra ǂâibasensa?” tamas ka io “nēti du ge mî o, o da ge sao rase ge ǁnâuǃā . . . Nēti du goro ǂâibasen?” Nē ǀnamxaǃnâ ǁgâiǂûisendi ge khoe-e ǂgomǃgâsiba a mā ǁkhā amabes ǃnâ du ra ǃgâ tsî ra ǁnâuǃāsa.—1Kor. 13:4, 7.

17. Tae-i ǃaroma da ǃnūǃnâxasiba nî ūhâ tsî nî ‘ǂau ǃhoa da nîsa’?

¹⁷ ǂAn re î du ‘ǂau ǃhoa du nîsa.’ Tā khoe-e ǃhaese ǁnama tamas ka io ǁî-i ǂâi ǀgauba ǀkharaǀkhara re. Tsî ǃnūǃnâxasiba ūhâ re. Eliab ge ǁîb tsâsiga Jehovaba a mîbas khaoǃgâb ge kai tsûaǂgaob ǀkha gere ǁgâiǂûisen. Ega, Jehovab ge Eliab ǂgomsa a ǀgaiǀgais khaoǃgâb ge ǁîb tsâsiga ǁkhawa ge ǁgâiǂûi, ǁkhā mîde ra sîsen-ūse. (1Gao. 19:9, 10, 13, 14) Nēsa tae-e ra ǁkhāǁkhā da? ǀNî ǁaegu ain ge ǃoab ǃnâ hâ khoena ǁîn tsâsigu xa ǀguis xa ǃnāsa ǃnāde nî ǃhoa. Jehovab khami da ge ǃnūǃnâxasib ǀkha ra ǃgâ ǂgao. Mâ sîsenǂuiban a hō ǁkhā ǀgauba khoena mîba tama hâse da ge tsâbaǁhaoxasib tsî khoexaǃnâsib tsîna ra ǁgau.—1Pet. 3:8.

18. Sida ǀgorede mati ǁnān hîna tsûb ǃnâ hâna ra ǁkhaeǂgao?

¹⁸ Khoe-i hîna tsûb ǃnâ hâ i ǀkha ǀgore ǀhao re. Khoe-i hîna kai tsûb ǃnâ hâ i ge nî ǃgombahe ǀgoresa. ǁÎ-i ge xūose nî tsâ Jehovaba ǃoa ǀgūsa. ǁNā khoe-e da ga ǁkhaeǂgao ǂgao o, o da ge ǁî-i ǀkha a ǀgore ǁkhā, ǁî-i ǀonsa ra sîsen-ūse. ǁNā ǀgores ǃnâ da ge Jehovaba a mîba ǁkhā ǁnā khoe-e da kaise a ǀnam ǃkhaisa. Jehovaba da ge a ǂgan ǁkhā îb  ǃoab ǃnâ hâ khoe-e hui î-i tsaura ǂgaoba ūhâ tsî ǁkhaeǂgaosa hō. ǁNā ǀgoredi ge kaise ǃgâise ra ǁkhaeǂgao da.—Jak. 5:16.

19. Tae-e nî huida khoena ǁkhaeǂgaos ǃgao aiǂhomisens ǃnâ?

¹⁹ ǂKhâǃnâ tsî ra omkhâi mîde sîsen-ū re. ǂÂi re ǃhoa du nîs aiǃâ. ǂÂiǃgâ-e tama hâ mîdi ge a tsûtsû ǁkhā. Khoexaǃnâ mîdi ge a ǂgauǂgau da ǁkhā. (ǂKhm. 12:18) Jehovaba ǃoa ǀgore re, îb hui du khoexaǃnâsib, ǁkhaeǂgaos tsî tsaura mîdi tsîna hōsa. ǂÂis ǃnâ ūhâ re mîdi hîna a huida ǁkhā dige Jehovaba xu ra hā, nē mîde da ge Elobmîs ǃnâ ra hō.—Heb. 4:12.

20. ǀNî ǃgâsana tae-e gere ǂâi tsûtsûhen ge amaga, xawe tae-i xa da nî ǂâiǂâiǃnâ nî?

²⁰ ǃGâsan hîna ge ǃkharu ge ǁaeb ǃnâ a tsûtsûhen ge ra ǂgom ǁîn khoe-i xa ǀnam-esa anu tama hâsa. Nēb ge a ǂhumi. Elobmîsa sîsen-ū re ǁîna ǂâiǂâiǃnâsa Jehovab ge ǁîna a ǀnam di. (“ Elobmîsa xu hâ ǁkhaeǂgaos” di hâ boksisa mû re.) ǂÂi oa re ǀhomǃgāb ge mati kēbo-aob Daniela a ǀgaiǀgaisa tsûaǂgaob ge hâ io. Jehovab ge gere ǂgao îb nē khoeba ǂan ǁîb kaise a ǀnam bi ǃkhaisa. (Dan. 10:2, 11, 19) ǁNās ǁkhās khamin ge ǃoab ǃnâ hâ ǃgâsana Jehovab xa kaise a ǀnam-e.

21. Tae-e tsūdī-aon hîna ǃhausen tama hân ǀkha nî ī xawe tae-e da nēsi nî dī?

²¹ Khoena da ga ǁkhaeǂgao o, o da ge ǁîna Jehovab a ǀnam nî ǃkhaisa ra ǂâiǂâiǃnâ. Tsî da ge tā nî ǀuru Jehovab a ǂhanu-aisib Elosa. Jehovab ge tsûtsûhe ge khoen hoana ra mûǂan, nau khoen ga mû tama i xawe. Jehovab ge hoa xūna ra mû tsîb ge nî dī î-i ǃhausen tama hâ tsūdī-ao-e ǁkharahe. (Num. 14:18) Hoana da ge sida ǁkhāsib ǃnâ nî dītsâ tsûtsûhe ge khoena ǀnamma ǁgausa. Kaise î ge ra ǁkhaeǂgao da ǂansa Jehovab ǁnān hîna ge Satanni tsî ǁîb ǃhūbaib tsîn xa a tsûtsûhena nî ǂgauǂgausa. ǀGūǁae î ge nē tsûtsûsa xūna sida ǂâidi tsî ǂgaogu ǃnâ hā tide.​—Jes. 65:17.